¿Mi chapalot ta spakbel skʼoplal li xchʼunel avoʼontone?
¿MI OY junuk velta anuptanoj ti skʼan xa pakbe skʼoplal li xchʼunel avoʼontone? Kʼelavil kʼusi kʼot ta pasel ta stojolal Susana, jun tseb yajrextiko Jeova ta Paraguay ti vaklajuneb jabil yichʼoje. Kʼalal jaʼo yakal ta chanune, oy buchʼu laj yal ti yajrextikotak Jeovae mu la xchʼamik Pokoʼ Testamento, Jesucristo xchiʼuk María. Laj yalik noxtok ti chbatik la ta mase ti jaʼ la lek chaʼiik ti chchamike ti mu la persauk xkʼelatik yuʼun doktore. ¿Kʼusi van la apas voʼot jechuke?
Li Susanae la spas orasion, vaʼun la stoy skʼob. Ta skoj ti poʼot xaʼox tajmek xlokʼik ta chanune xchiʼuk ti chʼabal xa yorail sventa xchapbe smelolale, la skʼanbe permiso smaestra sventa chchap ta mas jelavel li kʼusi xchʼunoj kʼuchaʼal yajrextiko Jeovae. Lek xi ta anil li maestrae. Chib xemana lek la xchapan sba sventa snaʼ kʼusi chal li tseb taje, te la saʼ koltael li ta foyeto Los testigos de Jehová: ¿quiénes son y qué creen?
Kʼot skʼakʼalil un. Li Susanae laj yal ti kʼuyelan lik tal sbi li yajrextikotak Jeovae, laj yal noxtok li kʼusi jmalaojtik ta mas jelavele xchiʼuk ti kʼu yuʼun muʼyuk chkichʼtik chʼichʼe. Laj une laj yalbe xchiʼiltak ti xuʼ oy kʼusi tsjakʼike, vaʼun jaʼ ep ti oy kʼusi la sjakʼike. Labal to laj yil li smaestra ti ta Vivlia tslokʼes tal li kʼusi tstakʼe.
Jun xchiʼil ta chanune laj yal ti oy la ayem jkoj ta Salon sventa Tsobobbaile, vaʼun mi junuk la lokʼolil laj yil te. Li maestrae la skʼan la snaʼ kʼu yuʼun. Li Susanae la skʼel Salmo 115:4-8 xchiʼuk Éxodo 20:4. Chʼayem to kʼot yoʼonton li maestrae, xi la sjakʼe: «¿Kʼu xa noʼox yuʼun noj ta lokʼolil li jchʼulnakutik une, ti mu xuʼ xi ta Vivliae?
Ta skoj ti kʼusi laj yichʼ jakʼel xchiʼuk laj yichʼ takʼele, jalij batel 45 minuto. Kʼalal la sjakʼ Susana mi tskʼan tskʼelik li video La negativa a la sangre. La medicina acepta el reto sbie, laj yal skotolik ti tskʼanike. Jaʼ yuʼun li maestrae la to xchʼakbe yorail ta yokʼomal. Kʼalal laj xaʼox skʼelik li videoe, li Susanae laj yalbe skʼoplal yantik poxiletik ti xuʼ xchʼamik jlom yajrextikotak Jeovae, vaʼun xi laj yal li maestrae: «Mu toʼox jnaʼ mi oy epal poxiletik ti muʼyuk yichʼoj chʼichʼe; xchiʼuk mu toʼox xkojtikinbe li sbaliltake. ¿Mi jaʼ noʼox sventa yajrextikotak Jeova»?, xi. Kʼalal maʼuk noʼox x-utee, xi laj yal ta melel li maestrae: «Mi talik ta jna ta yan velta li yajrextikotak Jeovae, ta jchiʼinik ta loʼil», xi.
Ti jtob noʼox minuto xchapanoj sloʼil li Susanae ijalij oxib ora. Echʼ van jayibuk xemana ta tsʼakale, oy jayibuk jchanunetik la xchapik ek li kʼusi xchʼunojike. Ep tajmek kʼusi laj yichʼik jakʼbel, pe muʼyuk bu xtakʼ yuʼunik. Xi jakʼbatik yuʼun li maestrae: «¿Kʼu yuʼun muʼyuk bu xpakbe avuʼunik skʼoplal li kʼusi achʼunojik jech kʼuchaʼal la spas li achiʼilik ta chanun ti jaʼ yajrextiko Jeovae?», xi.
Li kʼusi la stakʼe jaʼ liʼe: «Yuʼun chchanik Vivlia maʼ li stukike, yan li voʼonkutike muʼyuk».
Li maestrae la skʼel echʼel li Susanae xchiʼuk xi la yalbee: «Li voʼote cha chan ta melel li Vivliae xchiʼuk chavakʼbe yipal spasel li kʼusi chale. Lek ti jech cha pase», xut.
Xuʼ mu kʼusi xal jechuk li Susanae. Pe kʼalal jech ikʼopoje jaʼ la xchan li kʼusi la spas jun uni kʼox j-israel tseb ti tsakbil echʼel yuʼun jsirioetike. Li kʼox tseb taje te itun ta sna li bankilal soltaro Naamán ta Siriae, ti ip ta jun chamel ta snukulil ti chakʼ ib oʼontone. Lik kʼopojuk li kʼox tsebe xchiʼuk xi laj yalbe li smeʼ ajvale: «Me chbat ta stojol jʼalcʼop te ta Samaria li amalale, xuʼ chcol ta sventa li xchamele», xut. Li tseb taje laj yaʼi ti tsots skʼoplal skʼan xalbe skʼoplal li melel Diose. Ti kʼusi kʼot ta pasel une, jaʼ ti lik yichʼ ta mukʼ Jeova li Naamane (2 Rey. 5:3, 17).
Jaʼ me jech ek li Susanae, tsots skʼoplal laj yaʼi ti xalbe skʼoplal Jeova xchiʼuk steklumale. Ti lik kʼopojuk sventa tspakbe skʼoplal xchʼunel yoʼonton kʼalal laj yichʼ chibal kʼoptabel li kʼusi xchʼunoje, jaʼ la xchʼun li mantal ta Vivlia liʼe: «Ichʼic noʼox ta mucʼ Cajvaltic Cristo ta avoʼntonic. Chapalucoxuc me scotol cʼacʼal cʼusi chatacʼbeic me oy bochʼo chasjacʼboxuc ta sventa li cʼusi apatoj avoʼnton chamalaique» (1 Ped. 3:15). ¿Mi chapalot ta spakbel skʼoplal xchʼunel avoʼonton li voʼote xchiʼuk ti xa kʼopoj kʼalal jech skʼan chavile?
[Lokʼol ta pajina 17]
Li abtejebaletik liʼe xuʼ me skoltaot ta spakbel skʼoplal li xchʼunel avoʼontone
[Lokʼol ta pajina 17]
LOS TESTIGOS DE JEHOVÁ
¿quiénes son y qué creen?
[Lokʼol ta pajina 17]
LA NEGATIVA A LA SANGRE
La medicina
acepta el reto