Li yip kokʼtike
LI YOKʼ jirafae xuʼ van xkʼot ta 45 sentimetro snatil, jech noxtok toj tsots yip xchiʼuk ta anil noʼox tskʼok yanal teʼetik. Li yokʼ bayena asule jech yalal kʼuchaʼal jkot elefante. ¡Nopo noʼox avaʼi kʼu to yepal yip chakʼ sventa tsbakʼes li yokʼe!
Ta sventa li smukʼule, li yalale xchiʼuk li stsatsale mi ta jkoʼoltastik xchiʼuk li yokʼ jun krixchanoe mi jaʼuk xkoʼolaj-o. Pe jaʼ mas toj tsots yip. «Lajelal xchiʼuk kuxlejal oy li ta yip okʼile», xi ta xal Vivlia ta sventa li kokʼtik ti uni bikʼit noʼoxe (Proverbios 18:21, NM). Jaʼ jech taje, ¿jayib van velta kaʼyojtik ti stunesoj yipal yokʼ krixchanoetik ta sventa sjutel kʼop, yalel loʼiletik ti mu meleluk sventa chopol skʼoplal xkom, ti xuʼ xcham-o li krixchanoetik ti muʼyuk smulike?
Jech noxtok, li voʼneal amigoiletike muʼyuk xa lek xil sbaik ta skoj ti toj kʼux chkʼopojike; xchiʼuk ta skoj ti xkʼakʼetik noʼoxe ep krixchanoetik lajem yoʼonton chkomik. «¿Baqʼuin to chlaj avoʼntonic ta yaqʼuel li jvocole ti chatuchʼbicun coʼnton ta sventa li acʼopique?», xi laj yal li Jobe, ti jaʼ li buchʼu la sjutbeik smul ta jecheʼ noʼox li yamigotak ta alele (Job 19:2). Li yajtsʼaklom Cristo ti Santiago sbie, laj yakʼ ta ilel ti kʼu to yepal yip sventa tsyayijesvan li kokʼtik ti mu stakʼ pajesele: «Ti cocʼtic oy ta quetique, uni biqʼuit noʼox quichʼojtic, yepal noʼox ti oy cʼusi mu albajuc ta xcʼot ta pasel yuʼune. ¡Yuʼun yepal noʼox teʼtic xuʼ ta [xkʼakʼ] ta uni juteb noʼox cʼocʼ! Jaʼ jun cʼocʼ maʼ ti cocʼtique» (Santiago 3:5, 6, Ch).
Pe ta yan-o xtoke, li kokʼtik eke oy yip sventa chakʼ kuxlejal. Li jkʼopojeltik ti tspat xchiʼuk chkʼot ta oʼontonale spojoj epal krixchanoetik ti solel oyik ta mukʼta at-oʼonton xchiʼuk ti buchʼutik tskʼan tsmil sba stukike. Li lekil beiltaseletike skoltaoj li buchʼutik tslajesik droga xchiʼuk li jmilvanejetik ta kayee sventa mu ta skeremaluk noʼox xchamik. Jech ta melel, li kʼusi chlokʼ ta ye li buchʼu tukʼe jaʼ jech kʼuchaʼal «jpets teʼ sventa cuxlejal», xchiʼuk «coʼol jech cʼu chaʼal jbej slocʼobbail mantsana meltsanbil ta oro, ti nichimtasbil ta platae» (Proverbios 15:4; 25:11).
Pe ta skotol taje, ti bu xuʼ mas lek jtunestik li kokʼtike, jaʼ ti ta jmuyubtatik li Jeova Diose, yalel batel li lekil aʼyejetik ta sventa li Ajvalilal yuʼune xchiʼuk xchanubtasel krixchanoetik ta sventa li meleletik ta Vivlia ti ep sbalile. ¿Kʼu yuʼun? Li Jesuse xi laj yale: «Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote, xchiʼuc xotquinic noxtoc li Jesucristo laj atac tale», xi (Juan 17:3; Mateo 24:14; 28:19, 20).