Li slajuntosal vokolile

Li Moisese jamal laj yalbe komel faraon ti muʼyuk xa tsut skʼelbe sat yan veltae. Pe kʼalal skʼan toʼox xbate, xi laj yalbe komele: «Li ta oʼlol akʼobal tanae, chcham skotol li sba nichʼoniletik ta Ejiptoe, chcham li sba xnichʼon faraone xchiʼuk li sba xnichʼon mosoiletike».

Li Jeovae laj yalbe j-israeletik ti akʼo spas sveʼelik ti stuk noʼox jeche. Xi laj yale: «Milik jkotuk chij o jkotuk tentsun ti jun to jabil yichʼoje xchiʼuk te xabonbeik xchʼichʼel ta smarkoal stiʼ anaik. Vobil xameltsanik xchiʼuk lajesik xchiʼuk pan ti muʼyuk slevaduraile. Chapalukoxuk me, lapo axonobik xchiʼuk akʼuʼik, yuʼun ta jkoltaoxuk li ta akʼobaltik tanae». ¿Mi muyubajik van xanaʼ li j-israeletike?

Li ta oʼlol akʼobale, li yaj-anjel Jeovae echʼ ta sna skotol li j-ejiptoetike. Ti bu muʼyuk bonbil ta chichʼ li smarkoal stiʼ snaike, cham li sba xnichʼonike. Pe ti bu bonbil smarkoal stiʼ snaʼike muʼyuk xmilbat sba xnichʼonik. Skotol li jnaklejetik ta Ejiptoe cham li sba xnichʼonike akʼo mi jkʼulejik o mi povreik. Pe li j-israeletike mi junuk sba xnichʼon cham yuʼunik.

Li sba xnichʼon faraone cham ek. Mu xa stsʼik yuʼun laj yaʼi, jaʼ yuʼun xi laj yalbe li Moises xchiʼuk Aarone: «¡Lokʼanik xa batel liʼe! ¡Bat ichʼik ta mukʼ li Adiosike! ¡Ikʼo batel li achonbolomike! ¡Lokʼanik xa batel!».

Li vaʼ akʼobale lek yij li ue. Li j-israeletike lek xcholet lokʼik batel li ta Ejiptoe, ta jujuchop yutsʼ yalalik xchiʼuk ta jujuchop snitilulalik lokʼik batel. Li viniketik ti lokʼik batele jaʼ 600 mil ta voʼ, pe parte li antsetik xchiʼuk ololetik ti epik tajeke. Oy ep ti maʼuk j-israeletike lokʼik batel ek sventa xbat yichʼik ta mukʼ li Jeovae. ¡Kolik xa ta mosoil li j-israeletike!

Sventa svules ta sjolik ti koltaatik yuʼun li Jeovae, skʼan smeltsan sveʼelik jech kʼuchaʼal la spasik ta sba veltae. Jujun jabil skʼan jech spasik. Li veʼel taje Kʼin Koltael la sbiin yuʼunik.