Xcholbel skʼoplal Ajvalilal: Chichʼ cholel lekil aʼyejetik ta spʼejel Balumil

JUN sob kʼalal jaʼo chakux ta abtele chachapan aba sventa chalokʼ ta cholmantal. Xachibet jutuk mi chalokʼ, yuʼun lubemot jutuk chavaʼi. ¡Jaʼ xa chakʼan yaʼel ti xkom akux li ta sobe! Pe chapas orasion, vaʼun chabat. Koʼol chlokʼ achol mantal xchiʼuk jun ermana ti oy xa sjabilal ti tukʼ yakʼoj sbae, vaʼun chkʼot ta avoʼonton ti kuchem yuʼune xchiʼuk ti oy slekil yoʼontone. Kʼalal yakal xa chachol mantal ta jujupʼej nae chanopbe skʼoplal ti oy ermanoetik xchiʼuk ermanaetik ta spʼejel Balumil ti jech yakal chcholik mantal eke, ti jaʼ onoʼox tstunesik li vunetik chatunese xchiʼuk ti jech chichʼik tojobtasel kʼuchaʼal voʼote. Xkuxet xa chavaʼi kʼalal chasut batel ta anae. ¡Xamuyubaj tajek ti lalokʼ ta cholmantale!

Li avie, li yabtel mas tsots skʼoplal tspas li Ajvalilal yuʼun Diose jaʼ li cholmantale. Laj onoʼox yal Jesus ti ch-epaj tajek cholmantal li ta slajebal kʼakʼale (Mat. 24:14). ¿Kʼu yelan kʼotem ta pasel li albil kʼop taje? Li ta jvokʼ liʼe, ta jchanbetik skʼoplal jayibuk kʼusitik toj tsots skʼoplal sventa chichʼ pasel li abtelale. Ta jkʼeltik buchʼutik yakal chcholik mantal, kʼutik yelan xchiʼuk li kʼusitik tstunesike. Skotol taje skoltaoj ta smiyonal noʼox krixchanoetik sventa meleluk xilik li Ajvalilal yuʼun Diose.