¿Bu ta jta spatobil koʼontontik?
Li kʼusi chal Vivliae
Li Vivliae chal ti li Diose tskʼan ‹ti oyuk kʼusi lek jtatik ta jelavele xchiʼuk ti oyuk spatobil koʼontontike›a (Jeremias 29:11). Ti kʼu yuʼun laj yakʼbutik Vivlia li Diose, jaʼ sventa «tspat koʼontontik» (Romanos 15:4). Jech kʼuchaʼal ta jkʼeltik batele, li tojobtaseletik ta Vivliae jaʼ tskoltautik sventa xijmuyubajuk noʼox jujun kʼakʼal xchiʼuk li kʼusitik yaloj tspas Diose chakʼbutik spatobil koʼontontik li ta jelavele.
Li ta mantal liʼe ta jkʼeltik batel:
¿Kʼuxi tskoltautik Vivlia sventa xijmuyubaj noʼoxe?
Li Vivliae tskoltautik sventa xijmuyubaj noʼox, yuʼun chalbutik lekil tojobtaseletik sventa xlekub li jkuxlejaltike. Jkʼeltik batel junantik.
Saʼo beiltasel ta Vivlia. Xi chal Salmo 119:105: «Li akʼope jaʼ kʼotem ta kantil yuʼun li kakane xchiʼuk jaʼ sakjaman batel yuʼun li jbee». Oy chaʼtos kʼuxi tskoltautik li xojobal luse: xuʼ xkiltik yuʼun li kʼusi te noʼox nopol oye xchiʼuk xuʼ xkiltik yuʼun li kʼusi nom to jkʼelojtik batele. Jaʼ noʼox jech ek, li beiltaseletik ta jtatik ta Vivliae tskoltautik sventa stsal kuʼuntik li kʼusi yakal ta jnuptantik avie xchiʼuk chakʼ ti xijmuyubajuk noʼox jujun kʼakʼale. Li chanubtaseletik ta Vivliae «chakʼ kipaltik yan velta» xchiʼuk «xpatet koʼontontik yuʼun» (Salmo 19:7, 8). Jaʼ noʼox jech ek, li Vivliae chakʼ kiltik li kʼusi labalik sba yaloj tspas Dios ta sventa li balumile xchiʼuk li krixchanoetike. Li spatobil oʼontonal taje tskoltautik sventa xijmuyubaj noʼox ta sbatel osil.
Chʼamo koltael. Kʼalal ep jvokoltike, jaʼ xa lek chkaʼitik ti xijnamaj ta stojolal kutsʼ kalaltik xchiʼuk kamigotaktike. Pe muʼyuk me ta jtabetik sbalil mi jech ta jpastike, yuʼun li Vivliae chalbutik ti xuʼ van oy kʼusi muʼyuk lek chbat ta nopel kuʼuntike xchiʼuk xuʼ van oy kʼusi ta jpastik ti jaʼ noʼox chakʼ jvokoltike (Proverbios 18:1). Li kutsʼ kalaltike xuʼ skoltautik sventa ta smeloluk noʼox xkil li jvokoltike xchiʼuk xuʼ xakʼbutik tojobtaseletik ta sventa kʼuxi xuʼ stsal kuʼuntik li kʼusi ta jnuptantike (Proverbios 11:14). O mi moʼoje, xuʼ spat koʼontontik, chakʼ xkuxetel koʼontontik xchiʼuk jaʼ jech chakʼ kipaltik sventa xkuch batel kuʼuntik ti kʼu sjalil chkil jvokoltike (Proverbios 12:25).
Kʼopono Dios. Xi chal li Vivliae: «Akʼbo sbain Jeova li avikatse, vaʼun jaʼ chikot. Mi jaʼuk onoʼox chakʼ yaluk ta lum li buchʼu tukʼe»b (Salmo 55:22). Xi chichʼ biiltasel li Jeovae: «Li Dios ti chakʼ spatobil [oʼontonale]» (Romanos 15:13). Kʼalaluk mi la akʼopone, albo skotol li kʼusi chavul˗o avoʼontone xchiʼuk jpʼeluk ta avoʼonton ti tsvul yoʼonton ta atojolal li Diose (1 Pedro 5:7). Jaʼ yuʼun, xi chal li Vivliae: «Jaʼ tskoltaoxuk sventa tukʼuk-o oyoxuk, jaʼ tskoltaoxuk sventa tsotsukoxuk˗o» (1 Pedro 5:10).
Akʼo stsatsubtas avoʼonton li prevaetike. Xi chal Dios li ta Vivliae: «Li buchʼu chchikintabune jun noʼox yoʼonton chkuxi xchiʼuk muʼyuk tsvul˗o yoʼonton mi xvul ta stojolal jtosuk vokolil ti xibal sbae» (Proverbios 1:33). Jun ants ta Australia ti Margaret sbie, laj skotol kʼusi oy yuʼun kʼalal echʼ ikʼaloʼe. Pe muʼyuk bu la svul yoʼonton, yuʼun oy kʼusi tsots skʼoplal la xchan: laj yakʼ venta ti j˗echʼel be noʼox li kʼusi oy kuʼuntike. Kʼalal echʼ xa ox li ikʼaloʼe, li stuke jaʼ laj yakʼ ta yoʼonton li kʼusitik mas tsots skʼoplale: li yutsʼ yalale, yamigotak, ti lekuk xil sba xchiʼuk Diose xchiʼuk li spatobil oʼontonal chakʼ Vivliae (Salmo 37:34; Santiago 4:8).
¿Kʼusi spatobil koʼontontik chakʼbutik li Vivliae?
Li Vivliae jamal chal ti oy kʼusi lek chkʼot ta stojolal li krixchanoetike xchiʼuk li balumil ta jelavele. Taje jutuk xa tajek skʼan. Li vokoliletik ta jnuptantik avie jaʼ svinajeb ti kuxulutik «li ta slajebal xa kʼakʼale» (2 Timoteo 3:1-5). Li Diose jutuk xa skʼan slajesbe skʼoplal li kʼusi chkʼotanuk ta pasel avie, li choplejale xchiʼuk li vokoliletik ta jnuptantike. Taje jaʼ chakʼ kʼotuk ta pasel ta stojolal jun ajvalil ti ojtikinbil kʼuchaʼal li Ajvalilal yuʼun Diose (Daniel 2:44; Apokalipsis 11:15). Kʼalaluk la spas orasion sventa padrenuestro li Jesuse, jaʼ la snopbe skʼoplal li Ajvalilal taje, yuʼun xi laj yale: «Akʼo kʼotuk ta pasel avuʼun li kʼusi tskʼan avoʼonton ta sba [balumile]» (Mateo 6:9, 10).
Li Vivliae jamal chalbutik li kʼusi oy ta yoʼonton Dios ta stojolal li krixchanoetike. Jkʼeltik batel junantik vokoliletik ti tslajesbe skʼoplal li Ajvalilal yuʼun Diose:
Chlaj skʼoplal li viʼnale. «Ep kʼusi chakʼ li balumile» (Salmo 67:6).
Chlaj skʼoplal li chameletike. «Mi junuk jnaklej ta balumil xi chale: ‹Toj ipun›» (Isaias 33:24).
Chlaj skʼoplal li lajelale. Xi jamal ch˗albatik li krixchanoetike: «Tskusbat skotol yaʼlel satik yuʼun li Diose, muʼyuk xa lajelal, muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik. Jelav xa skʼoplal skotol li kʼusitik oy toʼoxe» (Apokalipsis 21:3, 4).
a Li spatobil koʼontontike jaʼ li kʼusi ta jkʼantike xchiʼuk ti xuʼ jchʼuntik ti ta jtatike. Jech xtok, xuʼ van jaʼ li kʼusi ta jkʼantik chkʼot ta pasele o jaʼ li kʼusi jpatoj-o koʼontontik sventa jtatik li kʼusi ta jkʼantike.
b Li Vivliae chal ti jaʼ Jeova sbi li Diose (Salmo 83:18).