Tskolta j-israeletik li Diose

EPAL jabil nakiik ta Egipto li j-israeletike, ayan kʼusitik lek yuʼunik xchiʼuk epajik. Vaʼun lik ajvalilajuk jun achʼ faraón ti chopol yoʼontone, ti muʼyuk laj yojtikin Josee. Ta skoj ti laj yil ti epajem xaʼox li j-israeletike, laj yal mantal ti akʼo x-ochik ta mosoile xchiʼuk ti akʼo sjikʼavesik ta ukʼum Nilo li jvokʼel neneʼ keremetike. Pe oy jun j-israel ants ti mu snaʼ xiʼ ti la stikʼ ta jun moch li yuni neneʼe xchiʼuk la snakʼ ta pujtik. Jaʼ la sta li stseb faraone, Moisés laj yakʼbe sbi xchiʼuk te la stsʼites ta sna ajvalil.

Kʼalal 40 xaʼox sjabilal li Moisese, la stikʼ sba ta vokol ta skoj ti la spoj jun j-israel vinik ti chichʼ ilbajinel yuʼun jun j-egipto vinik ti jaʼ sbainoj skʼelel li abtelale, jaʼ yuʼun jatav batel ta namal lum. Kʼalal 80 xaʼox sjabilale, takat sutel ta Egipto yuʼun Dios xchiʼuk ti akʼo xalbe faraón ti akʼo skolta lokʼel li j-israeletike.

Ta skoj ti muʼyuk la xchʼun ta j-echʼel li faraone, li Diose laj yakʼbe lajuneb vokolil li Egiptoe. Kʼalal mu to chakʼ tal jujune, chbat ta stojolal faraón li Moisese sventa tskʼel mi tsjel yoʼonton li faraón yoʼ mu xkʼot li vokolile. Pe li faraone la stoy sba xchiʼuk tskʼan tstsal li Moisés xchiʼuk Jeovae. Li ta slajunebal vokolile, li Diose la stak batel jun anjel sventa tsmil skotol li baʼyel alab-nichʼnabil li ta lum taje. Jaʼ noʼox ikolik li naetik ti la xchʼunbeik smantal Jeova ta skoj ti la sbonik ta xchʼichʼel jkot milbil matanal chij li smarkoal stiʼ snaike. Li j-israeletike lik spasik jujun jabil li kʼin Koltaele, sventa tsvules ta sjolik li kʼusi kʼot ta pasele.

Kʼalal cham xaʼox li sba nichʼon faraone, laj yalbe mantal Moisés xchiʼuk li j-israeletik ti akʼo xlokʼik batel ta Egiptoe. Ta anil noʼox la stsob sbaik lokʼel. Pe li faraone la sjel snopben jaʼ yuʼun bat snuts xchiʼuk yajsoltarotak xchiʼuk skaretatak. Kʼalal ikʼotik ta stiʼil Tsajal Nabe, joybil xa yilel li j-israeletike. Pe li Jeovae la xchʼak ta oʼlol li nabe, vaʼun ta takin balumil ijelavik. Li j-egiptoetike bat snutsik, li Diose laj yakʼ akʼo lomuk tal ta sbaik li voʼe, vaʼun te ijikʼav li faraón xchiʼuk li yajsoltarotake.

Ta tsʼakale, te la spas skarpanaik ta stsʼel vits Sinaí, li Jeovae te la spas jun trato xchiʼukik. La stunes ta yajkʼopojel li Moisese, laj yakʼ mantaletik ti jaʼ tsbeiltasatik-oe xchiʼuk ti chchabiatik ta skotol kʼusi tspas ta xkuxlejalike. Mi tukʼ laj yakʼ sbaik xchiʼuk mi la xchʼunik mantale, li Diose te oy-o ta stojolalik xchiʼuk ta stunesatik sventa chichʼ bendision li yan lumetike.

Pe jutuk mu skotolikuk muʼyuk laj yakʼik ta ilel ti spatoj yoʼontonik ta stojolal Jeovae. Ta skoj taje, li Diose laj yakʼ akʼo xtal xbatik 40 jabil ta taki xokol balumil. Li Moisese la stʼuj ta xkʼexol jun tukʼil j-israel vinik ti Josué sbie. Vaʼun kʼot skʼakʼalil ti ch-ochik li ta balumil ti yaloj onoʼox Dios chakʼbe li Abrahame.

(Lokʼem ta Éxodo, Levítico, Números, Deuteronomio, Salmo 136:10-15 xchiʼuk Hechos 7:17-36.)