Li kʼusitik tspas Ajvalilale: Ch-achʼub skotol kʼusitik

YAKAL chatul ta steʼel jpʼej mantsana, vaʼun xmuet tajek chavaʼi yoʼ to muʼyuk atikʼoj ta moche. Akʼo mi oy xa jayibuk ora yakal cha-abtej muʼyuk to bu lubemot, jech oxal chakʼan to cha-abtej jlikeluk. Te noʼox nopol yakal tstulbe sat teʼ li ameʼ eke, xmuyubaj noʼox yakal chloʼilaj xchiʼuk li avutsʼ avalalik xchiʼuk avamigotakik ti tal koltavanikuk ta stsobbel sat li atsʼunobtake. Tseb to tajek xvinaj, jech stsebal kʼuchaʼal laj avil kʼalal ololot toʼoxe. Mu xachʼun yaʼeluk ti laj avil meʼelub batel li ta mol balumile. Xvul ta ajol kʼu yelan laj batel yipal ta skoj li chameletike xchiʼuk ti la atsakbe skʼob kʼalal chlokʼ xaʼox xchʼulele. ¡Kʼu to noʼox yepal laj avokʼita li ta smukinale! Pe liʼ xa oy li avie, te xchiʼuk ep krixchanoetik, muʼyuk xa bu ip xchiʼuk lek xa xkuxet chaʼi.

Chkʼot skʼakʼalil maʼ taje. Jchʼunojtik ta melel ti chkʼot ta pasele, yuʼun ta onoʼox spas kʼusi chal li Diose. Li ta jvokʼ liʼe ta jchanbetik skʼoplal jayibuk albil kʼopetik ti chkʼot ta pasel yuʼun li Ajvalilal kʼalal skʼan toʼox xlik li Armajedone. Jech xtok, ta jkʼeltik jayibuk kʼusitik albil chkʼot ta pasel ta tsʼakal. ¡Toj kʼupil xa noʼox me sba kʼalal mi laj kiltik tsventain spʼejel Balumil li Ajvalilal yuʼun Diose xchiʼuk ti tspas ta achʼ skotol li kʼusitike!