XCHANOBIL 23
¡Oy sbalil mi laj avichʼ voʼe!
Li Jesuse chanubtasvan ti skʼan xichʼ voʼ li buchʼu tskʼan chkʼot ta yajtsʼaklome (kʼelo Mateo 28:19, 20). Pe ¿kʼu yelan skʼan xichʼ pasel li ichʼvoʼe? Xchiʼuk ¿kʼusi skʼan spas li buchʼu tskʼan chichʼ voʼe?
1. ¿Kʼu yelan skʼan xichʼ pasel li ichʼvoʼe?
Li jpʼel kʼop ta griego ti chichʼ jelubtasel kʼuchaʼal ichʼvoʼe jaʼ smelolal «mukel ta voʼ». Kʼalal laj yichʼ voʼ li Jesuse, laj yichʼ mukel li ta ukʼum Jordane, laje lokʼ talel li ta voʼe (Markos 1:9, 10). Jech oxal chaʼa, kʼalal chichʼ voʼ sventa xkʼot ta yajtsʼaklom Kristo li jun krixchanoe, chichʼ mukel ta voʼ sjunlejal.
2. ¿Kʼusi chakʼ ta ilel li buchʼu chichʼ voʼe?
Kʼalal oy buchʼu chichʼ voʼe, chakʼ ta ilel ti yakʼojbe xa xkuxlejal li Jeovae. ¿Kʼusi skʼan spas li buchʼu tskʼan chakʼbe xkuxlejal li Jeovae? Skʼan skʼopon Jeova ta stuk sventa xalbe ti tskʼan chtun ta stojolal ta sbatel osile. Taje jaʼo tspas kʼalal skʼan toʼox xichʼ voʼe. Li ta orasion taje, te chalbe Jeova ti jaʼ noʼox tskʼan chichʼ ta mukʼe xchiʼuk ti jaʼ mas tsots skʼoplal chaʼi li kʼusi tskʼan yoʼontone. Jech xtok, chchanbe stalelal xchiʼuk chakʼ ta xkuxlejal li chanubtasel laj yakʼ Jesus ti xi laj yale: «Mi oy buchʼu tskʼan chtal ta jtojolale, akʼo sjip ta yoʼonton xkuxlejal [...] xchiʼuk akʼo stsʼakliun-o batel» (Mateo 16:24). Mi laj avakʼbe akuxlejal li Jeovae xchiʼuk mi laj avichʼ voʼe, mas to chavamigoin xchiʼuk lek tajek chavil aba xchiʼuk li buchʼutik chichʼik ta mukʼ Jeovae.
3. ¿Kʼusi skʼan spas li buchʼu tskʼan chichʼ voʼe?
Mi chakʼan chavichʼ voʼe, baʼyel skʼan xavojtikin mas li Jeovae xchiʼuk oyuk xchʼunel avoʼonton ta stojolal (kʼelo Ebreos 11:6). Mas to chakʼan Jeova mi laj avojtikin leke xchiʼuk mi ayan mas xchʼunel avoʼontone. Vaʼun, chlik ayanuk ta avoʼonton xcholel mantal xchiʼuk ta xchʼunbel li smantale (2 Timoteo 4:2; 1 Juan 5:3). Mi lik spas kʼusi lek chil Jeova li jun krixchanoe, xuʼ van x˗ayan ta yoʼonton xakʼbe xkuxlejal li Diose xchiʼuk ti xichʼ voʼe (Kolosenses 1:9, 10).a
JCHANTIK TO BATEL MAS
Jkʼeltik batel kʼusi chakʼ jchantik ti kʼu yelan laj yichʼ voʼ li Jesuse. Jech xtok, jkʼeltik kʼuxi xuʼ xchapan sba li buchʼu tskʼan chichʼ voʼe.
4. ¿Kʼusi chakʼ jchantik ti kʼu yelan laj yichʼ voʼ li Jesuse?
Sventa jnaʼtik kʼu yelan laj yichʼ voʼ li Jesuse, kʼelik Mateo 3:13-17. Mi laje, albeik skʼoplal li sjakʼobiltak liʼe:
Kʼalal laj yichʼ voʼ li Jesuse, ¿mi uni neneʼ toʼox?
¿Mi naka noʼox la svijbeik voʼ ta sjol? Vaʼun chaʼa, ¿kʼu yelan laj yichʼ voʼ?
Kʼalal laj yichʼ voʼ li Jesuse, jaʼo lik spas li abtelal akʼbil sbain yuʼun Diose. Kʼelik Lukas 3:21-23 xchiʼuk Juan 6:38 xchiʼuk albeik skʼoplal li sjakʼobil liʼe:
Kʼalal laj xa ox yichʼ voʼ li Jesuse, ¿kʼusi abtelal laj yakʼ ta yoʼonton spasel?
5. ¡Xuʼ me xavichʼ voʼ!
Kʼalal ta jnopbetik skʼoplal ti chkakʼ jkuxlejaltik ta stojolal Dios xchiʼuk ti chkichʼtik voʼe, xuʼ van chijxiʼ-o yuʼun. Pe mi mas laj avojtikin batel li Jeovae, xuʼ me xlik anop ti xavichʼ voʼe. Sventa xavojtikin junantik krixchanoetik ti pas yuʼunike, kʼelik li VIDEOE.
Kʼelik Juan 17:3 xchiʼuk Santiago 1:5 xchiʼuk albeik skʼoplal li sjakʼobil liʼe:
¿Kʼusi xuʼ xkoltaat li buchʼu tskʼan chichʼ voʼe?
Chkakʼbe jkuxlejaltik Jeova kʼalal chkalbetik ti chijtun ta stojolal ta sbatel osile.
Kʼalal chkichʼtik voʼe, chkakʼtik ta ilel ti kakʼoj xa jkuxlejaltik ta stojolal Diose.
6. Chijkʼot ta yutsʼ yalal Jeova mi laj kichʼtik voʼe
Mi laj kichʼtik voʼe, kutsʼ kalal jbatik chijkʼot xchiʼuk li ermanoetik ta spʼejel balumile. Mu ventauk bu likemutik tal o kʼu yelan echʼem jkuxlejaltik, yuʼun koʼol kʼusi jchʼunojtik xchiʼuk ta jchʼuntik li kʼusi chal Vivliae. Kʼelik Salmo 25:14 xchiʼuk 1 Pedro 2:17 xchiʼuk albeik skʼoplal li sjakʼobil liʼe:
Mi laj kichʼtik voʼe, ¿kʼu yelan chkil jbatik xchiʼuk Jeova xchiʼuk li buchʼutik chichʼik ta mukʼe?
JUNANTIKE XI CHALIKE: «Muʼyuk to chapalun chkaʼi sventa xkichʼ voʼ».
Akʼo mi jech chavaʼi aba ek, ¿mi mu lekuk xanaʼ ti xanopbe skʼoplal sventa xavichʼ voʼe?
¿KʼUSI LA ACHAN?
Li Jesuse laj yal ti skʼan xichʼ voʼ li buchʼu tskʼan chkʼot ta yajtsʼaklome. Sventa spas avuʼune, skʼan oyuk xchʼunel avoʼonton ta stojolal Jeova, ti xachʼun li kʼusi chale xchiʼuk ti xavakʼ akuxlejal ta stojolale.
Svulesobil ta joltik
¿K’u yelan li ich’voʼe xchiʼuk k’u yuʼun tsots skʼoplal?
¿Kʼusi chakʼ ta ilel li ichʼvoʼe?
¿Kʼusi skʼan spas li buchʼu tskʼan chakʼbe xkuxlejal Dios xchiʼuk ti xichʼ voʼe?
XUʼ TO XAKʼEL LIʼE
Kʼelavil kʼu yelan chichʼ pasel li ichʼvoʼe xchiʼuk li kʼusi jecheʼ xchʼunojik junantike.
Kʼelavil kʼusitik xuʼ xapas sventa xavichʼ voʼe.
«¿Kʼusi xuʼ stij avoʼonton sventa xavichʼ voʼ?» (Li Jkʼel-osil ta toyole, marso ta 2020)
Kʼelavil sloʼil xkuxlejal jun vinik ti la snopbe lek skʼoplal kʼalal laj yichʼ voʼe.
«Tskʼanik ti xkakʼ venta jtuk bu li melele» (Li Jkʼel-osil ta toyole, 1 yuʼun fevrero ta 2013)
Kʼelavil kʼu yuʼun oy sbalil ti xanopbe skʼoplal li ichʼvoʼe xchiʼuk li kʼusitik xuʼ xapas sventa xatae.
«¿Mi skʼan van xkichʼ voʼ?» (Li kʼusi tsjakʼ kerem tsebetike. Stakʼobiltak, volumen 2, kapitulo 37)
a Mi oy xa buchʼu yichʼoj voʼ ta yan relijione, skʼan to me xichʼ voʼ yan velta. ¿Kʼu yuʼun? Yuʼun li ta relijion ti bu laj yichʼ voʼe, muʼyuk laj yichʼ chanubtasel lek ta sventa li kʼusi chal Vivliae (kʼelo Echos 19:1-5 xchiʼuk li xchanobil 13).