Li kʼusitik tsjakʼ jkʼel vunetike

Kʼalal xi laj yalbe skʼoplal jtakbol Pablo ta skarta sventa Hebreose: «Laj yacʼbutic scʼobic ta joltique», ti xie, ¿mi jaʼ van laj yalbe skʼoplal li svaʼanel moletik ta tsobobbaile, o mi yan-o van kʼusi? (Heb. 6:2.)

Muʼyuk srasonal ti jpʼel xa noʼox chkaltike, pe yikʼaluk van jaʼ laj yalbe skʼoplal li yakʼel kʼobil sventa xichʼik li matanal yuʼun espiritue.

Melel onoʼox ti chal Vivlia ti oy bakʼintik chakʼ skʼobik sventa tsvaʼanik j-abteletik ta sventa yabtel Diose. Li Moisese «laj onoʼox yacʼ scʼob ta sjol» Josué kʼalal la svaʼan sventa x-och ta xkʼexole (Deu. 34:9). Jech noxtok laj yichʼ vaʼanel viniketik ti xtojobik lek li ta tsobobbaile, jaʼo kʼalal laj yichʼik kajanbel kʼobil ta sjolike (Hech. 6:6; 1 Tim. 4:14). Taje jaʼ onoʼox skʼoplal laj yal Pablo kʼalal la stojobtas li Timoteo ti akʼo mu ta aniluk xakʼ skʼob ta sjol junuk vinike (1 Tim. 5:22).

Pe li ta skarta Pablo sventa Hebreose, jaʼ yakal tstijbe yoʼonton li jchʼunolajeletik ti akʼo yakʼik «persa ti acʼo [xchʼiik] lec batele», jaʼ ti laj xa yiktaik li chanubtasel ta «sliquebe». Vaʼun xi laj yalbe skʼoplale: «Acʼo jsutes coʼntontic ta sventa li cʼusi ch-acʼvan ta chʼayele, xchiʼuc ti acʼo jchʼuntic Diose, xchiʼuc li chanubtasel ta sventa ichʼ voʼe, ta sventa laj yacʼbutic scʼobic ta joltique», xi (Heb. 6:1, 2). ¿Mi xuʼ van xkaltik ti jaʼ noʼox jun chanubtasel ta slikeb li svaʼanel moletik ta tsobobbaile, ti skʼan xiktaik spasel sventa lek xchʼiik batele? Moʼoj. Li abtelal ta mol ta tsobobbaile jaʼ me jtos ti kʼusi xuʼ staik li viniketik ti yijik xa ta mantale, xchiʼuk jaʼ me jun matanal ti skʼan onoʼox me xichʼ kʼuxubinele (1 Tim. 3:1).

Pe maʼuk noʼox chakʼ skʼobik kʼalal oy buchʼu chichʼ vaʼanel ta sventa li abtelal yuʼun Diose. Li ta baʼyel sigloe, li Jeovae la spʼaj kʼuchaʼal steklumal li voʼneal Israele, jaʼ xa kʼot ta steklumal li Israel ta sventa Diose, li stsobobbail yajtsʼaklomtak Cristo ti tʼujbilike (Mat. 21:43; Hech. 15:14; Gál. 6:16). Li matanaletik yuʼun chʼul espiritue —jech kʼuchaʼal ti chkʼopojik ta yan kʼope— jaʼ svinajeb ti jel taje (1 Cor. 12:4-11). Jech kʼuchaʼal liʼe, kʼalal ipasik ta jchʼunolajel xchiʼuk yutsʼ yalal li Cornelioe, laj yichʼik li chʼul espiritue, vaʼun jaʼ te ivinaj kʼalal «icʼopojic ta yantic cʼopetique» (Hech. 10:44-46).

Li matanaletik yuʼun chʼul espiritue jaʼ te chichʼ akʼel bakʼintik kʼalal chichʼ kajanel kʼobile. Ep tajmek laj yichʼik voʼ kʼalal la xchol mantal ta Samaria li Felipee. Li jtsop jbeiltasvanej une la stakik echʼel ta Samaria li jtakbol Pedro xchiʼuk Juane. ¿Kʼu yuʼun? Xi chale: «Li Pedro xchiʼuc Juane lic yacʼ scʼobic ta sba [li buchʼutik achʼ to yichʼojik voʼe], jech laj yichʼic li Chʼul Espiritue», xi. Li kʼusi la skʼan laj yal ta melele, jaʼ ti laj yichʼik li matanaletik yuʼun chʼul espiritue, jaʼ ti kʼusitik xtojobik ta spasel ti xvinaj ta kʼelele. Jnaʼojtik ta melel, yuʼun ti Simón ti tspasilan toʼox majiae, laj yil stuk ti kʼuyelan ch-abtej li chʼul espiritue xchiʼuk tskʼan ox tsman yaʼi li tojobel taje sventa chakʼbe skʼob yantik yoʼ xakʼbe chʼul espiritu sventa spasik li skʼelobiltak juʼelale (Hech. 8:5-20). Ta mas tsʼakal une laj yichʼik voʼ lajchaʼvoʼ jchʼunolajeletik ta Éfeso. Xi chal kaʼitik li sloʼilale: «Cʼalal laj yacʼ scʼob li Pabloe, ivul ta stojolic li Chʼul Espiritue, jech icʼopojic ta yan cʼopetic; laj yalic cʼusi iʼacʼbat snaʼic yuʼun Dios», xi (Hech. 19:1-7; koʼoltaso xchiʼuk 2 Timoteo 1:6).

Jaʼ yuʼun chaʼa, li ta Hebreos 6:2, li Pabloe jaʼ laj yalbe skʼoplal yaʼeluk ti tskajan skʼobik ta sjol li achʼ jchʼunolajeletik sventa xichʼik li matanal chakʼ chʼul espiritue.