Li Diose chakʼbe bendision Abraham xchiʼuk li yutsʼ yalale

LI Jeovae snaʼoj ti chkʼot skʼakʼalil chil svokol xchiʼuk chakʼ xkuxlejal li xNichʼon ti mas skʼanoje. Jaʼ jech onoʼox laj yakʼ ta aʼyel li albil kʼop ta Génesis 3:15, akʼo mi muʼyuk lek jamal chal. ¿Kʼusi la spas Dios sventa chakʼbe snaʼ li krixchanoetik kʼu to yepal xkʼuxul chaʼi kʼalal mi cham li xNichʼone? Li Vivliae tstakʼ kʼalal chalbutik kʼusi kʼot ta pasel kʼalal li Jeova la skʼanbe Abraham ti akʼo xakʼ ta matanal li xnichʼon ti skʼanoj tajeke, li Isaaque.

Jvules ta joltik ti Diose yalojbe ti ta stojolal snitilul Isaac chtal li albil Jpojvaneje. Li Abrahame lek xchʼunoj taje, spatoj yoʼonton ti xuʼ xchaʼkuxesbat yuʼun Dios li xnichʼon ti mi jech skʼan chile. Jech oxal, la xchʼun mantal xchiʼuk jpʼel ta yoʼonton chakʼ ta matanal li xnichʼone. Kʼalal yuʼun xaʼox jech tspase, li Jeovae la stak tal jun anjel sventa tspajes li Abrahame. Ta tsʼakale la skʼupil kʼopta ta skoj ti toj mukʼ li xchʼunel yoʼontone xchiʼuk la xchaʼalbe li kʼusi yalojbe xa onoʼoxe.

Ta tsʼakale, ayan chaʼvoʼ skerem li Isaaque, jaʼ li Esaú xchiʼuk Jacobe. Pe li buchʼu noʼox la xkʼuxubin li kʼusitik sventa mantale jaʼ li Jacobe, jaʼ yuʼun la sta bendision. Jelbat sbi yuʼun li Diose, Israel akʼbat sbi. Li ta lajchaʼvoʼ xnichʼnabtake jaʼ te ilik-o talel li nitilulaletik ta Israele. Pe ¿kʼuxi ikʼataj ta jun mukʼta lum li utsʼ-alalil taje?

Jaʼo ilik kʼalal lik yitʼixtaik José li sbankiltake. Ta skoj taje la xchonik batel ta mosoil. Li buchʼutik la smanike laj yikʼik batel ta Egipto, ti bu la snuptan tsatsal vokoliletike. Pe li Diose laj yakʼbe sbendision li kerem ti tukʼ xchiʼuk tsots yoʼontone. Jun kʼakʼale, tʼujat yuʼun faraón, li ajvalil ta Egiptoe, sventa ch-akʼbat tsots yabtel. Ta skoj taje xuʼ la skolta yutsʼ yalal kʼalal tal tsots viʼnale, yuʼun li Jacobe la stak batel jayvoʼuk xnichʼnabtak sventa chbat sman sveʼelik ta Egipto. ¿Buchʼu sventainoj li veʼlil ta Egiptoe? ¡Jaʼ stuk li Josee! Kʼalal laj xaʼox yakʼ sba ta ojtikinel ta stojolal li sbankiltake —ti solel sutesoj xa yoʼontonik li avie— la spasan ta perton xchiʼuk la stak ta ikʼel skotol li yutsʼ yalaltake. Li faraone jaʼ laj yakʼbe li osil ti bu mas leke, te epaj li utsʼ-alalile xchiʼuk epaj kʼusitik yuʼunik. Li Josee laj yaʼibe smelolal ti jaʼ jech la skʼan Jeova sventa chkʼot ta pasel li kʼusitik yaloje.

Ti kʼu to sjalil kuxi li Jacobe te naki ta Egipto xchiʼuk yutsʼ yalal. Kʼalal yuʼun xaʼox chchame laj yal ti Jpojvaneje jaʼ la jun tsatsal ajvalil xchiʼuk ti te chlik tal ta stojolal snitilulal Judae. Ta tsʼakale, li Josee laj yal ti Diose tslokʼesbe ta Egipto li yutsʼ yalal Jacobe.

(Lokʼem ta kapitulo 20 kʼalal ta 50 yuʼun Génesis xchiʼuk ta Hebreos 11:17-22.)