Xi jmuyubajutik ta sventa ti kuch yuʼun xchiʼuk li chʼiom chije
TA 1971, Carey W. Barber la stsʼiba jlik karta ti te tsnopbe skʼoplal li baʼyel 50 jabil itun ta stojolal li melel Diose: «Li jabiletik li tun ta stojolal Jeovae toj echʼ noʼox labal sba laj kaʼi. Li xchiʼinel ta abtel steklumale, li pojel ta stojolal li buchʼutik chopol ta slumal li Satanase, ti xuʼ chkuch kuʼun xchiʼuk li chʼiom chij Jesucristoe, xchiʼuk li sprevail ti skʼanojutik li Jeovae te me tskap sbaik sventa chakʼ li xkuxetel oʼontonale ti jaʼ chchabi xchiʼuk chakʼ spatobil koʼontontik ti chkuch kuʼuntik kʼalal to ta slajebale».
Vakib jabil ta mas tsʼakale, li ermano Barber —ti tʼujbil chbat ta vinajele— kʼot ta Jtsop Jbeiltasvanej yuʼun yajRextikotak Jeova, li 30 jabil ti abtej toe la skʼan ta sjunul yoʼonton ti chkuch yuʼun xchiʼuk li chʼiom chije. La sta kʼalal tukʼ laj yakʼ-o sba kʼalal icham ta domingo 8 yuʼun abril ta 2007, kʼalal 101 jabil yichʼoje (1 Corintios 15:57).
Li Carey Barbere vokʼ ta Inglaterra ta 1905 xchiʼuk laj yichʼ voʼ ta Winnipeg (Canadá) ta 1921. Chib jabil ta mas tsʼakale, li Barber xchiʼuk Norman, ti vachike, batik ta Brooklyn (Nueva York) sventa chkoltavanik ta jun abtel. Ti vaʼ kʼakʼal taje, li slumal Jeovae jaʼo xa chlik slokʼes slivro stukik sventa chichʼ cholel batel li lekil aʼyej ta sventa li Ajvalilal yuʼun Dios «ta sbejel banamil[e]» (Mateo 24:14). Li baʼyel yabtel la sta li ermano Barbere jaʼ ta spikel jun bikʼit makina ti jaʼ ta slokʼes vunetik sventa chapanobbail o yan kʼusitik ti jaʼ chichʼ ichʼel batel ta stojolal Tribunal Supremo (Mukʼta nail Chanpanobbail) ta Estados Unidos. Ta tsʼakale, abtej ta Departamento de Servicio, ti bu laj yakʼ yip skʼelel li kʼusitik ta sventa li tsobobbaile xchiʼuk ta sventa li abtelal ta chol mantal ta sjunul mukʼta lume.
Ta skoj ti lek xa chaneme, li ermano Barbere lek xa chapal ta sventa li yabtel laj yichʼ akʼbel ta 1948 ta jkʼelvanej ta tsobobbaile. Ta skoj li yabtele, la svulaʼanan mukʼta tsobajeletik xchiʼuk skotol li tsobobbailetik ti oy ta smaleb kʼakʼal ta Estados Unidose. Laj yal ti kʼusi toj mas lek la skʼupine jaʼ li xcholel mantal kʼalal sikiket osile. Li yabtel laj yichʼe koltaat ta yojtikinel epal ermanoetik. Li spʼijil nopben xchiʼuk ti sjunul yoʼonton ta xchol mantale tun yuʼun kʼalal ibat ta Chanob vun sventa Vivlia ta Galaad yuʼun Watchtower numero 26. Ti kʼu sjalil laj yichʼ chanubtasele laj yojtikin jun ermana ti jaʼ xchiʼil ta chanun ti likem ta Canadá ti jaʼ sbi Sydney Lee Brewer. Kʼalal lokʼik ta chanune laj yikʼ sbaik, li bu ayik ta paxyal kʼalal inupunik xaʼoxe jaʼ noʼox ti kʼu sjalil xanavik batel ta Nueva York kʼalal ta Chicago (Illinois), ti bu jaʼ tsvulaʼanik li tsobajeletike. Li ermana Barber jaʼ jun lekil ajnilal echʼ xchiʼuk la skolta-o batel smalal ti jtob jabil itunik kʼuchaʼal jkʼelvanej ta sirkuitoe.
Li buchʼutik laj yojtikinik li ermano Barber ti kʼu sjalil och ta jkʼelvanej ta sirkuito xchiʼuk ta distritoe, o kʼalal abtej 30 jabil xchiʼuk ti lokʼ ta xanbal kʼalal ch-abtej xaʼox xchiʼuk li Jtsop Jbeiltasvaneje, te chvulilan-o ta sjolik ta skoj li mantal laj yakʼe xchiʼuk li sloʼiltak ti tspat oʼontonale. Oy ep srasonal kuʼuntik sventa xi jmuyubajutik ta sventa ti kuch yuʼun xchiʼuk li chʼiom chije.