¿Kʼu yuʼun xuʼ jun koʼontontik kʼalal mi lik li sjabilal 2023? | ¿Kʼusi chal li Vivliae?

Li ta sjabilal 2023, oy ta koʼontontik ti lekuk kʼusi xkʼot ta jtojolaltik xchiʼuk ta stojolal li kutsʼ kalaltike. ¿Kʼu yuʼun xuʼ jpat koʼontontik ti oy kʼusi lek chkʼot ta pasele?

Tspat koʼontontik li Vivliae

Li Vivliae chalbutik ti oy lekil aʼyejetike, ti mu teuk˗o sbatel osil li vokoliletik ta jnuptantik avie. Yuʼun li Vivliae ‹laj yichʼ onoʼox tsʼibael sventa jchanubtaseltik xchiʼuk ti spat koʼontontike› (Romanos 15:4).

•  Mi chakʼan chanabe mas skʼoplal kʼusi chchanubtasvan li Vivliae, kʼelo li mantal ti xi sbie: «¡Oy kʼusitik kʼupil sba chtal!».

Xuʼ me xata spatobil avoʼonton

Li spatobil koʼontontik chal Vivliae «xkoʼolaj kʼuchaʼal s˗anklail jkuxlejaltik» (Ebreos 6:19). Taje tskoltautik sventa junuk noʼox koʼontontik, ti stsʼikuk noʼox kuʼun li jvokoltik ta jnuptantik avie, ti lekuk kʼusi jnoptike xchiʼuk ti xijmuyubajuk ta melele. Jech kʼuchaʼal liʼe:

•  Kʼelo avil kʼuxi koltaat jun vinik ti oy toʼox kʼusi meʼinem ta yoʼontone, pe la sjel xkuxlejal kʼalal la xchan li spatobil oʼontonal chal ta Vivliae. Kʼelo li video La jpʼaj ti kʼu toʼox yelan li jkuxlejale.

•  Kʼelo avil kʼusi spatobil koʼontontik chalbutik Vivlia kʼalal oy buchʼu chcham kuʼuntike. Kʼelo li video Kʼux k’alal oy buchʼu chcham kuʼuntike.

Xuʼ to me mas xapat avoʼonton

Epal krixchanoetike tskʼanik ti lekuk kʼusi xkʼot ta pasel ta xkuxlejalike, pe mu snaʼik mi ta onoʼox xkʼot ta pasel ta melel. Jaʼuk li Vivliae oy kʼusi lek chalbutik. ¿Kʼu yuʼun xuʼ jchʼuntik? Yuʼun jaʼ laj yal stuk li Jeovae,a li stuke mu snaʼ sjut kʼop (Tito 1:2). Jaʼ no’ox Jeova chakʼ kʼotuk ta pasel li k’usi jamal yaloj tspase (Salmo 135: 5, 6).

Ta jtijkutik avoʼonton sventa xachan li spatobil oʼontonal chalbe skʼoplal li Vivliae, yuʼun ta me xatabe sbalil. Xuʼ me mas xapat avoʼonton mi la akʼelbe lek smelolal li Tsʼibetike (Echos 17:11). Sventa xavaʼibe mas smelolale, kʼano junuk matanal chanubtasel ta Vivlia. ¡Junuk no’ox me avoʼonton mi lik li sjabilal 2023!