Li kʼusitik tsjakʼ jkʼel vunetike

Li jtakbol Pabloe laj yal ti skotol la j-israeletik ta xkolike (Rom. 11:26, Ch). ¿Mi jaʼ van la skʼan laj yal ti stekel judioetik tspasik ta yajtsʼaklom Cristoe?

Moʼoj, taje maʼuk la skʼan laj yal li Pabloe. Kʼuchaʼal jun jteklum, li snitilultak Abrahame muʼyuk bu la xchʼamik ti jaʼ Mesías li Jesuse. Kʼalal echʼ batel jabiletik ti kʼalal chamem xaʼox li Jesuse, jamal ivinaj ti muʼyuk onoʼox bu tspasik ta yajtsʼaklom Cristo li judioetike. Akʼo mi jech, ti kʼusi laj yal Pablo ti stekel j-israeletik ta xkolike ta onoʼox me xkʼot ta pasel. ¿Kʼu yelan?

Li ta skʼakʼalil Jesuse xi laj yalbe li jbabeetik ta relijione: «Ta xlocʼ batel ta atojolic li ventainel yuʼun Diose. Jaʼ te ta xbat ta stojolic li bochʼotic lec tstucʼulanique», xi (Mat. 21:43). Ta skoj ti la spʼajik Jesús li j-israeletike, jaʼ xa laj yakʼ sat ta stojolal jun achʼ jteklum li Jeovae, pe taje maʼuk skʼoplal li batsʼi Israele. Xi la sbiiltas li Pabloe: «Israel chcʼotic ta sventa [Dios]», xi (Gál. 6:16).

Yan mantaletik ta Tsʼibetik ta Griego Kʼop ti chalbe skʼoplal Cristoe chal ti «Israel chcʼotic ta sventa Diose» jaʼik la 144,000 yajtsʼaklomtak Cristo ti tʼujbilik ta chʼul espiritue (Rom. 8:15-17; Apo. 7:4). Li jtsop krixchanoetik taje te tsakal skʼoplal krixchanoetik ti maʼuk judioetike, jech kʼuchaʼal chal Apocalipsis 5:9, 10. Taje te ta jchantik ti buchʼutik chkʼotik ta Israel ta sventa Diose likemik tal ta «jujuchop stsʼunubal, ta jujuchop cʼop, ta jujun lum, xchiʼuc ta jujun [banamil]» xchiʼuk tʼujbilik sventa chkʼotik ta «pasmantal [xchiʼuk] ta paleal ta stojol Dios» xchiʼuk sventa «tspasic mantal ta banamil». Pe akʼo mi tenatik li steklumal Israele, oy onoʼox junantik ti xuʼ lek ch-ilatik yuʼun Dios yan veltae. Jaʼ jech ikʼot ta stojolal li jtakboletik xchiʼuk yan epal judioetik ti kʼotik ta jchʼunolajel li vaʼ ora taje. Melel onoʼox chaʼa, jech kʼuchaʼal li yan krixchanoetike, skʼan onoʼox me xichʼik manel ek li ta xchʼichʼel Jesucristoe (1 Tim. 2:5, 6; Heb. 2:9; 1 Ped. 1:17-19).

Akʼo mi jaʼ mas ep li judioetik ti chʼay yuʼunik li matanal ti xuʼ ox ch-ajvalilajik xchiʼuk Jesuse, muʼyuk bu xpaj ta be li kʼusi onoʼox tskʼan Diose. Mi jaʼuk onoʼox xkʼot ta pasel jech maʼ taje, yuʼun xi chalbutik ta stojolal yaj-alkʼop li Jeovae: «Li jcʼop chlocʼ ta quee, muc xocoluc tsut batel ta jtojol. Chcʼot ta pasel li cʼusi oy ta coʼntone; chcʼot ta pasel scotol li cʼusi ta xcale», xi (Isa. 55:11).

Jaʼ jech kʼotem ta pasel li kʼusi tskʼan yoʼonton Dios ti chchotan ta xokon xNichʼon ta vinajel li 144,000. Li Vivliae jamal chal ti tstsʼaki li kʼuyepal taje, mu junuk tspas palta (Apo. 14:1-5).

Jaʼ yuʼun chaʼa, ti kʼalal la stsʼiba Pablo ti skotol Israel ta xkole, maʼuk la skʼan laj yal ti tspasik ta yajtsʼaklom Cristo stekel li judioetike. Li kʼusi la skʼan laj yale jaʼ ti chkʼot ta pasel li kʼusi tskʼan Dios ti ch-ajvalilajik ta xokon Jesucristo 144,000 j-israeletik ta mantale. Kʼalal mi kʼot li yorail yakʼojbe Jeovae, ta me xkol stekel li jtsop taje —«scotol israeletic»— xchiʼuk ta me xventainvanik kʼuchaʼal ajvaliletik xchiʼuk paleetik li ta Ajvalilal yuʼun Mesiase (Efe. 2:8).

[Lokʼol ta pajina 28]

Li buchʼutik tʼujbile likemik talel ta «jujuchop stsʼunubal, ta jujuchop cʼop, ta jujun lum, xchiʼuc ta jujun [banamil]»