¿Kʼusi skʼan xi jatavutik-o li yajtsʼaklomutik Cristoe?
«Li voʼoxuque jaʼ achiʼilic orachon. ¿Me chacʼan chajatovic ta anil ta sventa li stojol mulil ta xtale?» (MAT. 3:7.)
1. ¿Buchʼutik chalbe skʼoplal Vivlia ti ijatavik lokʼele?
¿MI XUʼ xa nop ta stojolal junuk krixchano ti chal Vivlia ti persa ijatave? Jaʼ chvul ta ajol li kʼupil sba kerem Josee, ti jatav ta stojolal yajnil Potifar kʼalal isujat sventa xchiʼinat ta vayele (Gén. 39:7-12). Li jchʼunolajeletik ta baʼyel sigloe ijatavik lokʼel ta Jerusalén ta sjabilal 66 ta jkʼakʼaliltik, yuʼun la xchʼunik li kʼusi xi laj yal Jesuse: «Cʼalal chavilic liʼ xa joyibtabil ta soldadoetic li lum Jerusalene, [...] voʼoxuc ti liʼ nacaloxuc ta Judea banamile, jatovanic batel ta anil ta vitsetic. Li bochʼotic liʼ oyic ta yut lume, acʼo loqʼuicuc batel», xi (Luc. 21:20, 21).
2, 3. 1) ¿Kʼusi smelolal li kʼusi laj yalbe jbabeetik ta relijion yuʼun judioetik li Juan J-akʼvanej ta voʼe? 2) ¿Kʼusi pʼijubtasel jechtik laj yal Jesús jech kʼuchaʼal yaloj Juane?
2 Li José xchiʼuk li jchʼunolajeletik ta baʼyel sigloe batsʼi jatavik lokʼel ta melel. Jech li yajtsʼaklomtak Cristo ta spʼejel balumil avi eke skʼan me xi jatavutik, pe ta lokʼolkʼop. Jaʼ jech la stunes Juan J-akʼvanej ta voʼ li jpʼel kʼop taje, «chajatovic» xi kʼalal tal kʼelatuk yuʼun jlom jbeiltasvanej ta relijion yuʼun judioetike. Toj tukʼ xaʼi sbaik li viniketik taje xchiʼuk mu persauk skʼan sutes yoʼonton yalojik. Jech xtok, muʼyuk lek laj yilik li krixchanoetik ti chbatik ta stojolal Juan sventa ch-akʼbat yichʼik voʼ ti jaʼ jech chvinaj ti tsutes yoʼontonike. Jaʼ yuʼun li Juane tsots yoʼonton xi laj yalanbe ta skoj ti chloʼlavanike: «Li voʼoxuque jaʼ achiʼilic orachon. ¿Me chacʼan chajatovic ta anil ta sventa li stojol mulil ta xtale? Acʼo vinajuc ta avabtelic me ta melel ti sutem avoʼntonique», xi (Mat. 3:7, 8).
3 Li Juane maʼuk batsʼi jatvil laj yalbe skʼoplal. Ti kʼusie, yuʼun jaʼ yakal xalbe judioetik ti poʼot xa xakʼ talel skʼakʼal yoʼonton ti Diose, ti chchapanvane, jaʼ yuʼun mi tskʼan chkolike, skʼan me xakʼik ta ilel ti tsutses yoʼontonike. Ta jelavele, jamal laj yalbe smul jbabeetik ta relijion li Jesús eke, yuʼun ta skoj ti jmilvanej ta stalelalike ivinaj ti jaʼ mero stotik li Diabloe (Juan 8:44). Jech xtok, jaʼtik onoʼox jech ipʼijubtasvan ek kʼuchaʼal laj yal Juane. Xi la sbiiltasane: «Stsʼunubal orachonetic» xi, xchiʼuk xi la sjakʼ xtoke: «¿Me chanopic ti muʼyuc onoʼox chbat atoj amulic ta tojob mulile [«Gehena», NM ]?, xi (Mat. 23:33). ¿Pe kʼusi smelolal li kʼusi laj yal Jesús ti tojob mulil o Gehena, xie?
4. ¿Kʼusi smelolal kʼalal Gehena xi li Jesuse?
4 Li tojob mulil o Gehenae jaʼ sbi jun stenlejaltik ta spat smuroaltak Jerusalén, ti te chchikʼik kʼaʼep xchiʼuk chamem chonbolometike. Li Jesuse la stunes li jpʼel kʼop taje, ti jaʼ svinajeb lajelal sbatel osile (kʼelo li paj. 27). Kʼalal laj yalbe jbabeetik ta relijion yuʼun judioetik ti mu xuʼ xjatavik ta stojolal li Gehenae, ti kʼusi la skʼan laj yakʼ ta aʼiel li Jesuse jaʼ ti staik-o lajel sbatel osile (Mat. 5:22, 29).
5. ¿Kʼuxi kʼot ta pasel li pʼijubtasel laj yal Juan xchiʼuk Jesuse?
5 Li jbabeetik yuʼun judioetike mas to staʼo stoj smulik ti la skontrainik Jesús xchiʼuk yajtsʼaklomtake. Kʼot skʼakʼalil un, jech onoʼox kʼuchaʼal yaloj Juan xchiʼuk Jesuse, tal li skʼakʼal yoʼonton Diose. Li vaʼ ora taje, jvokʼ noʼox bu laj yakʼ ta ilel skʼakʼal yoʼonton li Jeovae, jaʼ li ta Jerusalén xchiʼuk ta yosilal Judeae, jaʼ yuʼun stakʼ xjatavik ta melel. Te vinaj skʼakʼal yoʼonton Dios kʼalal la sjinesik Jerusalén xchiʼuk chʼulna li soltaroetik ta Roma ta sjabilal 70 ta jkʼakʼaliltike. Taje jaʼ li mas tsots vokolil la snuptan Jerusalene; ep ta jyalel icham judioetik o laj yichʼik chukel. Li kʼusi kʼot ta pasel taje jaʼ laj yakʼ ta ilel ti oy to mukʼta lajesele, ti jaʼ chkʼot ta stojolalik avi li buchʼutik tskuy sbaik ta yajtsʼaklom Cristoe xchiʼuk li yan relijionetike (Mat. 24:21).
Svinajeb skʼakʼal yoʼonton Dios ta tsʼakal
6. ¿Kʼusi lik talel li ta baʼyel stsobobbail yajtsʼaklomtak Cristoe?
6 Oy jlom jchʼunolajeletik ta baʼyel siglo ti la svalopatinik komel mantale xchiʼuk ti la xjoch lokʼel yan xchiʼilike (Hech. 20:29, 30). Li yajtakboltak Jesuse jaʼ itunik sventa mu x-och li jvalopatinej mantaletike, pe kʼalal chamike ep tajmek ayan jecheʼ relijionetik ta sventa jchʼunolajeletik. Ta sienal noʼox relijion oy avi ti jaʼik yajtsʼaklomtak Cristo chalike, pe mu parejouk skʼopik un. Li Vivliae yaloj onoʼox ti ch-ayan jbabeetik yuʼunik li buchʼutik tskuy sbaik ta yajtsʼaklomtak Cristoe, tsbiiltas ta «chopol vinic» xchiʼuk ta «sveʼel [chʼayel]», jaʼ yuʼun «li Cajvaltique, ta yicʼal ye noʼox ta smil, ta xojobal noʼox ta xlaj» (2 Tes. 2:3, 6-8).
7. ¿Kʼu yuʼun staʼo chichʼ biiltasel ta «chopol vinic» li jbabeetik ti skuyoj sbaik ta yajtsʼaklom Cristoe?
7 Jlom kʼusi chopol spasoj li buchʼutik jbabeetik ti skuyoj sbaik ta yajtsʼaklom Cristoe jaʼ ti chakʼik jecheʼ chanubtasele, kʼinetik, talelaletik ti mu jechuk chal Vivlia ti ta smiyonal noʼox krixchanoetik sloʼlaoje. Jech kʼuchaʼal kʼot ta pasel ta stojolal li jbabeetik ta relijion ti jamal albat smulik yuʼun Jesuse, li buchʼutik jaʼik «sveʼel [chʼayel]» avie ta xichʼik lajesel xchiʼuk muʼyuk xa bu ta xchaʼkuxiik (2 Tes. 1:6-9). ¿Pe kʼusi chkʼot ta stojolal li krixchanoetik ti loʼlabilik yuʼun jbabeetik ti skuyoj sbaik ta yajtsʼaklom Cristoe xchiʼuk li yantik relijionetike? Sventa jtakʼtik taje, jkʼeltik kʼusi kʼot ta pasel kʼalal laj xaʼox yichʼ lajesel ta sba velta li Jerusalén ta sjabilal 607 kʼalal maʼuk toʼox jkʼakʼaliltike.
«Jatovanic loqʼuel ta stojol li Babiloniae»
8, 9. 1) ¿Kʼusi albil kʼop albatik yuʼun Jeremías li judioetik ti mosoinbilik ta Babiloniae? 2) ¿Kʼuxi ti ijatavik li judioetik kʼalal tsale yuʼun jmediaetik xchiʼuk jpersiaetik li Babiloniae?
8 Li j-alkʼop Jeremiase laj onoʼox yal ti chichʼ lajesel li Jerusalén ti kʼot ta pasel ta sjabilal 607 kʼalal maʼuk toʼox jkʼakʼaliltike. Laj onoʼox yal xtok ti chichʼik mosoinel li steklumal Diose, pe ti tsut la ta slumalik kʼalal mi echʼ «lajuneb xchanvinic (70) jabil[e]» (Jer. 29:4, 10). Li Jeremiase toj tsots skʼoplal li aʼyej chalbe li judioetik ti mosoinbilik ta Babiloniae. Skʼan me mu skap sbaik li ta jecheʼ relijion li ta lum taje, yoʼ jech lek chapalik kʼalal tsutik echʼel ta Jerusalene xchiʼuk ti xchaʼta yav yuʼunik li melel yichʼel ta mukʼ Dios mi sta yorail chil Diose. Li yorail taje jaʼo kʼot kʼalal mu toʼox jaluk la stsalik Babilonia li jmediaetik xchiʼuk jpersiaetik ta sjabilal 539 kʼalal maʼuk toʼox jkʼakʼaliltike. Li ajvalil Ciro II laj yal jun mantal, jaʼ ti xuʼ sutik batel ta slumalik li judioetike xchiʼuk ti xchaʼvaʼanik li chʼulnae (Esd. 1:1-4).
9 Ta smilal noʼox judioetik isut batel ta slumalik ta skoj taje (Esd. 2:64-67). Kʼalal jech la spasike, jaʼ ikʼot ta pasel yuʼunik li kʼusi laj yal Jeremías ti jatavik lokʼel ta Babiloniae. Taje batsʼi jatavik, yuʼun lokʼik ta melel li ta lume (kʼelo Jeremías 51:6, 45, 50). ¿Kʼusi kʼot ta pasel ta stojolalik li j-israeletik ti mu xuʼ yuʼunik li namal xanbal ta Judá xchiʼuk ta Jerusalene? Akʼo mi komik ta Babilonia junantik, —jech kʼuchaʼal li mol j-alkʼop Daniele—, xuʼ me tstabeik li sbendision Dios eke. Pe sventa jech taje skʼan onoʼox me skolta sbaik li ta yichʼel ta mukʼ Dios ta melele, ti te xkom ta Jerusalén li sbatsʼi ichʼobil ta mukʼe, xchiʼuk ti nom xakʼ sbaik ta stojolal li jecheʼ relijion ta Babiloniae.
10. ¿Kʼusitik chopol spasoj li Mukʼta Babiloniae?
10 Li avie ta smilal noʼox krixchanoetik ti oyik ta epal relijionetik ti jaʼ te lokʼem talel ta voʼneal Babilonia li kʼusi tspasike (Gén. 11:6-9). Stekel li relijionetik taje jaʼ sbiinojik «mucʼta [Babilonia, smeʼ] li jmulavil antsetique, xchiʼuc scotol li cʼusitic toj chopol chil Dios liʼ ta banamile» (Apo. 17:5). Ti kʼu xa sjalil talel li kuxlejale, skoltaoj bankilaletik ta politika liʼ ta balumil li jecheʼ relijione. Jtos li kʼusi toj chopolik sbainoje, jaʼ li epal pas kʼopetik ti ta smiyonal noʼox krixchanoetik chamem yuʼune (Apo. 18:24). Maʼuk noʼox taje, yuʼun te xtok ti tslutsʼik ta vayel ololetike xchiʼuk yantik mulivajel ti tspas li paleetike xchiʼuk ti lek noʼox chilik li j-abteletik ti mas tsots yabtelik ta relijione. ¿Mi mu jechuk ti mu labaluk chkaʼitik ti poʼot xa slajes jecheʼ relijion li Jeovae? (Apo. 18:8.)
11. Yoʼ to muʼyuk yichʼoj lajesel li Mukʼta Babiloniae, ¿kʼusi sbainoj li melel yajtsʼaklomtak Cristoe?
11 Li melel yajtsʼaklomutik Cristoe jnaʼojtik kʼusi tsta li Mukʼta Babiloniae, jaʼ yuʼun oy ta jbatik spʼijubtasel li buchʼutik te oyike. Jtos ti kʼuyelan ta jpastike jaʼ ti ta jpuktik vivliaetik xchiʼuk vunetik ti lokʼem sloʼilal ta Vivlia ti pasbil yuʼun li «jʼabtel ti jun [«tukʼ», NM] yoʼnton [...], ti lec bije» ti vaʼanbil yuʼun Jesús sventa chakʼ veʼlil ta mantal «cʼalal ta sta yorail ta xveʼique» (Mat. 24:45). Mi oy buchʼu oy ta yoʼonton li mantale, ta me xkalbetik ti akʼo xchan Vivlia jchiʼuktike xchiʼuk ti ta jkʼantik akʼo xakʼ venta ti skʼan «[xjatav] loqʼuel ta stojol li [Babilonia]» kʼalal jaʼ to yoraile (Apo. 18:4).
Jatavkutik ta yichʼel ta mukʼ jecheʼ dios
12. ¿Kʼu yelan chil Dios li yichʼel ta mukʼ lokʼoletike?
12 Yan ti kʼusi chopol tspas li Mukʼta Babilonia xtoke jaʼ ti chichʼ ta mukʼ lokʼoletike. Xi tsbiiltas lokʼoletik li Diose: «Toj chopol» xchiʼuk «cuybilic ta diosetic», xi (Deu. 29:17). Stekel li buchʼutik tskʼan chichʼik ta mukʼ Diose skʼan me xiktaik li yichʼel ta mukʼ lokʼoletike, yuʼun xi chal stuk li Jeovae: «Vuʼun li Mucʼul Dios jbie, mu xcacʼ bochʼo yan chichʼ li jlequilal cutsilale; mu xcacʼ jaʼ chcʼot ta stojolic quichʼel ta mucʼ li cʼusitic locʼtabilic noʼoxe», xi (Isa. 42:8).
13. ¿Kʼusi pʼijil loʼlael ta yichʼel ta mukʼ lokʼolil skʼan xi jatavutik ta stojolal?
13 Li Vivlia xtoke chalbe to yan smelolal ti kʼuyelan pʼij chloʼlavan li yichʼel ta mukʼ lokʼoletike; jech kʼuchaʼal li xpichʼetel oʼontonale (Col. 3:5). Li xpichʼetel oʼontonale jaʼ ti ta jkʼan kaʼitik li kʼusi mu xuʼe, jech kʼuchaʼal li kʼusi jaʼ yuʼun yan krixchanoe (Éxo. 20:17). Li anjel ti ikʼataj ta Satanase la xpichʼ oʼonta ti jechuk kʼuchaʼal li Buchʼu toj toyol oye xchiʼuk ti xichʼ ichʼel ta mukʼe (Luc. 4:5-7). Jaʼ yuʼun la stoy sba ta stojolal Jeova xchiʼuk la sloʼla Eva sventa xpichʼ oʼonta ek ti kʼusi mu stakʼ pasel ti yaloj onoʼox Diose. Ti xkaltike laj yichʼ ta mukʼ lokʼolil ek li Adán kʼalal jaʼ mas tsots skʼoplal laj yaʼi li yajnile, ti jaʼ muʼyuk bu la xchʼunbe smantal li jkʼuxubinvanej Totil yuʼun ta vinajele. Stekel ti buchʼutik tskʼan chjatavik ta skʼakʼal yoʼonton Diose skʼan me jaʼ noʼox xichʼik ta mukʼ li Jeovae xchiʼuk ti mu stsʼujik li ta pichʼ oʼontonale.
«Chacomtsanic li mulivajele»
14-16. 1) ¿Kʼu yuʼun toj lek ta chanbel slekil talelal li Josee? 2) ¿Kʼusi skʼan jpastik mi ch-ayan ta koʼontontik chopol lutsʼbaile? 3) ¿Kʼusi skʼan mu jpastik sventa xi jatavutik li ta mulivajele?
14 Kʼelo 1 Corintios 6:18. Kʼalal taʼox sloʼlabe yaʼi sjol José li yajnil Potifare, batsʼi jatav ta melel li Josee. ¡Toj lek xuʼ jchanbetik stalelal li yajtsʼaklomutik Cristoe, mi nupunemutik o mi muʼyuk! Jamal xvinaj ti xchanubtasoj xaʼox lek sjol yoʼonton li José ta sventa li kʼusitik kʼotem ta pasele, ti jaʼ jech la snaʼ ti kʼuyelan chil Jeova li mulivajele. Li yajtsʼaklomutik Cristoe skʼan me jchʼuntik li mantal ti akʼo xi jatavutik ta stojolal li mulivajele, pe sventa spas kuʼuntik jeche, skʼan me xkiktatik skotol li kʼusi jaʼ chakʼ ta koʼontontik skʼanel skʼupinel jun krixchano ti maʼuk jchiʼiltik ta nupunele. Xi tstojobtasutik li sKʼop Diose: «Tscʼan jʼechʼel chamenoxuc o ta sventa li cʼusi sventa noʼox banamile: jaʼ li mulivajele, li cʼusitic toj chopolique, li cʼusi tscʼan abecʼtalique, li cʼusitic chopol oy ta avoʼntonique, xchiʼuc li xpichʼetel avoʼntonique, yuʼun xcoʼlaj xchiʼuc oy slocʼobal jdiostic chcʼot me jech coʼntontique. Li bochʼotic jech tspasique, ilintabilic xa yuʼun li Diose», xi (Col. 3:5, 6).
15 Kʼuchaʼal chkiltike, li Pabloe laj yal ti «ilintabilic xa yuʼun li Diose». Li avie ep krixchanoetik ti oy tajmek ta yoʼontonik li chopol lutsʼbaile xchiʼuk jaʼ tspasatik ta mantal yuʼun. Sventa mu jechuk xkʼot ta jtojolaltike, skʼan me jkʼanbetik xchʼul espiritu li Diose. Skʼan me jchantik xtok li Vivliae, xi jbat ta tsobajeletik xchiʼuk ti jcholtik mantale. Vaʼun jaʼ me jech ta jpastik li «cʼusi tscʼan li Chʼul Espiritue, yuʼun jech mu jaʼuc [xi spasutik] ta mantal li [j]becʼtalique» (Gál. 5:16).
16 Mi jaʼ ta jkʼan ta jpastik li «cʼusi tscʼan li Chʼul Espiritue» jamal ta aʼiel ti mu me stakʼ jkʼeltik pornografiae. Jech xtok, mu me stakʼ jchantik ta vun, mu me stakʼ xkaʼitik xchiʼuk mu me stakʼ jkʼeltik ti kʼusi tstij koʼontontik ta lutsʼbaile. Mi jaʼuk stakʼ jloʼiltatik xchiʼuk mi jaʼuk xkixtol loʼiltatik li kʼusitik taje, yuʼun «mu xa jechuc tscʼan tspas li yuʼuntac Diose» (Efe. 5:3, 4). Mi jech muʼyuk ta jpastike, jaʼ me jech chkakʼbetik yil li jkʼanvanej Totil kuʼuntik ti ta jkʼantik chi jkol li ta skʼakʼalil skʼakʼal yoʼontone xchiʼuk ti ta jkʼan chi jnaki li ta tukʼil achʼ balumil yuʼune.
Jatavkutik li ta «scʼupinel taqʼuine»
17, 18. ¿Kʼu yuʼun skʼan xi jatavutik ta sventa li skʼanel takʼine?
17 Li ta sbaʼyel karta la stakbe echʼel Timoteo li jtakbol Pabloe, te laj yalbe lek skʼoplal li beiltaseletik ti skʼan xchʼunik li jchʼunolajeletik ti jaʼ mosoiletike, yuʼun oy junantik yaʼeluk ti tskʼan tsbalinbe stakʼin yajvalik ti jaʼik jchʼunolajeletike. Yikʼaluk van oy buchʼu ta tsobobbail xtok ti tstunes yaʼi yermanotakik sventa spas kanal takʼine. Li Pabloe laj yal ti mu stakʼ «ti jaʼ noʼox oy ta yoʼntonic tscʼan tspasic ta jcʼulej [ta takʼin] ta sventa li scʼop Dios jchʼunojtique». Yikʼaluk van li smeʼ kʼop taje jaʼ van li «scʼupinel taqʼuine», ti parejo xuʼ chil-o svokolike, jkʼulejetik xchiʼuk povreetik (1 Tim. 6:1, 2, 5, 9, 10).
18 ¿Mi xvul ta ajol junuk krixchano yaʼel ti chal Vivlia ti sok kʼuyelan oy ta stojolal Jeova ta skoj skʼanel takʼin o ta skoj kʼusitik tskʼane? (Jos. 7:11, 21; 2 Rey. 5:20, 25-27.) Xi laj yalbe Timoteo li Pabloe: «Li yajtunelot Diose, vocʼo me aba ta sventa scotol leʼe. Jaʼ saʼo batel li cʼusi tucʼ ta pasele, li yichʼel ta mucʼ Cajvaltique, li xchʼunojel avoʼntone, li cʼuxubinvaneje, ti acʼo oyuc lec stsatsal avoʼntone, ti acʼo cuchuc avuʼun scotole», xi (1 Tim. 6:11). Skotol ti buchʼu tskʼan kuxul chkom li ta skʼakʼal yoʼonton Dios chtale, skʼan me xchʼun li tojobtasel taje.
«Vocʼo me aba ta sventa cʼusi stalel ta scʼupin li queremetique»
19. ¿Kʼusi jtunel yuʼun stekel kerem-tsebetik?
19 Kʼelo Proverbios 22:15. Xuʼ me xkʼejav ta be ta skoj sbolil li jun kereme, pe li mantal ta Vivliae jaʼ me chjutukajesbat li sbolile. Manchuk mi maʼuk jchʼunolajel stot smeʼ li jun kerem o tseb yajtsʼaklom Cristoe, xuʼ me tsta koltael li ta beiltaseletik ta Vivliae. Jaʼ me jun lekil koltael xtok li pʼijil tojobtaseletik chakʼ moletik ta tsobobbail ti lek yijik ta mantale. Buchʼuuk ti xakʼ tojobtasel ta Vivliae, skʼan me xchʼunik li kerem-tsebetike, yuʼun me jaʼ jech xuʼ xmuyubajik li avie xchiʼuk li ta mas jelavele (Heb. 12:8-11).
20. ¿Kʼusi skʼan spas li kerem-tseb mi tskʼan chjatav ta stojolal li kʼusitik chopol chakʼ ta oʼontonale?
20 Kʼelo 2 Timoteo 2:20-22. Ep kerem-tsebetik muʼyuk chchʼunik li mantal chal Vivliae, vaʼun ta skoj taje, bol spasoj sbaik xchiʼuk jaʼ xa oy ta yoʼontonik li tsalbaile, li xpichʼetel oʼontonale, li mulivajele, li skʼanel takʼine xchiʼuk li saʼel kʼusitik tskʼan tskʼupinike. Taje jaʼ jlom ti kʼusi «stalel ta scʼupin li queremetique» xchiʼuk chalbutik Vivlia ti akʼo xi jatavutik ta stojolale. Sventa xjatavik ta stojolale, li kerem o tseb yajtsʼaklom Cristoe skʼan me skʼel sba ta stojolal li kʼusitik chakʼ talel choplejale, buuk ti chlik tale. Toj jtunel me yuʼun ti xchʼun li tojobtasel yuʼun Dios ti chal ti jtsʼites jtalelaltik sventa yajtsʼaklomtak Cristoe, jech kʼuchaʼal tspasik «li bochʼotic lec yichʼojic ta mucʼ Cajvaltic, ti lecuben xa yoʼntonique».
21. ¿Kʼusi kʼupil sba laj yal ta melel Jesús ta sventa li xchijtake?
21 Skʼan me xi jatavutik mi maʼuk snukʼ chkaʼitik li Kajvaltike, mi kerem-tsebutik o mi mol-meʼelutik xa, jpʼajtik me skotol li buchʼutik tskʼan tsloʼlautike, yuʼun me jaʼ jech chkakʼtik ta ilel ti ta jkʼan jaʼutik xchij li Jesuse (Juan 10:5). Pe mu me baluk noʼox ti chi jatavutik ta stojolal li kʼusitik tsokesvan sventa xi jkol li ta skʼakʼalil ch-ilin Diose. Skʼan me jchʼies jlekil talelaltik noxtok. Li ta yan xchanobile ta jloʼiltatik kʼuxi ta chʼiesel vuktos. Oy lek srasonal sventa jchanbetik lek smelolal taje, yuʼun xi yaloj ta melel li Jesuse: «Vuʼun ta xcacʼ cuxiicuc sbatel osil [li jchijtake]. Mu xbatic o ta chʼayel, xchiʼuc muʼyuc bochʼo xuʼ yuʼun chispojbun loqʼuel ta jcʼob», xi (Juan 10:28).
¿Kʼusi cha takʼ?
• Li ta skʼakʼalil Jesuse, ¿kʼusi pʼijubtasel laj yakʼbe li jbabeetik ta relijione?
• ¿Kʼu yelan xibal sba oy li epal miyon krixchanoetik avie?
• ¿Kʼusi pʼijil loʼlael ta yichʼel ta mukʼ lokʼolil skʼan xi jatavutik?
[Lokʼol ta pajina 9]
¿Kʼusi ti skʼan xi jatavutik ta stojolal li yajtsʼaklomutik Cristoe?
[Lokʼol ta pajina 10]