XCHANOBIL 02

Li Vivliae chakʼ spatobil koʼontontik

Paso imprimir

Li krixchanoetike ep kʼusi tsnuptanik ti chat-o yoʼontonike xchiʼuk ti kʼux chaʼiike. ¿Mi oy jech avaʼioj aba ek? Xuʼ van yakal chavil avokol ta jtosuk chamel o xuʼ van oy buchʼu cham avuʼun, vaʼun xuʼ van xi chajakʼbe abae: «¿Mi chlekub onoʼox van li jkuxlejale?». Xuʼ me spat avoʼonton li kʼusi chal Vivliae.

1. ¿Kʼuxi tspat koʼontontik li Vivliae?

Li Vivliae chalbutik ti kʼu yuʼun oy tajek jvokoltike. Jech xtok, chalbutik ti jutuk xa skʼan xlaj skʼoplale. Li Vivliae chalbutik xtok li kʼusi lek ta jtatik ta jelavele xchiʼuk chakʼ spatobil koʼontontik (kʼelo Jeremias 29:11, 12). Taje tskoltautik sventa xkuch batel kuʼuntik li jvokoltike xchiʼuk ti xijmuyubaj noʼox li avie. Jech noxtok, jamal chalbutik ti xuʼ xijmuyubaj ta sbatel osile.

2. ¿Kʼu yelan jkuxlejaltik ta jelavel chal li Vivliae?

Xi chal Vivlia ta sventa li kʼusi chkʼot ta pasel ta tsʼakale: «Muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (kʼelo Apokalipsis 21:4). Chlaj skʼoplal li vokoliletike: li povreale, li kʼusi chopol chkichʼtik pasbele, li chameletike xchiʼuk ti chijchamutike. Li Vivliae chal ta jamal ti chkʼataj ta jun kʼupil sba nichimaltik li balumile xchiʼuk ti xuʼ te xnakiik ta sbatel osil li krixchanoetike.

3. ¿Kʼuxi xuʼ xanaʼ ti chkʼot ta pasel li kʼusi chal Vivliae?

Epal krixchanoetike tsnopik ti chlekub li xkuxlejalike, pe mu snaʼik ta melel mi chkʼot ta pasel. Pe jaʼuk li Vivliae chkʼot ta pasel li kʼusi chale, xuʼ jchʼuntik ti chkʼot ta pasel mi ta jkʼelbetik lek smelolal li Tsʼibetike, jaʼ xkaltik, mi la jchantik li Vivliae (Echos 17:11). Vaʼun, te chavakʼ venta atuk mi melel li kʼusi yaloj chkʼot ta pasel ta jelavele.

JCHANTIK TO BATEL MAS

Jkʼeltik batel junchibuk li kʼusi chal Vivlia ti chkʼot ta pasel ta jelavele. Ta jkʼeltik xtok kʼuxi spatojbe yoʼonton li yan krixchanoetike.

Li lokʼoletike: Te xvinaj kʼu yelan xkuxlejal li krixchanoetik avie xchiʼuk ti kʼu yelan li kuxlejal ta jelavel chal Vivliae. Oy to yan lokʼoletik jech chvinaj li ta olone.

4. Li Vivliae chal ti xuʼ xijkuxi sbatel osil ta jun balumil ti bu chʼabal xa vokolile

Kʼelavil li kʼusitik yaloj Vivlia ti chkʼotanuk ta pasele. ¿Kʼusitik ti chakʼan chakʼel chkʼot ta pasele? ¿Kʼu yuʼun?

Kʼelik li tekstoetik te talem ta olone xchiʼuk albeik skʼoplal li sjakʼobiltak liʼe:

¿Mi tspat van koʼontontik li tekstoetik liʼe? ¿Mi xuʼ van xpatbat yoʼonton li avutsʼ avalal xchiʼuk avamigotake?

Nopo noʼox avaʼi ti te xa kuxulot ta jun balumil kʼuchaʼal liʼe:

MUʼYUK XA BUCHʼU...	JKOTOLTIK...
... chil svokol, chmalub mi jaʼuk ta xcham (Isaias 25:8)	... ta xkilbetik sat yan velta li kutsʼ kalaltik ti chamemike, jaʼ xkaltik, ti chchaʼkuxiik liʼ ta balumile (Juan 5:28, 29)
... ch-ipaj, muʼyuk xa buchʼu maʼsat mi jaʼuk pakʼchikin (Isaias 33:24; 35:5, 6)	... chlekub jbekʼtaltik xchiʼuk lek tsotsutik jech kʼuchaʼal li kerem tsebetike (Job 33:25)
... chopol kʼusi chichʼ pasbel (Isaias 32:16, 17)	... oy noʼox jveʼeltik, oy lek jnatik xchiʼuk ta jkʼupin li kabteltike (Salmo 72:16; Isaias 65:21, 22)
... chil svokol ta skoj paskʼop (Salmo 46:9)	... jun noʼox koʼontontik (Salmo 37:11)
... tsta ta naʼel li kʼusi chopol kʼotem ta stojolale (Isaias 65:17)	... ta jkʼupin jkuxlejaltik ta sbatel osil (Salmo 37:29)

Jun uni olol ti ip toʼoxe, pe lek xa oy xchiʼuk yakal tsmey li smeʼe.

Jun uni mol ti keremaj xae yakal chjoch jun karetiya ti noj ta veʼliletike.

5. Li kʼusi chal Vivliae xuʼ xjel-o yuʼun jkuxlejaltik

Ep krixchanoetike yayijem chaʼi sbaik o chkap-o sjolik ta skoj li kʼusitik tsnuptanike. Junantike oy kʼusitik tspasik sventa junuk noʼox yoʼonton xaʼi sbaik. Kʼelavil kʼuxi skoltaoj krixchanoetik li kʼusi chal Vivliae. Kʼelik li VIDEOE xchiʼuk albeik skʼoplal li sjakʼobiltak liʼe:

VIDEO: Ta jkʼan ti jmoj oyuk li krixchanoetike (4:07)

Lokʼoletik li ta video Ta jkʼan ti jmoj oyuk li krixchanoetike. 1. Yakal chtuchʼ tuxnukʼ li Rafika kʼalal bikʼit toʼoxe xchiʼuk yantik ti jmoj stsʼunbalike. 2. Kʼalal bat ta sba velta ta jun asamblea yuʼun stestigotak Jeova li Rafikae. Xmuyubaj tajek ti chil ti jmoj tsobolik li krixchanoetik ti jelel stsʼunbalike.

Li ta videoe, ¿kʼusi ti toj chopol laj yil li Rafikae?
Akʼo mi pʼajbil-o ta skoj li stsʼunbale, ¿kʼuxi koltaat-o yuʼun li Vivliae?

Li kʼusi chal Vivliae tskoltautik sventa mu xkat tajek koʼontontik xchiʼuk ti xijmuyubaj noʼox akʼo mi oy jvokoltike. Kʼelik Proverbios 17:22 xchiʼuk Romanos 12:12 xchiʼuk albeik skʼoplal li sjakʼobiltak liʼe:

Li kʼusi chal Vivlia ti chkʼot ta pasele, ¿mi xuʼ skoltaot ta akuxlejal? ¿Kʼu yuʼun ti jech chavale?

JUNANTIKE XI CHALIKE: «Jecheʼ loʼlael maʼ li kʼusi chal Vivliae».

¿Kʼu yuʼun toj tsots skʼoplal ti xakʼel atuk mi melel li kʼusi chal Vivliae?

¿KʼUSI LA ACHAN?

Li Vivliae chalbutik ti xuʼ jkʼupin jkuxlejaltik ta jelavele, taje tspat koʼontontik xchiʼuk tskoltautik sventa xkuch-o batel kuʼuntik li jvokoltike.

Svulesobil ta joltik

¿Kʼu yuʼun skʼan snaʼ krixchanoetik li kʼusi yaloj tspas Diose?
¿Kʼusitik chal Vivlia ti chkʼot ta pasel ta jelavele?
¿Kʼuxi xuʼ skoltaot avi ti anaʼoj li kʼusi chkʼot ta pasel ta jelavele?

Tsʼibao kʼusi ora tsuts avuʼun li xchanobile:

Paso liʼe

Sventa xkom lek ta ajol li kʼusitik chal Vivlia ti chkʼot ta pasele, chaʼkʼelo li tekstoetik talem li ta xchanobil liʼe.

Yan kʼusi xuʼ xapas:

Kʼusitik yan xuʼ xapas

XUʼ TO XAKʼEL LIʼE

Kʼelavil kʼuxi xuʼ skoltaot li kʼusi chal Vivlia kʼalal jaʼo chanuptan avokole.

«¿Bu xuʼ jtatik spatobil koʼontontik?» (¡Vikʼiluk me jsatik!, 22 yuʼun avril ta 2004)

Kʼelavil kʼuxi skoltaoj yantik li kʼusi chal Vivlia kʼalal xlik xkaj noʼox xchamelike.

«¿Mi xuʼ skoltautik Vivlia mi iputike?» (Xuʼ te xata ta jw.org)

Mi la akʼel li video ti oy smusikaile, nopo avaʼi ti te xa chakʼupin akuxlejal xchiʼuk avutsʼ avalal li ta jun nichimaltik yaloj Vivliae.

Te xa kuxulun chkil 3:37

Kʼelavil kʼuxi jelbat xkuxlejal yuʼun Vivlia jun vinik ti tspakbe toʼox skʼoplal yantike.

«Mu xa jechuk chkaʼi ti skʼan jel li kʼusitik oy ta balumile» (Li Jkʼel-osil ta toyole, 1 yuʼun julio ta 2013)