Li mol-meʼeletike jaʼ jun bendision sventa li kerem-tsebetike
«Acʼo me molun xa, me sac xa jol, pero mu me xacomtsanun, Dios cuʼun. Ta to me xcalbe yaʼyic cʼu xʼelan atsatsal avuʼel, xchiʼuc cʼusitic toj mucʼtic laj apas li tsʼacal olnichʼonetic liʼi, xchiʼuc li bochʼotic tsʼacal to ta xtalique.» (SALMO 71:18.)
1, 2. ¿Kʼusi skʼan chakʼ venta li yajtuneltak Dios ti oy xa sjabilalike, xchiʼuk kʼusi ta jkʼeltik batel?
JUN jkʼelvanej yajtsʼaklom Cristo ta África occidental, la svulaʼan jun mamal ermano ti tʼujbil chbat ta vinajele, xi la sjakʼbee: «¿Kʼuxa elan?», xut. «Veno, xuʼ xi xanav, xi anilaj, xi pʼit —xi la stakʼ li ermanoe, vaʼun yakal chakʼ ta ilel yaʼi li kʼusitik chale—. Jaʼ xa noʼox ti mu xuʼ xivile», xi. Li kʼusi la skʼan laj yale jaʼ ti jun yoʼonton ta skoj li kʼusitik xuʼ to spase. Li jkʼelvanej taje, ti mas xa ta 80 sjabilale, xmuyubaj tsvules ta sjol ti jech tukʼ yoʼonton xchiʼuk xmuyubaj noʼox li ermano taje.
2 Kʼalal jech chakʼ ta ilel slekil talelal kʼuchaʼal chal smantal Dios li jun krixchano ti oy xa sjabilale, chtun me tajmek yuʼun yantik ta mas tsʼakal. Pe li jabilaltike maʼuk chakʼ x-ayan jpʼijilaltik xchiʼuk yan talelaletik kʼuchaʼal yajtsʼaklom Cristo (Eclesiastés 4:13). Li Vivliae xi chale: «Li bochʼo tucʼ yoʼntone jal chcuxi; cʼalal sac xa sjol yuʼun smalubele jaʼ scorona cʼotem», xi (Proverbios 16:31). Mi oy xa ajabilal li voʼote, ¿mi chavakʼ venta ti kʼusitik lek chkʼot ta pasel avuʼun ta stojolal yantik ta skoj li kʼusitik chaval xchiʼuk cha pase? Jkʼeltik jayibuk skʼelobiltak ta Vivlia ti chakʼ ta ilel kʼu to yepal kʼotemik kʼuchaʼal lekil bendision sventa kerem-tsebetik li mol-meʼeletike.
Xchʼunel oʼontonal ti jalij sbalile
3. ¿Kʼusi kʼotem ta pasel ta jtojolaltik avi ta skoj li xchʼunel yoʼonton Noee?
3 Li xchʼunel yoʼonton xchiʼuk ti kuch yuʼun li Noee oy sbalil ti vulem kʼalal to ta jkʼakʼaliltike. Li Noee yichʼoj xaʼox van 600 jabil kʼalal la spas li arkae, la stikʼ li chonbolometik tee xchiʼuk ti la xcholbe mantal li slakʼnatake (Génesis 7:6; 2 Pedro 2:5). Koliyal ti laj yichʼ ta mukʼ Diose, kuxul echʼ xchiʼuk yutsʼ yalal li ta Nojelal ta voʼe, jaʼ jech kʼotem ta jmoltotik li buchʼutik kuxulutik ta Balumil avie. Melel onoʼox ti mas toʼox jal chkuxiik li kʼakʼal taje. Akʼo mi jech, li Noee tukʼ laj yakʼ-o sba kʼalal mol xaʼox tajmeke, jaʼ yuʼun ep bendision yakʼoj tal. ¿Kʼusitik bendisional taje?
4. ¿Kʼusi lekilal staoj li yajtuneltak Dios ta jkʼakʼaliltik ta skoj ti kuch tal yuʼun li Noee?
4 Li Noee jutuk xaʼox van mu sta 800 sjabilal kʼalal lik spas li tayal kʼelob osil ta Babel li Nimrode, ti la skontrain li kʼusi laj yal Jeova ti akʼo «[s]nojesic li banamile» (Génesis 9:1; 11:1-9). Ta skoj ti muʼyuk la stikʼ sba Noé li ta toybail taje, muʼyuk van bu jel skʼop ti kʼalal jelbat skʼop li xchiʼiltake. Li xchʼunel yoʼonton xchiʼuk ti kuch yuʼun li Noee —maʼuk noʼox ti kʼalal malubem xae, yuʼun ta sjunul snatil kuxlejal— jaʼ talelaletik ti xuʼ lek xchanik li yajtuneltak Diose, kʼusiuk sjabilalik (Hebreos 11:7).
Kʼusi chkʼot ta pasel yuʼun ta utsʼ-alalil
5, 6. 1) ¿Kʼusi mantal akʼbat yuʼun Jeova li Abraham kʼalal yichʼoj xaʼox 75 jabile? 2) ¿Kʼu yelan laj yaʼi Abraham li mantal albat yuʼun Diose?
5 Li kʼusitik chkʼot ta pasel yuʼun ta xchʼunel yoʼonton yutsʼ yalalik li buchʼutik oy xa sjabilalike, lek xvinaj ta stojolal li moltotiletik ti kuxiik kʼalal echʼem xaʼox li Noee. Li Abrahame yichʼoj xaʼox van 75 jabil kʼalal xi albat yuʼun Diose: «Comtsano avosil, avutsʼ avalaltac, xchiʼuc sna atot, yuʼun chabat te ta banamil yoʼ bu chacacʼbot avile. Ta sventa amomnichʼnabtac ta jliques jun mucʼul lum. Chacacʼbot ep bendición», x-utat (Génesis 12:1, 2).
6 Nopo avaʼi ti chalboxuk ti akʼo xa bat ta naklej ta jun balumil ti mu xavojtikine, ti chavikta ana, avamigotak, alumal xchiʼuk li kʼuxubinel chakʼbot avutsʼ avalale. Jaʼ jech mantal akʼbat maʼ li Abrahame. ¿Kʼusi la spas? «Ilocʼ batel [...] jech cʼu chaʼal iʼalbat yuʼun li Mucʼul Diose», ta sjunul xkuxlejal inaki ta karpana kʼuchaʼal jyanlum xchiʼuk kʼuchaʼal jxanvil vinik ta slumal Canaán (Génesis 12:4; Hebreos 11:8, 9). Manchuk mi albat yuʼun Jeova ti chkʼot ta «jun mucʼul lum[e]», icham kʼalal jal toʼox tajmek skʼan x-epaj li snitilultake. Kʼajomal noʼox jun skerem laj yilik li Abraham xchiʼuk Sarae, Isaac sbi, jaʼo ti kʼalal 25 xaʼox jabil yakal chanav li ta balumil ti albat ch-akʼbate (Génesis 21:2, 5). Akʼo mi jech, muʼyuk xlub li Abrahame xchiʼuk mi jaʼuk isut batel li ta Ure, li jteklum ti bu ilokʼ batele. ¡Toj lek ta chanbel xchʼunel yoʼonton xchiʼuk ti kuchʼ yuʼune!
7. Ti jech kuch yuʼun li Abrahame, ¿kʼusi ikʼot ta pasel ta stojolal li Isaque, xchiʼuk kʼusi ikʼot ta pasel ta stojolal li krixchanoetike?
7 Ta skoj ti kuch yuʼun li Abrahame oy kʼusi toj lek kʼot ta pasel ta stojolal li skereme, li Isaque, ti naki kʼuchaʼal jyanlum ta slumal Canaán ta sjunul xkuxlejal ti jalij 180 jabile. Ti jech kuch yuʼun li Isaque jaʼ ta skoj ti xchʼunoj lek li kʼusi yaloj ta melel li Diose, li xchʼunel yoʼonton taje jaʼ akʼbat yuʼun li stot smeʼ ti malubemik xae xchiʼuk ti tsatsubtasbat ta tsʼakal yuʼun Jeova ta sventa li kʼusi albate (Génesis 26:2-5). Ti jech kuch yuʼun li Isaque, toj tsots skʼoplal sventa chkʼot ta pasel li kʼusi laj yal Jeovae, ti laj yal chakʼbe jun «snitilul» li yutsʼ yalal Abrahame, ti jaʼ sventa chichʼ bendision skotol li krixchanoetike. Ta sienal xaʼox jabil ta tsʼakale, li Jesucristo ti jaʼ li bankilal ta nitilulal taje, la sjambe sbelel sventa lek chil sbaik yan velta xchiʼuk Dios xchiʼuk sventa xkuxiik sbatel osil li buchʼutik chakʼ xchʼunel yoʼontonik ta stojolale (Gálatas 3:16, Ch; Juan 3:16).
8. ¿Kʼuxi laj yakʼ ta ilel ti tsots xchʼunel yoʼonton li Jacobe, xchiʼuk kʼusi ikʼot ta pasel?
8 Li Isaac eke, la skolta Jacob sventa chchʼiesbe xchʼunel yoʼonton ti jaʼ koltaat-o ti kʼalal mol xaʼoxe. Yichʼoj xaʼox 97 jabil li Jacob kʼalal la stsal sbaik sjunul akʼobal xchiʼuk jun anjel sventa ch-akʼbat jun bendisione (Génesis 32:24-28). Kʼalal mu to chchame, ti yichʼoj xaʼox 147 jabile, laj yakʼ yip sventa chakʼbe bendision ta jujuntal li lajchaʼvoʼ xnichʼnabe (Génesis 47:28). Li albil kʼopetik ti laj yal ti te ta jtatik ta Génesis 49:1-28, kʼotemik ta pasel xchiʼuk yakal to chkʼot ta pasel avi.
9. ¿Kʼusi xuʼ xkaltik ti kʼusi chkʼot ta pasel ta yutsʼ yalalik ta skoj syijubelik ta mantal li buchʼutik oy xa sjabilalike?
9 Jamal ta kʼelel, li tukʼil yajtuneltak Dios ti mol-meʼelik xae xuʼ lek kʼusitik chkʼot ta pasel yuʼunik ta stojolal li yutsʼ yalalike. Li kʼusi yiloj talel ta xkuxlejalike, li chanubtasel ta Vivlia xchiʼuk ti jech jal kuchem tal yuʼunik li buchʼutik malubemik xae, xuʼ me lek tsots xchʼunel yoʼonton chchʼi talel yuʼunik li kerem-tsebetike (Proverbios 22:6). Li mol-meʼeletike skʼan onoʼox me tsots skʼoplal chilik ti oy kʼusitik lek xuʼ chkʼot ta pasel yuʼunik ta stojolal li yutsʼ yalalike.
Chvinaj ta stojolal yantik yajtuneltak Jeova
10. ¿Kʼusi mantal laj yal José «ta sventa li sbaquile», xchiʼuk kʼusi kʼot-o ta pasel?
10 Li mol-meʼeletik xtoke oy me kʼusitik xuʼ lek xkʼot ta pasel yuʼun ta stojolal li yermanotakik ta chʼunolajele. Kʼalal malubem xaʼox li Josee, li xnichʼon Jacobe, laj yakʼ ta ilel xchʼunel yoʼonton ta jtos ti kʼusi mu toj tsotsuk skʼoplal yileluke, pe taje oy kʼusi lek kʼot ta pasel yuʼun ta stojolal epal miyon melel yajtuneltak Jeova ti kuxiik ta tsʼakale. Yichʼoj xaʼox 110 jabil ti kʼalal «laj yal mantal cʼusi acʼo spasic ta sventa li sbaquile», ti akʼo xkuchbeik lokʼel kʼalal mi lokʼik ta Egiptoe (Hebreos 11:22; Génesis 50:25). Li mantal taje jaʼ la spatbe yoʼonton li j-israeletik ti kʼu sjalil laj yil svokolik ta mosoil kʼalal chamem xaʼox li Josee, yuʼun taje akʼbat xchʼunik ta melel ti chkʼot skʼakʼalil ti chichʼik koltaele.
11. ¿Kʼusi van laj yakʼ kʼotuk ta pasel ta stojolal Josué li mamal Moisese?
11 Jun ti buchʼu tsatsubtasbat yoʼonton ta sventa li xchʼunel yoʼonton Josee jaʼ li Moisese. Kʼalal 80 xaʼox sjabilale, la sta jun smoton, jaʼ ti la xkuchbe lokʼel ta slumal Egipto li sbakil Josee (Éxodo 13:19). Ta skʼakʼalil taje jaʼo laj yojtikin Josué, jun vinik ti mas kerem toe. Li 40 jabil itale, li Josuee ikʼot ta yajtunel Moisés (Números 11:28). Li Josuee ay xchiʼin li Moisés ta svitsal Sinaie, vaʼun te la smala jaʼ to ti kʼalal yal tal xchiʼuk li pechpech ton ti tsʼibabil-o Mantale (Éxodo 24:12-18; 32:15-17). ¡Kʼu to noʼox yepal lekil tojobtaseletik xchiʼuk pʼijilal la sta ta stojolal mamal Moisés li Josuee!
12. ¿Kʼusi lek kʼot ta pasel yuʼun Josué ta sjunul xkuxlejal ta stojolal li steklumal Israele?
12 Ti kʼu sjalil ikuxi li Josué eke, la stsatsubtasbe yoʼonton li steklumal Israele. Jueces 2:7 ta xalbutik ti «scotol li israeletique lec laj yichʼic ta mucʼ Mucʼul Dios ti cʼu yepal cʼacʼal cuxul li Josuee, xchiʼuc cʼalal cuxul li moletic ti laj yilic scotol li mucʼtic sqʼuelubiltac stsatsal la spas Mucʼul Dios ta stojol li israeletique». Pe kʼalal cham li Josué xchiʼuk li yan moletike lik tal 300 jabil ti xchibet noʼox yoʼontonik ta sventa li melel yichʼel ta mukʼ Diose xchiʼuk li yichʼel ta mukʼ yan kʼusitike, taje jalij kʼalal to ta skʼakʼalil j-alkʼop Samuel.
Li Samuele lek tukʼ la spas mantal
13. ¿Kʼuxi lek tukʼ la spas mantal li Samuele?
13 Li Vivliae muʼyuk bu chal jayib jabil yichʼoj kʼalal cham li Samuele, pe li kʼusitik chichʼ alel li ta slivroal Baʼyel yuʼun Samuele smakoj batel 102 jabil xchiʼuk jutuk mu skotoluk laj yil li kʼusitik kʼot ta pasel taje. Ta Hebreos 11:32, 33 chkiltik ti oy jchapanvanejetik xchiʼuk tukʼil j-alkʼopetik ti «lec tucʼ la spasic mantale». Jech, li Samuele la skolta jlom xchiʼiltak ti jmoj ikuxiik tale sventa mu stamik o sventa xiktaik li chopol bee (1 Samuel 7:2-4). ¿Kʼutik yelan? Veno, li stuke tukʼ yoʼonton echʼ ta stojolal Jeova ta sjunul xkuxlejal (1 Samuel 12:2-5). Muʼyuk ixiʼ ta yakʼel tsatsal tojobtasel manchuk mi jaʼ laj yalbe li ajvalile (1 Samuel 15:16-29). Jech xtok, manchuk mi mol xa xchiʼuk «sac chijan xa sjunul ti [s]jole», lek laj yakʼ kiltik ta sventa li skʼanbel vokol Dios ta stojolal yantike. Yuʼun xi laj yale: «Mu me jta jmul ta stojol [Jeova] ta sventa ti ta jquechan scʼanel vocol ta atojolique», xi laj yal ta stojolal li yermanotak ta Israele (1 Samuel 12:2, 23).
14, 15. Li mol-meʼeletik avie, ¿kʼuxi xuʼ xchanbeik stalelal Samuel li ta s-orasionike?
14 Skotol taje chakʼ ta ilel jtos ti kʼusi toj tsots skʼoplal kʼusitik xuʼ lek chkʼot ta pasel yuʼun li mol-meʼeletik ta stojolal yan yajtuneltak Jeovae. Manchuk mi chmakatik ta skoj chamel o yan kʼusitik, li buchʼutik malubemik xae xuʼ skʼanbeik vokol Dios ta stojolal yantik. Mi jaʼ jech oy ta atojolale, ¿mi chavakʼ venta kʼu to yepal tstabe sbalil tsobobbail li aorasiontake? Ta skoj ti avakʼoj xchʼunel avoʼonton ti la smal xchʼichʼel Cristoe, li voʼote lek oyot ta stojolal Jeova, xchiʼuk koliyal ti kuchem tal avuʼune, li xchʼunel avoʼontone lekubem talel mas ta skoj ti yiloj «prevae» (Santiago 1:3; 1 Pedro 1:7). Mu me xchʼay ta ajol: «Cʼalal tscʼopan Dios bochʼo tucʼ yoʼntone, oy lec stsatsal li scʼope» (Santiago 5:16).
15 Li aorasion ta sventa abtelal yuʼun Ajvalilal yuʼun Jeovae toj tsots me skʼoplal. Jlom ermanoetike tikʼilik ta chukel ta skoj ti mu stikʼ sbaik ta politikae. Yantike yiloj svokolik ta skoj pas kʼopetik, nikel, tsatsal ikʼal voʼ xchiʼuk yantik vokoliletik kʼuchaʼal taje. Jech xtok, oy buchʼutik ta jtsobobbailtik ti chilik preva xchiʼuk kontrainele (Mateo 10:35, 36). Li ermanoetik ti tsbeiltasik li chol mantale xchiʼuk li buchʼutik tskʼelik li tsobobbailetike skʼan nopolik noʼox cha kʼanbe vokol Dios ta stojolalik ek (Efesios 6:18, 19; Colosenses 4:2, 3). ¡Toj lek ti jech chavalbe skʼoplal avermanotak li ta aorasione, jech kʼuchaʼal la spas Epafrase! (Colosenses 4:12.)
Chanubtaso li jchʼieletik chtale
16, 17. ¿Kʼusi laj yichʼ alel ta Salmo 71:18, xchiʼuk kʼuxi kʼotem ta pasel?
16 Li juteb chijetik ti chbatik ta vinajele, lek xa xchapanoj li yan chijetike, ti smalaoj chkuxiik sbatel osil liʼ ta Balumile (Lucas 12:32; Juan 10:16). Taje laj yichʼ albel skʼoplal ta Salmo 71:18, ti xi chale: «Acʼo me molun xa, me sac xa jol, pero mu me xacomtsanun, Dios cuʼun. Ta to me xcalbe yaʼyic cʼu xʼelan atsatsal avuʼel, xchiʼuc cʼusitic toj mucʼtic laj apas li tsʼacal olnichʼonetic liʼi, xchiʼuc li bochʼotic tsʼacal to ta xtalique», xi. Yoʼ to mu xbatik ta vinajel sventa tsta slekilalik xchiʼuk Jesucristo li yajtsʼaklomtak ti tʼujbilik ta chʼul espiritue, lek yakʼoj ta yoʼontonik xchanubtasel komel li yan chijetike sventa tstsak mas tsots yabtelik.
17 Jech xtok li kʼusi chal Salmo 71:18 ta sventa li xchanubtasel li «bochʼotic tsʼacal to ta xtalique» xuʼ ta xichʼik albel ta stojolalik ek li yan chijetike. Li buchʼutik malubemik xae akʼbil smotonik yuʼun Jeova, jaʼ ti xuʼ chalbeik skʼoplal li buchʼutik jaʼ to chchʼamik li melel yichʼel ta mukʼ Diose (Joel 1:2, 3). Maʼuk noʼox staoj smotonik li buchʼutik malubemik xae, moʼoj, yuʼun skotol li yan chijetike staojik ek. Ta skoj taje, li yan chijetike oy ta yoʼonton chakʼbeik yojtikin li buchʼutik tskʼan chtunik ta stojolal Jeova li kʼusitik xchanojik ta Vivlia ta stojolal li buchʼutik tʼujbilike (Apocalipsis 7:9, 10).
18, 19. 1) ¿Kʼusitik toj ep sbalil xuʼ chakʼik komel li yajtuneltak Jeova ti oy xa sjabilalike? 2) ¿Kʼusi xuʼ xchʼunik ta melel li yajtsʼaklomtak Cristo ti malubemik xae?
18 Li yajtuneltak Jeova ti oy xa sjabilalike, mi jaʼ li buchʼutik chbatik ta vinajele o mi jaʼ li yan chijetike, jaʼik li buchʼutik chetʼesbutik li kʼusitik tsotsik skʼoplal kʼotemik ta pasele. Muʼyuk bu ep li buchʼutik laj yilik kʼalal laj yichʼ akʼel ta ilel ta baʼyeltik velta li «Foto-Drama de la Creación» sbie. Jlome laj yilbeik sat li ermanoetik ti tsbeiltasik li abtelale xchiʼuk ti buchʼu laj yichʼik chukel ta 1918. Li yantike laj yalik mantal ta radio yuʼun Watchtower, ti jaʼ li WBBR. Ep buchʼutik xuʼ chal kaʼitik li saʼ kʼopetik ta mukʼta chapanobbailetik ta skoj ti oyuk sderechoik ta yichʼel ta mukʼ Dios li yajrextikotak Jeovae. Yantik xtoke tsots yoʼonton laj yakʼ sbaik ta stojolal li melel yichʼel ta mukʼ Diose manchuk mi oyik ta skʼob ajvaliletik ti tsots tspasvanik ta mantale. Jech xtok, li yajtsʼaklomtak Cristo ti malubemik xae xuʼ chalik kʼuyelan jamem tal smelolal li mantale. Li Vivliae chalbutik ti akʼo jtabetik sbalil li kʼusitik ojtikinbil taje (Deuteronomio 32:7).
19 Li yajtsʼaklomtak Cristo ti oy xa sjabilalike chichʼik albel ti akʼo lekuk ta chanbel stalelalik ta stojolal li buchʼutik mas kerem-tsebik toe (Tito 2:2-4). Xuʼ van mu xavil ta ora li kʼusi chkʼot ta pasel ta stojolal yantik ti kuchem tal avuʼune, li aorasiontake xchiʼuk li tojobtaseletik chavakʼe. Li stukʼilal Noé, Abraham, José, Moisés xchiʼuk li yantike muʼyuk bu laj yilik kʼu to yepal abtej ta xkuxlejalik li buchʼutik tsʼakal to ikuxiike. Pe li xchʼunel yoʼontonik xchiʼuk ti tukʼ laj yakʼ sbaike toj tsots skʼoplal, jaʼ jech li avuʼun eke.
20. ¿Kʼusitik bendision smalaojik li buchʼutik lek tsots spatoj yoʼontonik kʼalal to ta slajebale?
20 Mi kuxul la echʼ li ta «tsots vocole» o mi laj avichʼ chaʼkuxesele, ¡kʼu to noʼox van yepal cha kʼupin li «mero [kuxlejale]»! (Mateo 24:21; 1 Timoteo 6:19.) ¡Nopo noʼox avaʼi ti kʼuyelan li kuxlejal kʼalal jaʼo yakal li Ajvalilal ta Jmil Jabil yuʼun Cristoe, kʼalal tskeremajes xchiʼuk tstsebajes krixchanoetik li Jeovae! Muʼyuk xa chkiltik kʼuyelan tsok batel li jbekʼtaltike, ti muʼyuk xa kʼu xkutike, moʼoj, yuʼun mas to lek chkaʼi jbatik jujun sob kʼalal chi jlike: oy mas kipaltik, mas lek xkiltik osil, mas xa xkaʼitik kʼoponel xchiʼuk mas xa kʼupil jbatik (Job 33:25; Isaías 35:5, 6). Li buchʼutik tstaik bendision ti chkuxiik li ta achʼ balumil yuʼun Diose kerem-tsebik onoʼox me mi ta jkoʼoltastik xchiʼuk li sbatel osil ti chtal ta stojolalike (Isaías 65:22). Jech oxal chaʼa, jkotoltik li voʼotike lekuk me tsots kʼalal to ta slajebal li spatobil koʼontontike xchiʼuk tunkutik me batel ta skotol koʼontontik ta stojolal li Jeovae. Jpat koʼontontik ti tspas skotol li kʼusitik yaloje xchiʼuk ti maʼuk noʼox tspas ti kʼuyepal jmalaojtike (Salmo 37:4; 145:16).
¿Kʼusi cha takʼ?
• ¿Kʼu yuʼun jaʼ jun bendision sventa skotol krixchanoetik ti kuch yuʼun li mamal Noee?
• ¿Kʼuxi abtej ta xkuxlejal snitilulik li xchʼunel yoʼonton moltotiletike?
• Li slekil talelal ta smalubelik José, Moisés, Josué xchiʼuk Samuele, ¿kʼuxi la stsatsubtasbe yoʼonton yantik yajtuneltak Jeova?
• ¿Kʼusitik xuʼ chakʼ komel li buchʼutik malubemik xae?
[Lokʼol ta pajina 27]
Ti kuch yuʼun li Abrahame oy kʼusitik toj lek kʼot ta pasel yuʼun ta stojolal Isaac
[Lokʼol ta pajina 28]
Li pʼijil tojobtaseletik yuʼun Moisese la spatbe yoʼonton li Josuee
[Lokʼol ta pajina 29]
Li orasion ta stojolal yantike lek kʼusitik xuʼ chkʼot ta pasel yuʼun
[Lokʼol ta pajina 30]
Kʼalal chaʼibeik skʼop tukʼil mol-meʼeletik li kerem-tsebetike tstabeik sbalil