Kʼalal chichʼik lilinel kʼuchaʼal trigo li yajtsʼaklomtak Cristoe
KʼALAL jutuk xaʼox skʼan xcham li Jesuse, xi la spʼijubtas li yajchankʼoptake: «Aʼyio avaʼi, [...] ti pucuje laj xa scʼan ti acʼo avichʼic lilinel jech cʼu chaʼal ta xichʼ icʼael ti trigoe», xi (Luc. 22:31, Ch). ¿Kʼusi la skʼan laj yal taje?
Li ta skʼakʼalil Jesuse, ep abtel xchiʼuk ep kʼakʼal yichʼoj li stsobel trigoe. Baʼyel, li j-abteletike tskʼajik xchiʼuk tstsobik li trigoe. Te une, tsmajik ta sba li kʼusi lek tsotse o tstunesik jtos kʼusi ti jochbil ta vakax sventa chvochʼbe li steʼele, ti jaʼ jech chchʼakbe lokʼel li spate xchiʼuk li sbekʼe. Vaʼun tstenik muyel li trigo sventa chbat ta ikʼ li spate. Ta slajeb une, tslilinik ta jun xchijobil sventa chchijbeik lokʼel li skʼaʼepale.
Jech kʼuchaʼal laj yal Jesuse, li Satanase muʼyuk xkʼuxul yoʼonton laj yilbajin li jchʼunolajeletik ta baʼyel sigloe xchiʼuk jech-o tspas li avie (Efe. 6:11). Melel onoʼox ti mu skotoluk jaʼ ta smul Satanás li vokolil ta jnuptantike (Ecl. 9:11). Akʼo mi jech, oy tajmek ta yoʼonton ti jtentik komel li stukʼil koʼontontike, sventa chkʼot ta pasel yuʼune tstunes skotol li kʼusitik xuʼ chile. Jech kʼuchaʼal liʼe, xuʼ van chakʼ ta koʼontontik saʼel kʼulejal, stʼujel chʼayob oʼontonal ti chopole o ti xi jmulivajutike. Jech xtok, xuʼ van tstunes jchiʼiltik ta chanun o ta kabteltik xchiʼuk kutsʼ kalaltik ti maʼuk jchʼunolajeletik sventa tsujutik ta xchʼamel skotol li kʼusitik chakʼ balumil ta sventa chanun xchiʼuk ta sventa abtelale. Jech noxtok, xuʼ tstunes kontrainel sventa xkiktatik ta xchʼunel li mantale. Ta melel, taje jaʼtik noʼox jlom li kʼusitik xuʼ tstunes Satanás sventa tslilinutike.
¿Kʼuxi xuʼ xkuch kuʼuntik li kontrainel chakʼ jtsatsal kontratike? Li Satanase jaʼ mas tsots sjuʼel, jech oxal, mu stsal kuʼuntik ta kip jtuktik. Pe li Jeovae mu albajuk li sjuʼele, jaʼ mu sta li Diabloe. Jech oxal chaʼa, jpat sjunul koʼontontik ta stojolal li jDiostike. Jkʼanbetik jpʼijiltik xchiʼuk stsatsal koʼontontik sventa xkuch kuʼuntik xchiʼuk jchʼuntik skotol li beiltasel chakʼbutike. Jaʼ chakʼbutik jtsatsaltik sventa xkuch kuʼuntik li yabtejebtak kajkontratike (Sal. 25:4, 5).
Kʼalal chkiltik prevae, skʼan pʼijukutik sventa «cʼun xa ta tʼujel [chkaʼitik] li cʼusi leque xchiʼuc li cʼusi chopole», yuʼun me jaʼ noʼox jech mu sloʼlautik li Satanase (Heb. 5:13, 14). Koliyal li koltael chakʼ Jeovae xuʼ jchʼiestik li pʼijilal taje xchiʼuk xuʼ ta jnoptik lek li kʼusi ta jpastike. Kʼalal mi laj xaʼox jnoptik lek li kʼusi ta jpastike, skʼan me jech ta jpastik un manchuk mi oy kʼusi vokol xkʼot ta pasel. Mi ta jchʼuntik li beiltasel yuʼun Jeovae, muʼyuk me tsjalan sba sventa tskoltautik ta skoj ti jech oy ta koʼontontik spasel li kʼusi leke (Efe. 6:10).
Li Satanase chakʼ me persa sventa tslilinutik kʼuchaʼal trigo. Pe li Jeovae chakʼ jtsatsaltik sventa xkuch kuʼuntik li kʼusitik tspasbutike xchiʼuk ti tsotsuk-o li xchʼunel koʼontontike (1 Ped. 5:9). Xi jpʼel skʼoplal chalbutik li sKʼop Jeovae: «Contrainic li pucuje, jech chjatov loqʼuel ta atojolic», xi (Sant. 4:7).