Tunkutik ta stojolal yantik kʼuchaʼal «lekil jchabi naetik ta sventa li slekil yoʼonton Dios ti mu jtatik-oe»
«Talbat xacʼan abaic ta sventa ti coʼol achʼunojique. Talbat chavichʼ abaic ta mucʼ.» (ROM. 12:10)
1. ¿Kʼusi chalbutik ta melel li sKʼop Diose?
EP TA velta chalbutik sKʼop Dios ti tskoltautik Jeova kʼalal jaʼo oyutik tajek ta at-oʼontone. Jech kʼuchaʼal ti tspat tajek koʼontontik li kʼusi chal liʼe: «Mucʼul Dios, [chavik-o] li bochʼo chyalic ta lume; chatoy liquel li bochʼotic jecheʼ xa nijajtique». «Ta xpoxta li bochʼotic oy svocol yoʼntonique; ta xpixbe lec li xtuchʼemalique.» (Sal. 145:14; 147:3.) Xi chalbutik li jTotik ta vinajele: «Vuʼun li Mucʼul Diosun avuʼune; la jtsacbot lec ta abatsʼicʼob, jech laj calbot: “Mu xaxiʼ, vuʼun chajcoltaot”» (Isa. 41:13).
2. ¿Kʼuxi tskolta yajtuneltak li Jeovae?
2 Pe ¿kʼuxi xuʼ tstsak jkʼobtik li Jeova ti te to nakal ta vinajele xchiʼuk kʼuxi xuʼ tstoyutik likel kʼalal lubtsajemutik ta jyalele? Jaʼo kʼalal ep ta tos kʼuxi tskoltautike. Jech kʼuchaʼal liʼe, chakʼbutik chʼul espiritu sventa jtatik «svuʼel stuc li Diose» (2 Cor. 4:7; Juan 14:16, 17). Jech xtok, chakʼ jtsatsaltik ta stojolal sKʼop ti yakʼoj ta naʼel stuke, li Vivliae (Heb. 4:12). Oy to yan kʼuxi xtok ti chakʼ stsatsal koʼontontik li Jeovae. ¿Kʼusi? Sventa jtabetik stakʼobil taje jchanbetik lek skʼoplal li sbaʼyel karta jtakbol Pedroe.
«Li slekil yoʼonton Dios ti mu jtatik-oe, ti ep ta chop kʼuxi vinajeme»
3. 1) ¿Kʼusi chal jtakbol Pedro ta sventa li prevaetike? 2) ¿Kʼusi laj yal ta melel ta slajebal sbaʼyel karta li Pedroe?
3 Li ta skarta jtakbol Pedro ti la stakbe echʼel li buchʼutik tʼujbil chbatik ta vinajele te laj yalbe ti oy srasonal sventa xmuyubajikuke, yuʼun oy kʼusi toj lek smoton ch-akʼbatik ta tsʼakal. Pe xi chal xtoke: «Acʼo me ep ta chop preva chtal ta atojolic me jech chcʼot ta pasele, pero muʼyuc jal chavichʼic» (1 Ped. 1:1-6). Kakʼtik venta ti mu jtosuk noʼox preva chalbe skʼoplal li Pedroe, «ep ta chop» kʼusitik prevail. ¿Mi xkuch van yuʼun skotol preva li ermanoetike? Li Pedroe muʼyuk xchibet yoʼonton yuʼun li ermanoetike: laj yalbe ta melel ti chkuch yuʼunike, yuʼun chkoltaatik yuʼun Jeova sventa stsal yuʼunik kʼusiuk prevail. Li kʼusi jpʼel skʼoplal laj yichʼ alel taje te ta jtatik ta slajebaltik skarta li jtakbole, jaʼo kʼalal laj yalbe skʼoplal ti «poʼot xa chlaj scotol li cʼusitic oye» (1 Ped. 4:7).
4. ¿Kʼu yuʼun tspat tajek koʼontontik li kʼusi chal 1 Pedro 4:10?
4 Xi chal li Pedroe: «Ti kʼuyepal ataoj amotonik ta jujuntale, tunesik kʼalal cha tunik ta stojolal yantik kʼuchaʼal lekil jchabi naetik ta sventa li slekil yoʼonton Dios ti mu jtatik-oe, ti ep ta chop kʼuxi vinajeme» (1 Ped. 4:10, NM). Kʼuchaʼal chkiltike chchaʼtunes li jpʼel kʼop «ep ta chop», xie. Jaʼ jech kʼuchaʼal chakʼ kiltik li Pedroe akʼo mi toj ep ta chop ta jnuptantik li prevaetike jaʼ jech ep ta chop ch-abtej li slekil yoʼonton Dios yakʼojbutik ti mu jtatik-oe. ¿Kʼu yuʼun tspat tajek koʼontontik taje? Yuʼun chakʼ kiltik ti kʼusiuk noʼox prevail ta jnuptantike ta onoʼox xkilbetik slekil yoʼonton Dios ti mu jtatik-o ti jaʼ tskoltautik ta stsalel li prevaetik taje. Pe ¿mi avakʼ venta kʼusi tstunes Jeova sventa chakʼ kiltik li slekil yoʼonton ti mu jtatik-oe? Jaʼ tstunes li kermanotaktike.
Tunkutik «ta stojolal yantik»
5. 1) ¿Kʼusi skʼan jpastik li yajtsʼaklomutik Cristoe? 2) ¿Kʼusitik ta jakʼtik?
5 Li Pedroe xi chalbe skotol li yajtsʼaklom Cristo ta tsobobbaile: «Jaʼ tsots scʼoplal ti echʼem to acʼo acʼan abaic li voʼoxuque». Xchiʼuk xi to chale: «Ti kʼuyepal ataoj amotonik ta jujuntale, tunesik kʼalal cha tunik ta stojolal yantik[e]» (1 Ped. 4:8, 10, NM). Jech, ta jujuntalutik li voʼotike skʼan me jtsatsubtasbetik yoʼonton li kermanotaktike. Oy kʼusi ep sbalil yakʼoj jchabitik li Jeovae, taje skʼan xkakʼbetik li yantik eke. ¿Kʼusi jaʼ taje? Li Pedroe chal ti jaʼ la jun matanale. ¿Kʼusi li matanal taje? ¿Xchiʼuk kʼuxi ta jtunestik sventa ta jkoltatik li yantike?
6. ¿Kʼusi jaʼ jlomuk li matanaletik akʼbilutike?
6 Xi chakʼ kiltik li sKʼop Diose: «Scotol li cʼusi leque xchiʼuc li cʼusitic lec tucʼ chijʼacʼbate jaʼ te ta xlic tal ta vinajel» (Sant. 1:17). Li Jeovae chakʼ kiltik slekil yoʼonton ti mu jtatik-o kʼalal chakʼbutik li matanaletik taje. Jtos li matanal chkichʼtik ti toj tsots skʼoplale jaʼ li chʼul espiritue. Yuʼun li matanal taje tskoltautik ta xchʼiesel jtalelaltik kʼuchaʼal kʼanelal, slekil oʼontonal xchiʼuk ti mu jtoy jbatike, mi jaʼ jech jtalelaltike jaʼ me tstij koʼontontik ti akʼo jkʼuxubin li kermanotaktike xchiʼuk ti akʼo jkoltatike. Jech xtok, li pʼijilal xchiʼuk li yojtikinele jaʼ me matanaletik ta jtatik koliyal li chʼul espiritue (1 Cor. 2:10-16; Gál. 5:22, 23). Jech ta melel, skotol li jpʼijiltik, li kʼusitik xi jtojob ta spasel xchiʼuk li jlekil talelaltike jaʼ me matanaletik yakʼojbutik li jTotik ta vinajel sventa jkʼupil kʼoptatik xchiʼuk xkichʼtik ta mukʼe. Li Diose tskʼan ti akʼo jtunestik li matanaletik taje sventa xkʼot ta stojolal kermanotaktik li slekil yoʼonton Dios ti mu jtatik-oe.
¿Kʼuxi ta jtunestik li matanal akʼbilutike?
7. 1) ¿Kʼusi skʼan xal kʼalal «ti kʼuyepal ataoj amotonik ta jujuntale», xie? 2) ¿Kʼusitik skʼan jakʼbe jbatik, xchiʼuk kʼu yuʼun?
7 Xi laj yalbe skʼoplal Pedro li matanaletik akʼbilutike: «Ti kʼuyepal ataoj amotonik ta jununtale tunesik». Kʼuchaʼal chal kaʼitike, mu parejouk stalelal xchiʼuk kʼusitik xtojob spasel skotol li krixchanoetike xchiʼuk mu parejouk chchʼi batel yuʼunik taje. Akʼo mi jech, li jtakbole tstij koʼonton jkotoltik ti akʼo «[jtunestik] ta stojolal yantik» ti kʼusiuk matanal jtaojtike. Tsots me skʼoplal ti jkʼeltik lek ti jaʼ jun mantal chi j-albat kʼalal xi laj yale: «Tunesik [...] kʼuchaʼal lekil jchabi naetik». Jaʼ yuʼun skʼan xi jakʼbe jbatike: «¿Mi yakal ta jtunes sventa ta jkolta kermanotak li matanaletik yakʼojbun Jeovae?» (koʼoltaso xchiʼuk 1 Timoteo 5:9, 10). «¿O mi yakal van ta jtunes sventa chi pas-o ta jkʼulej, ta slekubtasel jkuxlejal o ta saʼel li kʼusitik ta jkʼan jtuke?» (1 Cor. 4:7.) Toj lek chil Jeova kʼalal jaʼ ta jtunestik sventa ta jkolta jbatik ta jujuntal li matanal akʼbilutike (Pro. 19:17; kʼelo Hebreos 13:16).
8, 9. 1) ¿Kʼutik yelan jlomuk tskolta yermanotakik li yajtsʼaklomtak Cristoe? 2) ¿Kʼuxi tskolta sbaik li ermanoetik ta atsobobbaile?
8 Li Vivliae chal kaʼitik ti ep ta tos kʼuxi la skolta yermanotakik li yajtsʼaklom Cristo ta baʼyel sigloe (kʼelo Romanos 15:25, 26 xchiʼuk 2 Timoteo 1:16-18). Jaʼ jech li avi eke, li melel yajtsʼaklomtak Cristoe tukʼ chchʼunik li mantal ti akʼo stunesik sventa tskolta yermanotakik li matanal akʼbilike. Jkʼeltik avil kʼuxi tspasik.
9 Ep ermanoetike toj ep chchʼakbeik yorail ta jujun u sventa chchapanik li mantal chetʼesike xchiʼuk tsaʼik yan mantaletik ti ep sbalil sventa chalik li ta tsobobbaile. Jaʼ jech tskoltaik li tsobobbail sventa xkuch-o yuʼunik vokolil kʼalal tsabeik lek smelol li kʼusi chalike (1 Tim. 5:17). Oy tukʼil ermanoetik xchiʼuk ermanaetik ti toj lek snaʼ xkʼuxubinik xchiʼuk skoltaik li ermanoetike (Rom. 12:15). Oy yantik xtoke muʼyuk bu chchʼay ta yoʼontonik svulaʼanel li buchʼutik chat yoʼontonike xchiʼuk ti tspasik orasion xchiʼukike (1 Tes. 5:14). Yantike ta stsʼibaik kartaetik ti toj kʼupilik sba sventa tspatbeik yoʼonton li buchʼutik yakal chil svokolike. Yantik xtoke ch-abolaj chikʼik echʼel ta tsobajeletik li buchʼutik ip chaʼiike. Xchiʼuk ta smilal noʼox ti ch-abtejik ta jkoltavaneje, tskolta sbaik ta xchaʼvaʼanbel snaik li ermanoetik ti laj yil svokolik ta nojelal ta voʼo ta yan kʼusitike. Li slekil yoʼontonik xchiʼuk li koltael chlokʼ ta yoʼontonik li yajtsʼaklomtak Cristo ta sventa yichʼel ta kʼux li yermanotakike jaʼ me svinajeb «li slekil yoʼonton Dios ti mu jtatik-oe, ti ep ta chop kʼuxi vinajeme» (kʼelo 1 Pedro 4:11).
¿Bu junukal abtelal ti mas tsots skʼoplale?
10. 1) ¿Kʼusi chaʼtos chʼul abtelal laj yakʼ ta yoʼonton li Pabloe? 2) ¿Kʼuxi xuʼ jchanbetik stalelal li Pabloe?
10 Maʼuk noʼox jmotontik ti skʼan jkolta li kermanotaktike, yuʼun kichʼojtik jun aʼyej xtok ti skʼan xkalbetik li krixchanoetike. Li jtakbol Pabloe laj yakʼ venta ti akʼbil yuʼun Dios li xchaʼtosal abtelal taje. Xi laj yalbe li yajtsʼaklomtak Cristo ta Efesoe: ta «slequil noʼox yoʼnton Dios laj yacʼbun cabtel», jaʼ xkaltik, li yabtel akʼbil ta jchabi na sventa tskolta li yermanotake (Efe. 3:2). Pe xi laj yal xtoke: «Xuʼ cuʼuncutic laj yil li Diose, jech laj yacʼbun cabtelcutic xcholel li Lequil Aʼyeje» (1 Tes. 2:4). Jech kʼuchaʼal li Pabloe, jnaʼojtik lek ti akʼbil jbaintik xcholbel skʼoplal li Ajvalilal yuʼun Dios eke. Li Pabloe muʼyuk xlubtsaj ta xcholbel skʼoplal li lekil aʼyeje, jaʼ yuʼun ta xkakʼbetik yipal xchanbel stalelal kʼalal ta sjunul koʼontontik ta jcholtik mantale (Hech. 20:20, 21; 1 Cor. 11:1). Jnaʼojtik lek ti jaʼ sventa sta skolel krixchanoetik li xcholbel skʼoplal Ajvalilal yuʼun Diose, pe jnaʼojtik lek xtok ti skʼan onoʼox me xkalbe kermanotaktik li kʼusi yakʼojbutik Dios kʼuchaʼal la spas Pabloe (kʼelo Romanos 1:11, 12; 10:13-15).
11. ¿Kʼu yelan skʼan xkiltik li kabteltik ta chol mantale xchiʼuk li stsatsubtasel kermanotaktike?
11 ¿Bu junukal li mas tsots skʼoplale? Parejo tsots skʼoplal. Jech kʼuchaʼal xikʼtak jkot mut. Jech kʼuchaʼal chtun yuʼun xchaʼjotal xikʼ li mut sventa chvil-oe, sventa lek tsʼakalutik ek kʼuchaʼal yajtsʼaklom Cristoe skʼan me jpastik xchaʼtosal li chʼul abtelale. Jaʼ yuʼun chaʼa, mu me jnoptik ti parte skʼoplal li kabteltik ta chol mantale xchiʼuk ti parte li spatbel yoʼonton kermanotaktike, jaʼ me jech ta jtsaktik ta mukʼ kʼuchaʼal la spas Pedro xchiʼuk Pabloe: chaʼtos abtelal ti tstsʼakubtas sbaike. ¿Kʼuxi tstsʼakubtas sbaik taje?
12. ¿Kʼuxi tstunesutik li Jeovae?
12 Li ta chol mantale ta jtunes jpʼijiltik sventa ta jchanubtastik yan krixchanoetik xchiʼuk ti ta jkʼantik ti chkʼot ta yoʼontonik li aʼyej sventa Ajvalilal yuʼun Dios ti tspat oʼontonale. Jaʼ jech ta jkoltatik sventa xkʼotik ta yajtsʼaklom Cristo. Pe ta jtunes jpʼijiltik xtok xchiʼuk jtalelaltik sventa ta jpatbetik yoʼonton li kermanotaktike. Li kʼusi chkaltik kʼalal ta jpatik oʼontonale xchiʼuk ti mu kʼusi ta jkʼantik ta skoj li kʼusi ta jpastike jaʼ me svinajeb ta melel li slekil yoʼonton Dios ti mu jtatik-oe (Pro. 3:27; 12:25). Vaʼun jaʼ jech ta jkoltatik sventa stsʼakliik-o echʼel li Cristoe. Ta xchaʼtosal abtelal jtaojtik mukʼta matanal, jaʼ ti tstunesutik li Jeovae. Li abtelal taje jaʼ ti ta jcholbetik mantal li krixchanoetike xchiʼuk ti ta jkoltatik li kermanotaktike (Gál. 6:10).
«Talbat xacʼan abaic»
13. ¿Kʼusi van chkʼot ta pasel mi muʼyuk xa ta jkolta jbatik ta jujuntale?
13 Xi la stijbe yoʼonton yermanotak li Pabloe: «Talbat xacʼan abaic ta sventa ti coʼol achʼunojique. Talbat chavichʼ abaic ta mucʼ» (Rom. 12:10). Ta sventa ti jkʼanoj li kermanotaktike jaʼ tstij koʼontontik ti akʼo xi jtun ta sjunul koʼontontik kʼuchaʼal jchabi naetik ta sventa slekil yoʼonton Dios ti mu jtatik-oe. Jnaʼojtik lek mi kuch yuʼun Satanás ti akʼo mu xa jkolta jbatik ta jujuntale, ta me sok ta be ti jmoj oyutike (Col. 3:14). Mi sok xaʼox ti kʼuyelan jmoj oyutike ta me xjutukaj li jmuyubajeltik ta chol mantale. Li Diabloe snaʼoj ti chi jyal ta lum akʼo mi jun noʼox jxikʼtik xyayij xkaltike.
14. ¿Buchʼutik tstabe sbalil kʼalal ta jkolta li kermanotaktike? Albo junuk skʼoplal.
14 Kʼalal ta jkolta li kermanotaktike maʼuk noʼox tstabeik sbalil, yuʼun ta jtabetik sbalil ek (Pro. 11:25). Jaʼ jech chakʼ ta ilel li kʼusi kʼot ta stojolalik Ryan xchiʼuk Roni, jun nupul-tsʼakal ta Illinois (Estados Unidos). Kʼalal laj yaʼiik ti ta sienaltak noʼox lom snaik li ermanoetik ta skoj li tsatsal ikʼal voʼ Katrinae, ta sventa ti skʼanoj li yermanotakike laj yikta yabtelik xchiʼuk laj yikta li sna bu toʼox nakalike. La sman snaik ti stakʼ jochel echʼele (casa remolque) ti maʼuk xa achʼe, la smeltsanik vaʼun xanavik echʼel 1,400 kilometro kʼalal to ta Luisiana. Mas ta jun jabil te pajik, laj yakʼ skʼakʼalik, yipalik xchiʼuk kʼusitik x-ayan yuʼunik sventa tskolta li yermanotakike. Xi laj yal li Ryan ti yichʼoj 29 jabile: «La snopajesun mas ta stojolal Dios ti li abtej ta jkoltavaneje. Te laj kil ti toj lek chchabi steklumal li Jeovae». Xi to chal xtoke: «Kʼalal la jchiʼin ta abtel li ermanoetik ti lek xa xtojobike la jchan skoltael lek li ermanoetike. Jech xtok, laj kakʼ venta ti ep kʼusitik xuʼ jpaskutik ta slumal Jeova li kerem-tsebunkutike». Roni ti 25 jabil yichʼoje xi chale: «Ta jtoj ta vokol ti jech laj yakʼbikun jmoton ta skoltael li ermanoetike. Muʼyuk xkaʼi-o jech muyubajel. Li kʼusi laj yakʼ jchan li kʼusi toj alakʼ sba kʼot ta jkuxlejal liʼe ep me jabil chtun kuʼun».
15. ¿Kʼusitik srasonal oy kuʼuntik sventa xi jtun-o ta lekil jchabi naetik ta sventa li slekil yoʼonton Dios ti mu jtatik-oe?
15 Jech kʼuchaʼal chkiltike, ta me skoltautik jkotoltik kʼalal ta jchʼuntik li mantal ti akʼo jcholtik li lekil aʼyeje xchiʼuk ti akʼo jkolta li kermanotaktike. Li buchʼutik ta jkoltatike tstsatsub ta mantal chaʼiik, li voʼotik ek une xi jmuyubaj ti jech chi jkoltavane (Hech. 20:35). Li tsobobbaile toj lek tspat koʼonton chkaʼitik kʼalal oy ta koʼontontik ta jujuntal li ermanoetike. Mu me jchʼay ta joltik xtok ti jaʼ chvinaj-o lek ti jaʼutik melel yajtsʼaklomutik Cristo ti jkʼanoj jbatike. Xi laj yal li Jesuse: «Jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35). Mas to ep ta jtojbetik ta vokol li jkʼanvanej Totil Jeova kuʼuntike, yuʼun tspatbe yoʼonton ta stojolal yajtuneltak ta balumil li buchʼutik chil svokolike. Oy lek srasonal kuʼuntik ta melel sventa jtunestik li matanal kichʼojtik yoʼ jkolta jbatik ta jujuntal «kʼuchaʼal lekil jchabi naetik ta sventa li slekil yoʼonton Dios ti mu jtatik-oe». ¿Mi jech van cha pas-o? (Kʼelo Hebreos 6:10.)
¿Mi xvul ta ajol?
• ¿Kʼuxi tstsatsubtasbe yoʼonton yajtuneltak li Jeovae?
• ¿Kʼusi akʼbil jbaintik?
• ¿Kʼuxi xuʼ jkolta li kermanotaktike?
• ¿Kʼusi tstij koʼontontik ta stunesel sventa jkolta kermanotaktik li matanaletik akʼbilutike?
[Lokʼol ta pajina 15]
¿Mi yakal ta jtunes jpʼijiltik sventa ta jsaʼ jlekilal jtuktik o mi jaʼ sventa ta jkoltatik li yantike?
[Lokʼol ta pajina 16]
Oy me ta jbatik xcholel li mantale xchiʼuk ti jkolta li kermanotaktike
[Lokʼol ta pajina 16]
Li buchʼutik xmuyubaj noʼox tskolta li yermanotakike skʼan me jtsaktik lek ta mukʼ