Ta slekil yoʼonton chchabi jeova li yajtuneltak ti mol-meʼelik xae
«Li Diose tucʼ cʼusi tspas. Mu xchʼay ta yoʼnton ti lec avabtelique, ti chacʼuxubinvanique.» (HEB. 6:10.)
1, 2. 1) Kʼalal chkiltik sak chijan xa sjol jun mol ermano ti jaʼ sventa ta jtsaktik-o lek ta mukʼe, ¿buchʼu van chvul ta joltik? 2) ¿Kʼu yelan chil Jeova li yajtsʼaklomtak Cristo ti mol-meʼelik xae?
KʼALAL chkiltik sak chijan xa sjol jun mol ermano ti jaʼ sventa ta jtsaktik-o lek ta mukʼe, yikʼaluk jaʼ chvul ta joltik ti kʼuyelan chichʼ albel skʼoplal ta slivroal Daniel li Jeova stuke. Xi chal kaʼitik li kʼusi laj yil li j-alkʼope: «Te jqʼueloj o cʼalal laj yaqʼuic lequil chotlebaletic. Te ichoti li Bochʼo mu snaʼ xlaj yoraile. Li scʼuʼe toj ven sac jech chac cʼu chaʼal tayo; li stsotsil sjole sac ta jyalel jech chac cʼu chaʼal saquil tsots», xi (Dan. 7:9).
2 Li tsots ti muʼyuk bonbile saksaktik yelan, jaʼ jech la skoʼoltasbe stsotsil sjol Dios li Daniele. Ta sventa ti kʼuyelan stsotsil sjol xchiʼuk ti xi ch-albat sbi xtoke: «Li Bochʼo mu snaʼ xlaj yoraile», ti xie, jaʼ chakʼ kaʼitik ti mu xa noʼox stakʼ atel ti kʼu sjalil kuxiem tal li Jeovae xchiʼuk ti toj echʼem xa noʼox spʼijile. Jaʼ me chkichʼtik-o tajmek ta mukʼ ti vaʼ yelan chichʼ albel skʼoplale. ¿Pe kʼu yelan chil Jeova li yajtuneltak ti mol-meʼelik xae? Xi chal li sKʼope: «Li bochʼo tucʼ yoʼntone jal chcuxi; cʼalal sac xa sjol yuʼun smalubele jaʼ scorona cʼotem», xi (Pro. 16:31). Jaʼ jech, li tukʼil yajtsʼaklomtak Cristo ti malubemik xae toj alakʼ me sba ch-ilatik yuʼun Dios. ¿Mi jech chavil ek li voʼote?
¿Kʼu yuʼun ti kʼanbilik tajmeke?
3. ¿Kʼu yuʼun jkʼanojtik tajmek li ermanoetik ti mol-meʼelik xae?
3 Li mol-meʼeletik taje, jaʼik jlom li buchʼutik ta Jtsop Jbeiltasvaneje, li buchʼutik tsvulaʼanik tsobobbailetike o ti buchʼutik jech toʼox abtejike, yantike jaʼik xtok li buchʼutik ta sjunul yoʼonton chtunik ta prekursore xchiʼuk ti buchʼutik tukʼ chtunik ta jchol mantaletik ta jtsobobbailtike. Ta melel, li voʼote xavojtikin van junuk mol ermano ti oy xa ta sjaylajunebal jabil xmuyubaj chchol li lekil aʼyeje xchiʼuk ti toj lek ta chanbel stalelal chilik li kerem-tsebetike. Li jlom ermanoetik ti mol-meʼelik xae toj tsotsik kʼusitik la sbainik xchiʼuk laj yilik nutsel ta skoj li lekil aʼyeje. Li Jeova xchiʼuk li «jʼabtel ti jun [«tukʼ», NM] yoʼnton [...], ti lec bije», toj ep chalbeik koliyal li ermanoetik ti mol-meʼelik xa ta skoj li yabtel spasojik ta sventa li Ajvalilal yuʼun Diose xchiʼuk ti yokel to tspasike (Mat. 24:45).
4. ¿Kʼu yuʼun skʼan jtsaktik ta mukʼ li yajtsʼaklomtak Cristo ti mol-meʼelik xae xchiʼuk ti jpastik orasion ta stojolalike?
4 Staik-o kʼuxubinel yuʼun yantik yajtuneltak Dios li ermanoetik taje xchiʼuk ti xichʼik tsakel ta ventae. Jech onoʼox, li Mantal la stsʼiba Moisese, te chalbe skʼoplal ti xiʼtael Jeovae xkoʼolaj skʼoplal xchiʼuk li stsakel ta mukʼ mol-meʼeletike (Lev. 19:32). Mu me jchʼay ta joltik chaʼa, ti jpastik orasion ta stojolal li tukʼil jtuneletik taje xchiʼuk ti kalbetik koliyal Jeova ta sventa li yabtel la spasik ta slekil yoʼontonike. Li jtakbol Pabloe la spas orasion ta sventa skotol li yermanotake, ta sventa li kerem-tsebetike xchiʼuk ta sventa li mol-meʼeletike (kʼelo 1 Tesalonicenses 1:2, 3).
5. ¿Kʼu yuʼun toj ep kʼusitik xuʼ jchanbetik li ermanoetik ti mol-meʼelik xae?
5 Jkotoltik li ta tsobobbaile toj ep kʼusitik xuʼ jchanbetik li mol-meʼeletike, yuʼun toj ep kʼusitik xojtikinik ta sventa li kʼusitik yiloj ta xkuxlejalike xchiʼuk ta sventa ti chchanik Vivlia ta stukike. Li ermanoetik taje, ti xchanojik ti oyuk smalael yuʼunike xchiʼuk ti xaʼibeik xa lek smelolale, toj kʼupil sba chaʼiik ta yalbel li yan jchʼieletik li kʼusitik xchanojike (Sal. 71:18). Li kerem-tsebetike skʼan me xakʼbeik yipal xchanel li kʼusi xojtikinik li mol-meʼeletike, jaʼ jech skʼan pasel kʼuchaʼal chichʼ lokʼesel voʼ ta jun poso ti ta olon xa tajmek oy yaʼlele (Pro. 20:5).
6. ¿Kʼusi stakʼ jpastik sventa xkakʼtik ta ilel ti toj ep sbalil chkiltik li mol-meʼeletike?
6 ¿Kʼusi xuʼ jpastik sventa xkakʼtik ta ilel ti toj ep sbalil chkiltik li mol-meʼeletik kʼuchaʼal chil Jeovae? Jtose jaʼ ti xkalbetik ti jkʼanojtik ta skoj li stukʼilike xchiʼuk ti tsots skʼoplal chkaʼitik li kʼusi chalike. Yan xtoke, jaʼ ti jtsakbetik ta mukʼ li tojobtasel chakʼike, mi jech ta jpastik une, jaʼ me svinajeb ti melel li kʼusi chkalbetike. Ep ti jaʼ jech la spasik ek kʼalal kerem-tsebik toʼoxe. Kʼalal tojobtasatik yuʼun junuk mol ermanoe, la stsakik ta mukʼ li tojobtasele xchiʼuk la stabeik sbalil ta sjunul xkuxlejalik.a
Svinajebtak ti jkʼanojtike
7. ¿Buchʼutik mas oy ta sbaik skʼelel li kʼusi chtun yuʼun li mol-meʼeletike?
7 Li Jeovae chal kaʼitik ti buchʼutik tsots sbainojik skʼelel li mol-meʼeletike jaʼ li yutsʼ yalalike (kʼelo 1 Timoteo 5:4, 8). Li Diose xmuyubaj ti kʼalal tspasik li kʼusi oy ta sbaik li utsʼ-alalile xchiʼuk ti jech chkʼuxubin li yutsʼ yalalik ti malubemik xa kʼuchaʼal chkʼuxubin stuk li Jeovae. Li utsʼ-alaliletik taje xuʼ me chkoltaatik yuʼun Dios xchiʼuk xuʼ me stabeik sbendision ta skoj ti chakʼbeik yipale xchiʼuk ti tstsʼik svokolike.b
8. ¿Kʼu yuʼun skʼan xat yoʼonton tsobobbail ta sventa li ermanoetik ti mol-meʼelik xae?
8 Pe li Jeovae toj lek chil xtok ti tskolta mol-meʼeletik li tsobobbaile, yuʼun oy jlom mol-meʼeletik ti maʼuk jchʼunolajel yutsʼ yalalike o ti mu skʼan xchabivanike (1 Tim. 5:3, 5, 9, 10). Jaʼ jech chakʼik ta ilel ti kʼux chaʼi sbaik ta jujuntal li ta tsobobbaile, ti skʼanoj sbaike xchiʼuk ti oy slekil yoʼontonike (1 Ped. 3:8). Li Pabloe toj lek laj yalbe skʼoplal ti kʼuyelan kʼux chkaʼi jbatik ta melel kʼalal laj yal ti «me oy svocol jchopuc li jbecʼtaltique, oy svocol chaʼay ta scotolic» (1 Cor. 12:26). Kʼalal oy kʼusi chichʼ nopel ta sventa skoltael li mol-meʼeletike, jaʼ me jech yakal ta jpastik kʼuchaʼal li beiltasel laj yal Pablo liʼe: «Tscʼan talbat chacolta abaic ta xcuchel li avocolique, yuʼun jech chachʼunbeic o smantal li Cristoe», xi (Gál. 6:2).
9. ¿Kʼusi li yikats xkuchojik batel li ermanoetik ti mol-meʼelik xae?
9 ¿Kʼusi li ikatsil xkuchojik li ermanoetik ti mol meʼelik xae? Oy buchʼutik ti ta anil xa noʼox chlubike xchiʼuk ti mu xa xuʼ chaʼiik ta spasel li kʼusitik kʼunik noʼox ta pasele, jech kʼuchaʼal ti chbat yakʼ sbaik ta kʼelel ta doktore, smeltsanel jtosuk vun, smesel na o smeltsanel veʼlil. Ta skoj ti jutuk xa ta jkʼantik veʼlil kʼalal chi jmalube, oy buchʼutik ti muʼyuk xa lek chveʼike xchiʼuk ti muʼyuk xa lek chuchʼik voʼe. Xchiʼuk yikʼaluk me xuʼ jech xkʼot ta stojolalik xtok ta sventa li mantale. Ep ti buchʼutik mu xa xilik leke xchiʼuk ti mu xa xaʼiik lek kʼoponele, tsots xa chaʼiik ta skʼelel li vune xchiʼuk ta xchikintael li kʼusitik ch-echʼ ta tsobajele. Solel chlubik ta jyalel manchuk mi jaʼ noʼox chchapan sbaik sventa chbatik ta junuk tsobajel. ¿Kʼusi xuʼ spasik li yantik sventa xkoltavanike?
Kʼuxi xuʼ jkoltatik
10. ¿Kʼusi tspasik li jkʼelvanejetik ta tsobobbail sventa xakʼbeik li kʼusitik chtun yuʼun li mol-meʼeletike?
10 Ep tsobobbailetike toj lek ta chanbel stalelalik ta sventa ti kʼuyelan chchabiik li ermanoetik ti mol-meʼelik xae. Tskoltaik ta manolajel, ta smesbel sna xchiʼuk ta spasbel sveʼelik. Jech xtok, tskoltaik ta xchanel vun, sventa xbatik ta tsobajel xchiʼuk sventa xlokʼik ta chol mantal. Ta xikʼik echʼel xtok ti bu skʼan xbatik li mol-meʼeletike. Mi mu xuʼ xlokʼ ta snaike, ta spasbeik gravar li kʼusi ch-echʼ ta tsobajele, o mi moʼoje ta skʼelik kʼuxi xuʼ xaʼi yuʼunik ta telefono. Li yajtsʼaklomtak Cristo ti tskʼelik li tsobobbailetike yakʼojbeik yipal ta skʼelel ti kʼusitik chtun yuʼun li ermanoetik ti mol-meʼelik xa ta stsobobbailike.c
11. Albo skʼoplal kaʼitik jun utsʼ-alalil ti la skoltaik jun mol ermanoe.
11 Jech xtok, skʼan me xlokʼ ta koʼontontik ta jujuntal ta skoltael li ermanoetik ti malubemik xae, ti oyuk slekil koʼontontik ta stojolalike xchiʼuk ti oyuk kʼusi xkakʼbetike. Jkʼeltik kʼusi kʼot ta pasel jun velta. Cham yajnil jun mol ermano xchiʼuk mu xa xtoj yuʼun li slokʼobil snae, yuʼun kʼajomal xa noʼox jun yuni moton takʼin tsta ta stojolal ajvalil. Li ermano xchiʼuk yajnile laj toʼox xchanubtasik ta Vivlia jun nupul-tsʼakal xchiʼuk chaʼvoʼ xchex tsebik. Ta skoj ti vaʼ yelan svokol li ermanoe, li utsʼ-alalil taje laj yikʼik ta naklej ta smukʼta naik, chaʼkʼol laj yakʼbeik. Pas ta utsʼ-alalil ek, voʼlajuneb jabil toj lek echʼ yuʼunik. Li tsebetike toj ep kʼusitik la xchanbeik ta sventa li xchʼunel yoʼontone xchiʼuk ta sventa ti kʼusitik xchanoj ta xkuxlejale, xchiʼuk li stuk eke, xpatet tajmek yoʼonton ta sventa ti xmuyubaj noʼox li utsʼ-alalil taje. Te la xchiʼinik-o ta naklej, jaʼ to ti kʼalal icham kʼalal yichʼoj xaʼox 89 jabile. Li utsʼ-alalil taje, ta xalbeik koliyal Dios, yuʼun jaʼ jun bendision laj yilik ti te la xchiʼinik ta naklej li ermanoe. Jech ta melel, li utsʼ-alalile laj xa sta mukʼ smotonik ta skoj ti la skoltaik li yermanoike (Mat. 10:42).d
12. ¿Kʼuxi xuʼ xkakʼtik ta ilel slekil koʼontontik ta stojolal li ermanoetik ti malubemik xae?
12 Yikʼaluk van mu xuʼ kuʼuntik skoltael ermanoetik kʼuchaʼal la spas li utsʼ-alalil taje, pe yikʼaluk van xuʼ kuʼuntik ta yikʼelik batel ta tsobajel o ti jcholtik mantal xchiʼukike. Xuʼ van xkikʼtik tal ta jnatik o kʼalal mi li jbat ta paxyale xkikʼtik echʼel ek. Mi ipik o mi mu xuʼ xlokʼ ta snaike, mu me xchʼay ta joltik svulaʼanelik. Kʼuk yelan, mu me xchʼay ta joltik ti jtsaktik ta mukʼe: yuʼun me jaʼ yijil krixchanoetik. Kʼalal xtojobik to ta snopele, skʼan onoʼox me jtsaktik ta venta ta skotol li kʼusi chichʼ nopel ta sventaike. Yuʼun kʼalal ta krixchanoetik ti mu xa x-abtej lek snopbenike ta to me xakʼik venta mi ta jkʼuxubintik o mi moʼoj.
Muʼyuk me chchʼay ta sjol Jeova li yabtelike
13. ¿Kʼu yuʼun skʼan oyuk ta joltik ti kʼu yelan chaʼi sbaik li ermanoetik ti malubemik xae?
13 Skʼan me oyuk ta joltik ti kʼuyelan chaʼi sbaik bakʼintik li kermanotaktik ti mol-meʼelik xae. Mu labaluk chkaʼitik ti oy bakʼintik chat yoʼontonik ta skoj ti mu xa jechuk yepal spas yuʼunik kʼuchaʼal ta skerem stsebalik toʼoxe. Jech kʼuchaʼal liʼe, jun ermana ti oy xa mas ta 50 jabil yochel ta mantale lik ipajuk, vaʼun mu xa kʼunuk chaʼi ti chbat ta tsobajeletike. Jun veltae, kʼalal la svules ta sjol ti kʼu toʼox yepal ch-abtej kʼalal prekursora regular toʼoxe, lik okʼuk. La snijan sba, vaʼun xi la sjikʼ yoʼonton laj yale: «Li avie mu xa kʼusi spas kuʼun», xi.
14. ¿Kʼuxi chpatbat yoʼonton li mol-meʼeletik yajtuneltak Jeova li kʼusi chal salmoetike?
14 Mi oy xa ajabilal li voʼote, ¿mi oy jech xavaʼi aba junuk velta? ¿Mi oy bu cha nop bakʼintik ti stenojot xa komel yaʼeluk li Jeovae? Yikʼaluk van jaʼ jech laj yaʼi sba li buchʼu la stsʼiba li Salmo 71 kʼalal mol xaʼox tajmeke, yuʼun xi la skʼanbe li Jeovae: «Mu me xabajun, yuʼun limalub xa; mu me xacomtsanun, yuʼun iʼalub xa li jbecʼtale. [...] Acʼo me molun xa, me sac xa jol, pero mu me xacomtsanun, Dios cuʼun», xi (Sal. 71:9, 18). Jamal lek jnaʼojtik ti muʼyuk x-iktae yuʼun li Jeovae, jaʼ jech muʼyuk cha yiktaot ek. Jaʼ jech xtok li Davide laj yal ta yan salmo ti spatoj tajmek yoʼonton ta stojolal Dios ti chkoltaate (kʼelo Salmo 68:19). Mi tukʼ avakʼoj aba ta stojolal li Jeovae, naʼo me ti te cha skoltaot-o skotol kʼakʼale.
15. ¿Kʼusi xuʼ spasik li mol-meʼeletik sventa xmuyubajikuk noʼoxe?
15 Te onoʼox ta sjol Jeova li kʼusi apasoj xchiʼuk li kʼusi yakal cha pas ta sventa cha kʼupil kʼoptae. «Li Diose tucʼ cʼusi tspas. Mu xchʼay ta yoʼnton ti lec avabtelique, ti chacʼuxubinvanique.» (Heb. 6:10.) Jaʼ yuʼun paso persa ta stsalel li kʼusi chopol cha nope. Mu me xa nop ti mu xa kʼusi xa tun-o ta stojolal li Jeovae. Jaʼ xa nop li kʼusitik leke, jech kʼuchaʼal li bendisionetik ataoje xchiʼuk li labal sba smukʼul spatobil avoʼontone. Li yajtsʼaklomutik Cristoe oy «cʼusi [jmalaojtik]» ti mu kʼusi xkoʼolaj-oe, ti jaʼ yaloj stuk Jeova ti chkʼot ta pasele (Jer. 29:11, 12; Hech. 17:31; 1 Tim. 6:19). Nopbo skʼoplal li spatobil avoʼonton yakʼoj Diose, akʼo persa ti kerem-tsebuk avoʼonton xavaʼie xchiʼuk mu me xchʼay ta ajol ti tsots skʼoplal ti teuk oyot ta tsobobbaile.e
16. ¿Kʼu yuʼun la snop xaʼox chikta skʼelel tsobobbail li jun ermano ti oy xa sjabilale, xchiʼuk kʼu yuʼun ti la sjel li kʼusi snopoje?
16 Jkʼelbetik skʼoplal Juan, jun jkʼelvanej ta tsobobbail ti 80 jabil yichʼoje, sjunul kʼakʼal chchabi li stukʼil ajnil ti Sara sbie ti mu xa xkʼel yuʼun sba stuke.f Oy jayvoʼ ermanaetik ti tsjel sbaik ta skʼelel li Sarae, sventa xuʼ xbat ta tsobajeletik li ermanoe xchiʼuk ti xlokʼ ta chol mantale. Pe jaʼtik to un, ta skoj ti mu xa xuʼ tajmek chaʼi li Juane, la snop ti jaʼ lek chikta skʼelel li tsobobbaile. «¿Kʼusi sbalil ti chi abtej-o ta mol ta tsobobbaile? —xi ch-okʼ laj yal—. Mu xa kʼusi jtunel ta jpas ta tsobobbail.» Li yan moletik ta tsobobbaile laj yalbeik ti akʼo snop leke, xchiʼuk laj yalbeik xtok ti akʼo mi juteb ti yabtel tspas ta tsobobbaile, toj jtunel chilik ta xchiʼinel ta abtel ta skoj ti ep kʼusitik xchanoje. Patbat tajmek yoʼonton li kʼusi albate, vaʼun li Juane la snop ti muʼyuk chikta skʼelel li tsobobbaile sventa xmuyubajik noʼox skotolik.
Toj tsots skʼoplal ch-ilatik yuʼun Jeova li mol-meʼeletike
17. ¿Kʼusi melel chal Vivlia ta sventa li yajtsʼaklomtak Cristo ti mol-meʼelik xae?
17 Li Tsʼibetike jamal chal kaʼitik ti xuʼ x-abtejik-o ta mantal li mol-meʼeletike, manchuk mi ep xa kʼusitik ip chaʼiik. Xi laj yal li jtsʼibajom yuʼun salmoe: «Tsʼunbilic ta xchʼulna Mucʼul Dios [...]. Acʼo me mol meʼelic xa, ta to satinic; lec tsotsic o, lec yoxic o», xi (Sal. 92:13, 14). Li jtakbol Pablo ti oy kʼusi ip chaʼi yaʼeluke, xi laj yale: «Mu xchibaj coʼnton[tik]. Acʼo me yantic chlaj stsatsal li jbecʼtal[tike]», xi (kʼelo 2 Corintios 4:16-18).
18. ¿Kʼu yuʼun skʼanik koltael li ermanoetik ti malubemik xae xchiʼuk li buchʼutik chchabivanike?
18 Jech ta melel, li mol-meʼeletike xuʼ to me satinik, jaʼ jech ep tspasik li avie. Pe jech onoʼox xtok un, mu me junuk buchʼu ti muʼyuk vokol chaʼi ta stsʼikel li chamele o li yantik kʼusitik ip chaʼiik ta skoj malubele, akʼo mi koltabilik yuʼun li yutsʼ yalalike. Jech xtok, xuʼ me xlubik ek li buchʼutik chchabivanike. Jaʼ yuʼun chaʼa, oy me ta sba tsobobbail xchiʼuk jaʼ me jun matanal staojik ta yichʼel ta kʼux li mol-meʼeletike xchiʼuk li buchʼutik chchabivanike (Gál. 6:10). Mu me xiuk noʼox xkalbetike: «Mu me xalaj ta sic, xchiʼuc te bu chata batel aveʼel», mu me xi jchi, moʼoj, yuʼun jkoltatik ti bu kʼalal xuʼ kuʼuntike (Sant. 2:15-17).
19. ¿Kʼu yuʼun xuʼ xpatet noʼox yoʼontonik xuʼ nopbeik skʼoplal li kʼusi chkʼot ta pasel ta mas tsʼakal li tukʼil yajtsʼaklomtak Cristo ti mol-meʼelik xae?
19 Akʼo mi jech ti chjutukaj yabtel ta stojolal Dios li yajtsʼaklomtak Cristo ti ep xa sjabilalike, pe muʼyuk me bu chjutukaj ti skʼanoj yajtuneltak li Jeova ti tukʼ yoʼontonike, akʼo mi x-echʼ batel ti kʼakʼaletike. Chkʼuxubin tajmek li yajtuneltak ti tukʼike xchiʼuk muʼyuk me bu tsten komel (Sal. 37:28; Isa. 46:4). Ta melel, muʼyuk me bu chakʼ lomuk li yajtuneltak ti mol-meʼelik xae xchiʼuk ta sbeiltasan-o skotol kʼakʼal (Sal. 48:14).
[Tsʼibetik ta yok vun]
a Kʼelo li xchanobil «Li mol-meʼeletike jaʼ jun bendision sventa li kerem-tsebetike», ti lokʼ ta Li Jkʼel osil ta toyol ta 1 yuʼun junio ta 2007.
b Kʼelo li revista ¡Despertad!, ta 8 yuʼun febrero ta 1994 ta paj. 3-10.
c Li ta jlom lumetike xuʼ jkoltatik ta skʼanbel ajvalil li koltael chakʼbe mol-meʼeletike. Kʼelo li mantal «Dios se interesa por los mayores», ti lokʼ ta La Atalaya 1 yuʼun junio ta 2006.
d Kʼelo li xchanobil «Jehová siempre nos cuida», ta La Atalaya 1 yuʼun septiembre ta 2003.
e Kʼelo li mantal «El esplendor de la canicie», ti lokʼ ta La Atalaya 15 yuʼun marso ta 1993.
f Jelbil li biiletike.
¿Kʼusi cha takʼ?
• ¿Kʼu yuʼun kʼanbilik tajmek li mol-meʼeletike?
• ¿Kʼuxi xuʼ xkakʼtik ta ilel ti jkʼanojtik li jchiʼiltaktik ti mol-meʼelik xae?
• ¿Kʼusi ti xuʼ xmuyubajik-o li yajtsʼaklomtak Cristo ti mol-meʼelik xae?
[Lokʼol ta pajina 18]
Skotolik li buchʼutik ta tsobobbaile ta xichʼik ta kʼux li mol-meʼeletike
[Lokʼol ta pajina 20]