Xanavkutik ta sbe li Jeovae
«Xcuxet noʼox yoʼnton li bochʼo lec yichʼoj ta mucʼ Mucʼul Diose, ti jaʼ te chanov o ta lequil be yuʼune.» (SAL. 128:1.)
1, 2. ¿Kʼu yuʼun jpatoj tajmek koʼontontik ti xuʼ xi jmuyubaje?
MUYUBAJEL. ¿Buchʼu mu skʼan taje? Veno, jnaʼoj jkotoltik ti mu xkoʼolaj ti chkal ta jkʼantik xchiʼuk ti ta jsaʼtik li muyubajele, xchiʼuk ti ta jtatike.
2 Akʼo mi jech, li Salmo 128:1 chalbutik ta melel ti xuʼ jtatik li muyubajel kʼalal chalbutik ti «xcuxet noʼox yoʼnton li bochʼo lec yichʼoj ta mucʼ Mucʼul Diose» xchiʼuk ti «chanov o ta lequil be yuʼune». Li kʼusi tsots skʼoplal skʼan jpatike chaʼa, jaʼ ti xkichʼtik ta mukʼ o jxiʼtatik li Diose xchiʼuk ti xi jxanav ta sbee, jaʼ xkaltik, ti jpastik li kʼusi tskʼane. Taje te chvinaj ta jtalelaltik. ¿Kʼu yelan?
Kakʼtik ta ilel ti xuʼ spat yoʼontonik ta jtojolaltike
3. ¿Kʼuxi ti mas lek chkakʼbetik yil Dios ti xuʼ spat yoʼonton ta jtojolaltike?
3 Li buchʼutik chiʼtaik Jeovae jaʼ jechik kʼuchaʼal stuke: xuʼ tspat yoʼontonik ta stojolalik. Li Jeovae kʼot ta pasel yuʼun skotol li kʼusitik laj yalbe li Israel ta voʼnee (1 Rey. 8:56). Li kʼusi mas tsots skʼoplal ta skotol ti chkalbetik ta melel Jeovae, jaʼ ti chkakʼ jbatik ta stojolale, sventa chkʼot ta pasel kuʼuntik taje skʼan nopolik noʼox jkʼopontik. Jchanbetik li jkʼejimol David ti xi laj yalbe Diose: «Li voʼote, Dios cuʼun, laj avaʼibun li cʼusitic laj cal ta atojole; [...] ta xcal alequilal scotol cʼacʼal; jaʼ jech ta jtoj o ta jujun cʼacʼal li cʼusi caloj ta atojole», xi (Sal. 61:5, 8; Ecl. 5:4-6). Sventa xkamigointik li Diose, skʼan me xilik ti xuʼ spat yoʼontonik ta jtojolaltike.
4. ¿Kʼu yelan laj yichʼ ta mukʼ Jefté xchiʼuk stseb li kʼusi yalojbe xaʼox ta melel Jeovae?
4 Li ta skʼakʼalil jchapanvanejetik ta Israele, oy kʼusi laj yalbe ta melel Dios li Jeftee: mi chkoltaat yuʼun Jeova ta stsalel li j-amonetike, chchikʼbe «[s]motonin» li buchʼu baʼyel chlokʼ nupatuk ta be kʼalal mi sut tal ta pas kʼope. Pe bu ta cha ta, jaʼ lokʼ nupvanuk ta be li jun noʼox stsebe. Akʼo mi jech, xchaʼvoʼalik laj yakʼik ta ilel xchʼunel yoʼontonik ta stojolal Jeova: la spas li kʼusi laj yal Jeftee xchiʼuk la skolta sba ek li stsebe. Manchuk mi toj alakʼ sba matanal ilbil ta Israel li nupunel xchiʼuk li alab-nichʼnabile, li stseb Jeftee laj yakʼ ta yoʼonton ti muʼyuk ta xmalije xchiʼuk jaʼ jech la sta li smoton ti chtun ta xchʼulna Jeova pasbil ta nukule (Jue. 11:28-40).
5. ¿Kʼuxi laj yakʼ ta ilel Ana ti xuʼ spat yoʼontonik ta stojolale?
5 Li Ana ti xiʼtaoj Diose, laj yakʼ ta ilel ek ti xuʼ spat yoʼontonik ta stojolale. Li ants taje te nakal ta teʼtikal vitstik yuʼun Efraín xchiʼuk smalal, li jlevi Elcanae, xchiʼuk Penina, ti jaʼ yan yajnil Elcanae. Ta skoj ti oy jayvoʼuk yalab li Peninae, tsnaʼle li Ana ti mu snaʼ x-alaje, mas to ti kʼalal jaʼo chbatik ta chʼulna pasbil ta nukule. Jun velta kʼalal batik tee, oy kʼusi laj yalbe ta melel Jeova li Anae: laj yalbe ti mi ch-akʼbat jun yole, chakʼbe sventa chtun ta stojolal li Jeovae. Mu ta sjaliluk une, kom yol, vaʼun la svokʼes jun kerem ti Samuel laj yakʼbe sbie. Kʼalal la spojbe xchuʼ li uni kereme, laj yakʼ ta stojolal Jeova ta Siló xchiʼuk te laj yikta sventa xtun-o ta stojolal «ti jayib cʼacʼal cuxule» (1 Sam. 1:11). Jaʼ jech kʼot ta pasel yuʼun Ana li kʼusi yaloj ta melele, akʼo mi mu toʼox snaʼ mi chil to yalab ta tsʼakal (1 Sam. 2:20, 21).
6. ¿Kʼuxi laj yakʼ ta ilel Tíquico ti xuʼ spat yoʼontonik ta stojolale?
6 Li Tíquico ti kuxi ta baʼyel sigloe, jaʼ jun yajchankʼop Cristo echʼ ti la spat yoʼontonik ta stojolale, «ti jun yoʼnton ch-abteje» (Col. 4:7). La xchiʼin ta xanbal jtakbol Pablo ti lik ta Grecia kʼalal ta Asia Menore, echʼik ta Macedonia xchiʼuk oyikʼal van la xchiʼin kʼalal to ta Jerusalén (Hech. 20:2-4). Jaʼ van li ermano ti la skolta Tito sventa tspukbeik matanal li yajchankʼoptak Cristo ta Judea ti laj yil svokolike (2 Cor. 8:18, 19; 12:18). Kʼalal laj yichʼ chukel ta sba velta ta Roma li Pabloe, laj yakʼbe sbain Tíquico ta yichʼel batel li kartaetik sventa tsobobbailetik ta Éfeso xchiʼuk ta Colosase (Efe. 6:21, 22; Col. 4:8, 9). Kʼalal jaʼo te chukul ta xchibal velta ta Roma li Pabloe, la stak batel ta Éfeso (2 Tim. 4:12). Mi jaʼ jech chkakʼtik ta ilel ti xuʼ spat yoʼontonik ta jtojolaltik eke, ta me jkʼupintik ep abtelaletik ta sventa Jeova.
7, 8. ¿Kʼu yuʼun xuʼ xkaltik ti jaʼ yamigo sbaik ta melel li David xchiʼuk Jonatane?
7 Li Diose tskʼan ti tukʼuk me koʼontontik ta stojolal li kamigotaktike (Pro. 17:17). Li xnichʼon Saúl ti Jonatán sbie, lek tajmek la yamigoin sbaik xchiʼuk li Davide. Kʼalal laj yaʼi ti la smil Goliat li kereme, «li Jonatane lic spas ta coʼol yoʼnton xchiʼuc li Davide. Toj lec la scʼan jech chac cʼu chaʼal cʼux ta yoʼnton sbecʼtal stuc» (1 Sam. 18:1, 3). Jaʼ Jonatán ti laj yalbe David ti tskʼan chmilat yuʼun Saule, vaʼun kʼalal jatav li Davide, la stsob sbaik sventa tspasik jun trato. Ta tsʼakale, la spakbe skʼoplal David ta stojolal stot li Jonatane, jutuk xa mu jaʼuk milat-o. Akʼo mi jech, bat saʼ yan velta li yamigo sventa chakʼbe yil ti lek xkʼuxubinoj sbaike (1 Sam. 20:24-41). Kʼalal ta slajeb xa velta laj yil sbaike, jaʼo la «stsatsubtasbe yoʼnton ta sventa Dios» (1 Sam. 23:16-18).
8 Cham ta jun pas kʼop ta stojolal jfilistaetik li Jonatane (1 Sam. 31:6). Chat tajmek yoʼonton David kʼalal xi la skʼejintae: «Jonatán, toj ep chcat coʼnton avuʼun, yuʼun toj lec jcʼopan jbatic, toj lec chavilun. Echʼem to jech laj acʼanun, jech chac cʼu chaʼal chcʼanvan antsetic», xi (2 Sam. 1:26). Li kʼanel taje, jaʼ ti lek yichʼoj sbaik ta kʼux kʼuchaʼal yermano sbaike, maʼuk jun kʼanel kʼuchaʼal tskʼupin sbaik jun vinik xchiʼuk jun ants. Jech, jaʼ yamigo sbaik ta melel li David xchiʼuk Jonatane.
«Biqʼuit me» xkakʼ jbatik
9. ¿Kʼu yelan chakʼ ta ilel li kapitulo 9 yuʼun Jueces ti tsots skʼoplal ti bikʼit xkakʼ jbatike?
9 Sventa xkamigointik li Diose, skʼan «biqʼuit» xkakʼ jbatik (1 Ped. 3:8; Sal. 138:6). Li ta kapitulo 9 yuʼun Jueces chakʼ ta ilel ti tsots skʼoplal ti bikʼituk xkakʼ jbatike. Te ta jtatik jun lokʼolkʼop ti laj yal Jotán xnichʼon Gedeone. Xi chlik li loʼile: «Oy jun velta la stʼujic ajvalil yuʼun stuquic li teʼetique», xi. Li steʼel oliva, igo xchiʼuk tsʼusube, jaʼ skʼoplal krixchanoetik ti lek ichʼbilik ta mukʼ ti muʼyuk la saʼ tsventainik li xchiʼiltakik ta Israele. Yan li chʼixe —ti jaʼ noʼox chtun ta siʼe— jaʼ skʼoplal li ajvalilal yuʼun jun jmilvanej ti la xpichʼ-oʼonta juʼelale: jaʼ li jtoyba Abimeleque. Li vinik taje, ajvalil laj yaʼi sba, «oxib jabil la sventain li israeletique», pe ta slajeb une toj chopol kʼuyelan icham (Jue. 9:8-15, 22, 50-54). ¿Mi mu meleluk ti jaʼ mas lek ti «biqʼuit [chkakʼ] jbatike»?
10. ¿Kʼusi ta jchantik ti muʼyuk xakʼ «ta ichʼel ta mucʼ [Dios]» li Herodese?
10 Li ta baʼyel siglo ta jkʼakʼaliltike lik kʼop yuʼunik li jtoyba ajvalil ta Judea Herodes Agripa xchiʼuk li jnaklejetik ta Tiro xchiʼuk ta Sidone. La xchap skʼopik sventa jun yoʼontonik, vaʼun li Herodese laj yetʼes jun mantal ta stojolal skotol li krixchanoetike. Jech ek li krixchanoetik ti te stsoboj sbaike lik skʼupil kʼoptaik, xi avanike: «Jaʼ dios ti liʼ chcʼopoje, muc cristianouc», xiik. Ta skoj ti muʼyuk la spʼaj li kʼupil kʼoptaele xchiʼuk ti «muc jaʼuc laj yacʼ ta ichʼel ta mucʼ li Diose», yayijesat yuʼun jun yaj-anjel Jeova xchiʼuk toj xibal sba icham (Hech. 12:20-23). ¿Kʼusi xuʼ xkaltik ta jtojolaltik mi lek xi jtojob ta yetʼesel mantale o mi lek xi jtojob xi jchanubtasvan ta Vivliae? Jaʼuk xkakʼtik ta ichʼel ta mukʼ Dios ta sventa li kʼusi chakʼ jpastike (1 Cor. 4:6, 7; Sant. 4:6).
Oyuk me kipaltik xchiʼuk stsatsal koʼontontik
11, 12. ¿Kʼuxi chakʼ kiltik ta stojolal Enoc ti chakʼ kipaltik xchiʼuk stsatsal koʼontontik li Jeovae?
11 Mi bikʼit chkakʼ jbatik chi jxanavutik ta sbe Jeovae, jaʼ me chakʼ kipaltik xchiʼuk stsatsal koʼontontik (Deu. 31:6-8, 23). Li Enoc ti jaʼ svukkʼolal xa smomnichʼon Adane, tsots yoʼonton ixanav xchiʼuk Dios xchiʼuk tukʼ stalelal ta stojolal li xchopol chiʼiltak kʼalal ikuxie (Gén. 5:21-24). Akʼbat stsatsal yoʼonton yuʼun Jeova sventa chal li tsatsal chapanel chakʼ Dios ta skoj li kʼusitik chopol chalik xchiʼuk tspasike (kʼelo Judas 14, 15). ¿Mi jaʼ jech tsots koʼontontik ta yalel ek li chapanel chakʼ Diose?
12 Li chapanel chakʼ Dios ti laj yichʼ albel li chopol krixchanoetik taje ikʼot ta pasel kʼalal ital li Nojelal ta voʼe. Jaʼ yuʼun tstsatsubtas koʼontontik avi li kʼusi laj yal Enoque, yuʼun li chopol krixchanoetik ti oy ta jpat jxokontike poʼot xa xichʼik lajesel yuʼun li chʼul anjeletik yuʼun Dios ti ta slajunmilal noʼoxe (Apo. 16:14-16; 19:11-16). Li Jeovae tstakʼ li j-orasiontike, yuʼun chakʼ jtsatsaltik sventa chkaltik li yaʼyejtake, akʼo mi jaʼ sventa chapanel o mi jaʼ sventa spatobil oʼontonal ti chakʼ li Ajvalilal yuʼun Diose xchiʼuk li bendisionetik chakʼ tale.
13. ¿Kʼuxi yakʼoj ta ilel Dios ti tspat koʼontontik xchiʼuk ti chakʼ kipaltik kʼalal ta jnuptantik vokolile?
13 Kʼalal chkat koʼontontik ta skoj vokoliletike mas to me chtun kuʼuntik li koltael xchiʼuk li tsatsal oʼontonal chakʼ Jeovae. Jnopbetik skʼoplal li Isaac xchiʼuk Rebecae. Kʼalal inupun xchiʼuk chaʼvoʼ j-hitita antsetik li Esaue, li «antsetic leʼe tsots laj yacʼbeic svocol li Isaac xchiʼuc Rebecae». Xi laj yat yoʼonton li Rebecae: «Mu xa xcuch cuʼun chcaʼay ta sventa cʼusi tspasic li hitita antsetic ti laj yicʼ li Esaue. Ti me jaʼ ta xicʼ junuc hitita ants ec li Jacob ti liʼ nacalic ta Canaane, jaʼ lec acʼo chamcun», xi (Gén. 26:34, 35; 27:46). Li Isaaque laj yichʼ ta mukʼ taje, vaʼun nom la stak batel li Jacob sventa xbat saʼ yajnil ta stojolal li buchʼutik jaʼ yajtuneltak Jeovae. Manchuk mi mu xa kʼuxutik li kʼusi la spas Esaue, akʼbat spʼijilik, yipalik xchiʼuk stsatsal yoʼontonik yuʼun Jeova sventa tukʼ-o chakʼ sbaik. Jaʼ me jech tspas ta jtojolaltik ek mi ta jkʼanbetike (Sal. 118:5).
14. ¿Kʼuxi laj yakʼ ta ilel stsatsal yoʼonton jun uni j-israel tseb?
14 Ep siglo ta tsʼakal, jun uni j-israel tsebe chukat batel yuʼun jtsop j-elekʼetik, vaʼun kʼot ta kiara ta sna bankilal soltaro Naamán ta Siria, ti tsakbil ta kʼaʼemal chamele. Ta skoj ti snaʼoj li skʼelobiltak juʼelal tspas Dios ta stojolal li j-alkʼop Eliseoe, la stsak yip yoʼonton sventa chalbe yajnil Naamán ti mi chbat ta Israel li Naamane, ta xpoxtaat yuʼun li j-alkʼop yuʼun Jeovae. Bat ta Israel li vinike, vaʼun ikol li ta skʼaʼemal chamele (2 Rey. 5:1-3). Toj lek xuʼ xchanbeik stalelal li uni tseb li kerem-tsebetik ti tskʼanbeik Jeova ti akʼo x-akʼbat stsatsal yoʼontonik sventa chcholbeik mantal li smaestroike, li xchiʼiltakik ta chanune xchiʼuk li yan krixchanoetike.
15. ¿Kʼusi tsots yoʼonton la spas Abdías li jchabiej na yuʼun Acabe?
15 Jech xtok, li stsatsal koʼonton chakʼbutik Diose tskoltautik sventa chkuch kuʼuntik li kontrainele. Jnopbetik skʼoplal li Abdías ti jaʼ jchabiej na yuʼun li ajvalil Acabe xchiʼuk ti kuxi ta skʼakʼalil Eliase. Kʼalal laj yal mantal li meʼ ajvalil Jezabel ti akʼo xichʼ lajesel li yaj-alkʼoptak Diose, li Abdiase la snakʼ 100 ta voʼ, «ta lajlajuneb yoxvinic (50) [...] ta jujun nailchʼen» la snakʼ (1 Rey. 18:13; 19:18). ¿Mi jech van tsots koʼonton ta jpojtik li kermanotaktik ta yorail kontrainele?
16, 17. ¿Kʼu yelan laj yilik kontrainel li Aristarco xchiʼuk Gayoe?
16 Mi oy chkichʼtik kontrainel junuk veltae, xuʼ jpat koʼontontik ti muʼyuk chiktautik li Jeovae (Rom. 8:35-39). Jnoptik ta stojolal li Aristarco xchiʼuk Gayoe, ti jaʼ xchiʼiltak ta abtel Pablo ti ta sienal noʼox o ta smilal noʼox van krixchanoetik ikontrainatik te ta akʼob elov ta Efesoe. Ta sventa li chol mantal tspas Pabloe, li epal krixchanoetik ta jteklume yakal chiktaik li yichʼel ta mukʼ kʼusitike. Li buchʼutik chabtelanik sakil takʼine, ti tspasbeik slokʼoltak sna ta sakil takʼin li meʼ dios Artemise (Diana), och ta vokol li yabtelik ti lek tspasik-o kanale. Ta smantal Demetrio, ti jaʼ chabtelan ek taje, la stsob sba krixchanoetik. Li krixchanoetike laj yikʼik batel ta persa li Aristarco xchiʼuk Gayoe, laj yikʼik batel kʼalal ta akʼob elov, vaʼun xi avanike: «Jaʼ acʼo ichʼatuc ta mucʼ li jmucʼta meʼ diostic Diana, vuʼutic li efesoutique», xiik. Akʼo mi laj van snopik ti chchamik ta melel li chaʼvoʼ yajtsʼaklomtak Cristo taje, «li jtsʼibajom te ta lume» pajtsaj yuʼun li krixchanoetike (Hech. 19:23-41).
17 Ti jechuk echʼ xaʼox jvokoltik kʼuchaʼal taje, ¿mi jaʼ van ta jsaʼ ta jkuxlejaltik ti kʼusi mu xa masuk xakʼutik ta vokole? Muʼyuk kʼusi chakʼ ta ilel mi chibaj yoʼontonik li Aristarco xchiʼuk Gayoe. Snaʼoj onoʼox Aristarco ti xuʼ chichʼik kontrainel ta skoj li xcholel lekil aʼyeje, yuʼun li chol mantal la spas Pablo li ta slumal Aristarcoe, ta Tesalonicae, muʼyuk lek laj yaʼiik li krixchanoetike (Hech. 17:5; 20:4). Pe ta skoj ti ixanav ta sbe Jeova xchiʼuk li Gayoe, tsatsubtasbat yoʼontonik xchiʼuk akʼbat yipalik yuʼun Jeova sventa stsʼik yuʼunik li kontrainele.
Oyuk ta koʼontontik li kʼusitik chtun yuʼun yantike
18. ¿Kʼu yelan laj yakʼik ta ilel Priscila xchiʼuk Áquila ti oy ta yoʼontonik yantike?
18 Skʼan oyuk ta koʼontontik ti lekuk oyik li kermanotaktike, mi ta yorail lekilal o mi ta yorail kontrainel. Li Priscila xchiʼuk Aquilae oy ta yoʼontonik li yantike, jaʼ xkaltik, tskʼelik li kʼusitik chtun yuʼun li yermanotakike (kʼelo Filipenses 2:4). Li nupul tsʼakal ti lek ta chanbel stalelal taje, oyikʼal van laj yakʼbeik ta chʼamunel snaik li Pablo kʼalal te toʼox oy ta Efesoe. Jaʼ ti bu la stsob sba krixchanoetik ta smantal Demetrioe, yikʼaluk van jaʼo laj yakʼ ta vokol xkuxlejalik ta skoj li jtakbole (Rom. 16:3, 4; 2 Cor. 1:8). Ta yorail kontrainele, skʼan «[pʼijukutik] jech chac cʼu chaʼal orachon ti lec [pʼij]» kʼalal ta jpas kabteltike, yuʼun oy ta koʼontontik li kermanotaktike (Mat. 10:16-18). Muʼyuk ta jvalopatintik, muʼyuk chkalbetik sbiik o yan kʼusitik tsjakʼik li jkontrainvanejetik ta stojolalike.
19. ¿Kʼusitik te smakoj li «cʼusitic [lek] la spas» Dorcase?
19 Oy to yantik kʼuyelan xuʼ xkakʼtik ta ilel ti oy ta koʼontontik li yantike. Mi chkiltik ti abol sba junuk ermanoe, xuʼ jkoltatik ta xkuchbel li svokole (Efe. 4:28; Sant. 2:14-17). Li ta tsobobbail ta Jope ta baʼyel sigloe, oy jun ermana ti toj lek yoʼonton ti Dorcas sbie (kʼelo Hechos 9:36-42). Li ermana taje «lec cʼusitic la spas xchiʼuc ep icoltavan». Yaʼeluke tspas kʼuʼiletik sventa meʼon antsetik ti oy svokolike. Kʼalal cham ta sjabilal 36 ta jkʼakʼaliltike, toj ep laj yat yoʼontonik li meʼon antsetik taje. Pe li Diose la xchaʼkuxes ta stojolal li jtakbol Pedroe, xchiʼuk ti kʼu sjalil kuxi liʼ ta Balumile ta melel laj van xcholbe mantal yantik xchiʼuk la spas kʼusitik lek. ¿Mi mu meleluk ti xi jmuyubaj ti oy ep ermanaetik ta jtojolaltik ti lek yoʼontonike?
20, 21. 1) ¿Kʼu yelan xuʼ xkakʼtik ta ilel xtok ti oy ta koʼontontik li yantike? 2) ¿Kʼusi xuʼ xa pas sventa xa patbe yoʼonton li yantike?
20 Yan ti kʼuyelan xuʼ oyuk ta koʼontontik li yantike jaʼ ti jpatbetik yoʼontonik ta jkʼopojeltike (Rom. 1:11, 12). Jech kʼuchaʼal Silas, li xchiʼil ta chol mantal Pabloe, laj yakʼbe spatobil yoʼontonik li buchʼutik te oy ta stojolale. Kʼalal laj yichʼ chapanel li kʼop ta sventa sirkunsision ta sjabilal 49, li Jtsop Jbeiltasvaneje la stak batel j-al aʼyejetik te ta Jerusalén sventa chbat yakʼik kartaetik ta skotol tsobobbailetik. Li Silas xchiʼuk Judase batik ta Antioquía xchiʼuk li Pablo xchiʼuk Bernabee, te «la spatbeic yoʼnton li jchʼunolajeletique; itsatsub comel lec yoʼnton yuʼunic ta sventa ti ep la xchiʼinic ta loʼile» (Hech. 15:32).
21 Ta mas tsʼakale, laj yichʼik chukel ta Filipos li Pablo xchiʼuk Silase. Pe koliyal jun nikele, la xcholbeik mantal li jchabi chukinabe, ti pas ta jchʼunolajel xchiʼuk li buchʼutik te ta snae. Kʼalal mu toʼox chlokʼik li ta jteklume, la stsatsubtasbeik komel yoʼonton ermanoetik li Pablo xchiʼuk Silase (Hech. 16:12, 40). Kakʼbetik yipal ta xchanbel stalelalik sventa jechuk jpatbetik yoʼonton yantik ta jloʼiltik, ta sventa li mantal chketʼestike o jaʼo kʼalal ta sjunul koʼontontik ta jcholtik mantale. «Me oy cʼusi chacʼan chavalbe yaʼyic sventa chapatbeic yoʼnton li jchiʼiltactique», mu xa jalan aba: albo (Hech. 13:15).
Xanavkutik-o ta sbe Jeova
22, 23. ¿Kʼusi skʼan jpastik sventa jtabetik sbalil li loʼiletik ta Vivliae?
22 Skʼan ta jtojtik tajmek ta vokol jechuk li melel loʼiletik ta sventa kuxlejal ti yichʼoj tal li sKʼop Jeovae, «li Dios ti chispatbutic coʼntontique» (2 Cor. 1:3). Pe li loʼiletik taje jaʼ noʼox me ta jtabetik sbalil mi chkakʼ ta jkuxlejaltik li kʼusitik chakʼ jchantike xchiʼuk mi chkakʼtik akʼo sbeiltasutik li chʼul espiritue (Gál. 5:22-25).
23 Mi ta jnopbetik lek skʼoplal li loʼiletik ta Vivliae, ta me x-ayan ta koʼontontik skʼanel jtalelaltik kʼuchaʼal li Diose. Jech xtok, mas to me chi jnopaj ta stojolal Dios, ti jaʼ chakʼ jpʼijiltik, yojtikinobil kuʼuntik xchiʼuk li xkuxetel koʼontontike (Ecl. 2:26). Vaʼun, jaʼ jech ta jlekubtasbetik yoʼonton li Jeovae (Pro. 27:11). Jpastik-o jech xchiʼuk xanavkutik ta sjunul koʼontontik li ta sbe Jeovae.
¿Kʼusi cha takʼ?
• ¿Kʼuxi chkakʼtik ta ilel ti xuʼ spat yoʼontonik ta jtojolaltike?
• ¿Kʼu yuʼun skʼan «biqʼuit» xkakʼ jbatik?
• ¿Kʼu yelan tskoltautik ta stsatsubtasel koʼontontik li loʼiletik ta Vivliae?
• ¿Kʼu yelan xuʼ xkakʼtik ta ilel ti oy ta koʼontontik slekilal li yantike?
[Lokʼol ta pajina 8]
Akʼo mi mu kʼunuk laj yaʼi li Jeftee, la pas li kʼusi laj yale xchiʼuk koltaat yuʼun li stsebe, jaʼ jech laj yakʼik ta ilel ti xuʼ spat yoʼontonik ta stojolalike
[Lokʼol ta pajina 10]
Kerem-tseb, ¿kʼusi la achanbe li uni j-israel tsebe?
[Lokʼol ta pajina 11]
¿Kʼu yelan la skolta yermanatak li Dorcase?
[Lokʼol ta pajina 11]