Li kʼusitik tsjakʼ jkʼel vunetike

¿Kʼusi skʼan stsak ta venta jun krixchano mi tsnop chichʼ voʼ yan veltae?

Oy bateltike, xuʼ van xichʼ alel ti chʼabal sbalil ti laj yichʼ voʼ li jun krixchanoe xchiʼuk ti skʼan xichʼ voʼ yan veltae. Jech kʼuchaʼal liʼe, yikʼaluk van mu lekuk stalelal kʼalal laj yichʼ voʼe o ti jaʼo yakal spasel ta mukul junuk tsatsal mulil ti sta-o xichʼ lokʼesel ta tsobobbail li jun yajtsʼaklom Cristoe. ¿Mi laj van yakʼ sba ta stojolal Dios ti jech tspas taje? Muʼyuk. Skʼan baʼyel laj yikta spasel kʼusitik chopol jechuk sventa oyuk sbalil ti chakʼ sba ta stojolal Diose. Mi jaʼo laj yichʼ voʼ kʼalal jech chopol tspas stalelale, lek me ti snop xichʼ voʼ yan veltae.

Avi une jkʼelbetik skʼoplal jtos xtok ti jelel tajek kʼuchaʼal laj kaltike. Oy jun jcholmantal ti muʼyuk yakal tspas jtosuk tsatsal mulil ti kʼalal laj yichʼ voʼe, pe ta mas jelavele oy kʼusi la spas ti sta-o skʼel komite sventa chapanvaneje. ¿Mi xuʼ van xal ti muʼyuk sbalil ti laj yichʼ voʼ ta skoj ti mu toʼox van xaʼibe lek smelolal li kʼusi tspase? Kʼalal tskʼelbe skʼoplal komite sventa chapanvanej taje, li moletike mu me stakʼ xchibal kʼoptaik ti yichʼoj voʼ li ermanoe xchiʼuk mu me stakʼ sjakʼbeik kʼusi tsnop ta sventa taje. Yuʼun kʼalal laj yichʼ voʼe laj yaʼi li mantal ta Vivlia ti chal ti toj tsots skʼoplal li kʼusi la snop tspase. Xchiʼuk kʼalal kʼot yorail tstakʼ li chib sjakʼobil ta sventa ti laj yakʼ sba ta stojolal Dios xchiʼuk ta sventa ichʼ voʼe, jamal laj yal ti jech oy ta yoʼontone. Vaʼun la sjel skʼuʼ spokʼ xchiʼuk laj yichʼ mukel ta voʼ. Jaʼ yuʼun oy srasonal ti jnoptik ti laj yaʼibe lek smelolal ti tsots skʼoplal li kʼusi la spase, jaʼ yuʼun li moletike skʼan me jech xilik kʼuchaʼal jun yajtsʼaklom Cristo ti yichʼoj voʼe.

Mi mu snaʼ lek mi oy sbalil ti laj yichʼ voʼ li jun krixchanoe, li moletike xuʼ xakʼbeik yil mantaletik ta revista Li Jkʼel osil ta toyole ti lokʼemik ta voʼne ti chalbe skʼoplal ichʼ voʼe xchiʼuk ti jmojuk xchanbeik skʼoplale. Pe mi oy buchʼu tsnop ti persa skʼan xichʼ voʼ yan velta ta skoj kʼusitike (ta skoj van ti mu toʼox xaʼibe lek smelolal li chanubtaseletik ta Vivlia kʼalal laj yichʼ voʼe), jaʼ me tsnop stuk taje.

¿Kʼusi skʼan stsak ta mukʼ li yajtsʼaklom Cristo mi oy buchʼu chchiʼin ta nakleje?

Akʼo mi jkotoltik skʼan oy bu xi jnaki, toj ep xa noʼox krixchanoetik ti chʼabal snaike. Oy buchʼutik ti skʼan xchiʼin ta naklej snamtal utsʼ-alalik ta skoj ti oy svokolik ta takʼin, ta chamel xchiʼuk yan kʼusitike. Ta jlom lumetike mu xa labaluk ta kʼelel ti ep tstsob sbaik ta naklej ta jpʼej na li utsʼ-alaliletike, ti chʼabal xa ti stuk oyike.

Li s-organisasion Jeovae maʼuk oy ta sba skʼelel kʼuxi chnaki li krixchanoetike. Pe ti kʼusi chale jaʼ ti akʼo skʼel lek yajtsʼaklom Cristo li beiltaseletik ta Vivlia sventa xakʼ venta mi lek chil Dios o mi moʼoj ti kʼuyelan oye. ¿Kʼusi jlom li beiltaseletik taje?

Jtos ti kʼusi tsots skʼoplale jaʼ ti skʼelik kʼusi xuʼ xkʼot ta pasel ta stojolalike xchiʼuk ti skʼel mi chlekubik-o ta mantal o mi moʼoj kʼalal oy buchʼu chlik xchiʼinik ta nakleje. ¿Buchʼutik ti chchiʼin ta nakleje? ¿Mi jaʼ yajtuneltak Jeova? ¿Mi chakʼ ta xkuxlejalik li mantaletik ta Vivliae? Mu me jchʼay ta joltik li pʼijubtasel laj yal Pablo liʼe: «Mu me xalajic ta loʼlael. Muc loʼiluc ti oy jech chalique: “Me ta jchiʼintic li bochʼotic chopolique, chisoquesbutic li jlequil taleltique”» (1 Cor. 15:33).

Jech xtok, li Vivliae jamal lek chal ti muʼyuk lek chil Jeova li mulivajel xchiʼuk li buchʼu tsloʼla xchiʼil ta nupunele (Heb. 13:4). Kʼuk yelan ti kʼuyelan chnaki li krixchanoetike, pe li kʼusi muʼyuk lek chil li Diose jaʼ mi koʼol chnakiik jun tojol vinik xchiʼuk jun tojol ants ti xkoʼolaj xa kʼuchaʼal nupunemik ti kʼuyelan nakalike. Li yajtsʼaklom Cristoe mu me stakʼ te xnaki ti bu lek noʼox chilik mulivajele.

Jech xtok, li Vivliae xi chalbe mantal li buchʼutik tskʼan lek ch-ilatik yuʼun Diose: «Tscʼan chacomtsanic li mulivajele» (1 Cor. 6:18). Jaʼ yuʼun chaʼa, muʼyuk me lek mi oy buchʼu ta jchiʼintik ta naklej ti xuʼ te xlik-o mulivajele. Jech kʼuchaʼal liʼe, mi oy jayvoʼuk yajtsʼaklomtak Cristo nakal ta jpʼej nae, ¿mi yikʼaluk van xuʼ tsots kʼusi xkʼot ta pasel ta skoj? ¿Kʼusi van xuʼ xkʼot ta pasel ta stojolal jun vinik xchiʼuk jun ants ti maʼuk snup xchiʼil sbaik ti stuk te chkomik ta nae? Jaʼ jech toj xibal sba kʼusi xuʼ snuptanik ek li chaʼvoʼ kerem-tsebetik ti skʼanoj sbaik ti jmoj nakalike. Kʼalal oy jpʼijiltike ta jnoptik ti muʼyuk lek taje.

Mu me lekuk xtok ti jmoj to nakalik li buchʼutik laj xa xtuchʼ snupunelik ta registro civil. Yuʼun mu vokoluk xuʼ xpʼajik ta mulivajel ta skoj ti nopem xaʼi ti chchiʼin toʼox sbaike (Pro. 22:3).

Oy to me kʼusi toj tsots skʼoplal skʼan jtsaktik ta venta: jaʼ ti kʼusi tsnop li jlakʼnatike. Yikʼaluk van lek ti oy buchʼu xchiʼin ta naklej li yajtsʼaklom Cristoe, pe yikʼaluk van chopol xlik loʼilajuk li krixchanoetike. Pe mu me jkʼantik taje, yuʼun mu jkʼantik ti xichʼ chopol kʼoptabel sbi Jeova ta skoj jtalelaltike. Ti kʼusie ta jkʼan ta jchʼuntik li mantal laj yal Pablo liʼe: «Mu me bochʼo xbolib yoʼnton avuʼunic, me judío, me yanlum cristiano, o me steclumal Dios. Li vuʼune jaʼ ta jcʼan ti scotolic lec acʼo yilic scotol li cʼusitic ta jpase, yuʼun maʼuc noʼox oy ta coʼnton ta jsaʼ li cʼusi jaʼ sventa jlequilal jtuque. Oy ta coʼnton noxtoc li cʼusi jaʼ sventa slequilal yepal cristianoe, yuʼun jech xuʼ chcolic ec» (1 Cor. 10:32, 33).

Melel onoʼox ti tsots ta sabel smelolal ti jech xichʼ pasel kʼuchaʼal chal stukʼil mantaltak Jeovae. Pe ti kʼusi mas tsots skʼoplal chkaʼitik li yajtsʼaklomutik Cristoe «jaʼ [ti] oy ta coʼntontic o ta jpastic li cʼusitic lec chil Cajvaltique». Jaʼ yuʼun li yajtsʼaklom Cristoe, skʼan me skʼel lek ti mu kʼusi chopol xichʼ pasel ta snae (Efe. 5:5, 10). Jech oxal chaʼa, skʼan me skʼanbeik Jeova ti akʼo xbeiltasatike, ti akʼo xakʼbeik yipal sventa skʼel xchabi sbaik ta sbekʼtal stakopalike, li ta stalelalike xchiʼuk ti mu me xkʼexlaltasbeik sbi li Jeovae.