«Tscʼan chatojbeic ta vocol»

Li Vivliae ep ta velta chalbe yajtuneltak Dios ti akʼo yalik koliyale. Li Salmo 92:1 ta Xchʼul Cʼop ti Jtotic Diose, ta skʼop Chamula, xi chale: «Dios, ti oyot ta toyole, jun yutsil ta jʼechʼel ti colaval xaʼutate», xi. Jaʼ jech xi laj yal mantal ek li jtakbol Pabloe: «Tscʼan chatojbeic ta vocol», xi (Colosenses 3:15).

Oy lek srasonaltak ti jnaʼuk jtojtik ta vokole. Robert Emmons, jchanubtasvanej ta Universidad ta California ta slumal Davis, xi laj yale: «Li kʼusitik laj yichʼ chanbel skʼoplal ta sventa li stojel ta vokole, te yakal chvinaj ti toj jtunel ti xkaltik kolaval sventa xichʼ koltael li krixchanoetike, yoʼ stsal yuʼunik li vokoliletik chil ta xkuxlejalik jujun kʼakʼale —mas ta sventa li vul oʼontone— xchiʼuk sventa mas skʼan sba ta stukik», xi.

Li revista Time xi to chal eke: «Li krixchanoetik ti chalik koliyale [...] mas oy yipal chaʼi sbaik xchiʼuk xmuyubajik noʼox, muʼyuk mas tsvul yoʼontonik xchiʼuk mas nomtik chaʼiik li tsatsal at-oʼontone, jaʼ mas chat yoʼonton maʼ yan krixchanoetike», xi.

Pe li Vivliae yaloj onoʼox ti ta «slajebal cʼacʼale» ep krixchanoetik ti «stuc noʼox xaʼay sbaic [xchiʼuk ti] mu cʼusi snaʼ stojic ta vocol[e]», taje toj kʼux ta alel (2 Timoteo 3:1-5). ¿Kʼusi skʼan jpastik sventa mu jechuk jchantik spasel li yajtsʼaklomutik Cristoe? Li Buchʼu yakʼoj ta tsʼibael Vivliae xi chale: «Vuʼun li Mucʼul Diosun avuʼune, vuʼun ta jchanubtasot cʼusi lec ta pasel ta sventa alequilal; vuʼun ta jtojobtasot bu beal tscʼan chatam batel», xi (Isaías 48:17). Li xchʼunbel smantal Diose ta skoltautik sventa mu jechuk xkil jvokoltik kʼuchaʼal li krixchanoetik ti jaʼ noʼox batem ta yoʼontonik li kʼusi tskʼan stukike. Jech xtok, jpatoj lek koʼontontik ti yiloj Jeova ti chkakʼbetik yipale xchiʼuk ti snaʼ stoj jvokoltike (Hebreos 6:10). Taje jaʼ tstij koʼontontik ta «[stojbel] ta vocol slequil yoʼnton li Mucʼul Diose» (Salmo 107:8).