Li Moisese jaʼ tun ta stojolal Jeova

Kʼalal te nakiik ta Ejipto li yutsʼ yalal Jakobe, j-israeletik la sbiinik. Kʼalal chamik li Jakob xchiʼuk Josee, yan-o xa faraon lik ajvalilajuk. Li faraone xiʼ tajek ta skoj ti jaʼ mas xuʼ yuʼun li j-israeletike, jaʼ mu sta li j-ejiptoetike. Jech oxal, li faraone la spas ta smoso skotol li j-israeletike. La suj sventa spasik ladriyo xchiʼuk sventa tsots x-abtejik ta osiltik. Akʼo mi mas tsots ch-akʼbat svokolik jujun kʼakʼal, yantik x-epajik batel li j-israeletike. Ta skoj taje, ilin-o li faraone, jaʼ yuʼun laj yal mantal ti akʼo smilik skotol li neneʼ keremetike, pe ti kuxul xiktaik li neneʼ tsebetike. ¿Mi xiʼik van xanaʼ li j-israeletike?

Jun j-israelal ants ti Jokebed sbie vokʼ jun sneneʼ ti alakʼ sba tajeke. Sventa mu smilike, la stikʼ ta jun moch, vaʼun te bat snakʼ ta ajtikaltik ta yut ukʼum Nilo. Oy jun xvix li neneʼe, Miriam sbi. Te kom snakʼ sba ta ajtikaltik sventa skʼel kʼusi chkʼot ta spasel ta stojolal li neneʼe.

Li stseb faraone bat atinuk ta ukʼum, vaʼun te laj yil li moche. Ta yut li moche te la sta jun olol ti ch-okʼe, kʼuxubaj ta yoʼonton. Li Miriame xi laj sjakʼbe li stseb faraone: «¿Mi chakʼan chbat kikʼbot tal junuk ants sventa xakʼbe xchuʼ li olole?». Laj yal ti leke, jaʼ yuʼun li Miriame jaʼ bat yikʼ talel li smeʼe. Li stseb faraone xi laj yalbe li Jokebede: «Ikʼo batel li olol liʼe, akʼbo xchuʼ, voʼon ta jtojot».

Kʼalal chʼi xa ox li neneʼ kereme, li Jokebede bat yakʼbe li stseb faraone. Vaʼun, li stseb faraone la stsʼites kʼuchaʼal yol xchiʼuk Moises laj yakʼbe sbi. Chʼi talel kʼuchaʼal skerem faraon, jaʼ yuʼun xuʼ ox x-akʼbat li kʼusi tskʼan yoʼontone. Pe li Moisese muʼyuk xchʼay-o ta sjol li Jeovae. Snaʼoj lek ti jaʼ j-israelal vinik li stuke, ti maʼuk j-ejiptoal vinike, jaʼ yuʼun jaʼ laj yichʼ ta mukʼ li Jeovae.

Kʼalal 40 xa ox sjabilal li Moisese, lik skolta li xchiʼiltak ta israelale. Jun kʼakʼale, li Moisese laj yil ti yakal chlaj ta majel ta jun j-ejiptoal vinik li jun xchiʼil ta israelale. Vaʼun, tsots tajek la smaj li j-ejiptoal vinike, toj chamel kʼot yuʼun. Laje, te la smuk komel ta yiʼtik. Kʼalal kʼot ta xchikin faraon taje, tskʼan ox tsmil li Moisese, pe li Moisese jatav batel ta Madian, kʼalal te xa ox oye, chabiat yuʼun li Jeovae.