Kapitulo 12
Li smelolal ichʼ voʼe
1. ¿Kʼu yuʼun skʼan oyuk ta koʼontontik li ichʼ voʼe?
LI TA sjabilal 29 t.jkʼ., li Juan J-akʼvanej ta voʼe, laj yakʼbe yichʼ voʼ li Jesuse, la smuk ta yukʼumal Jordán, li Jeovae te skʼeloj xchiʼuk laj yal ti lek li kʼusi kʼot ta pasele (Mateo 3:16, 17). Ti kʼuyelan laj yichʼ voʼ li Jesuse, jaʼ te laj yakʼ ta ilel kʼuyelan skʼan spasik skotol li yajtsʼaklomtake. Ta yoxibal jabil xchiʼuk oʼlol ta mas tsʼakale, xi laj yal mantal li Jesuse: «Ti Diose laj xa yacʼbun ta coc ta jcʼob scotol ti cʼusitic oy ta vinajele xchiʼuc ti cʼusitic oy ta banomile. Batanic ta stojol scotol ti jnaclejetic ta banomil ti oyic ta jujun mucʼtiquil lum ta sjoylej banomile. Ba pasic ta cajchancʼop. Acʼbeic yichʼ voʼ ta sventa ti Dios Totile, ta jventa ti Nichʼonilune, ta sventa ti Chʼul Espiritue», xi (Mateo 28:18, 19, Ch). ¿Mi avichʼoj xa voʼ jech kʼuchaʼal li mantal laj yal Jesuse? Mi muʼyuk toe, ¿mi yakal xa cha nop ta sventa taje?
2. ¿Kʼusitik sjakʼobiltak ta sventa ichʼ voʼ skʼan xichʼ takʼel?
2 Jech, skotol li krixchano ti chtun yaʼi ta stojolal Jeovae xchiʼuk ti chkuxi yaʼi li ta achʼ balumil Yuʼune, tsots skʼoplal ti akʼo xaʼibe lek kʼusi smelolal li ichʼ voʼe. Jlom sjakʼobiltak ti skʼan xichʼ takʼele, jaʼ liʼe: ¿Mi xkoʼolaj smelolal li ichʼ voʼ yuʼun yajtsʼaklomtak Cristo li avie xchiʼuk li ichʼ voʼ yuʼun Jesuse? ¿Kʼusi smelolal ti chkichʼtik voʼ «ta sventa ti Dios Totile, [...] ta [s]venta ti Nichʼonil[e], [xchiʼuk] ta sventa ti Chʼul Espiritue»? ¿Kʼusitik smakoj batel li ichʼ voʼ ta jkuxlejaltike?
Li ichʼ voʼ la spas Juane
3. ¿Buchʼutik noʼox ta sventa li ichʼ voʼ ti laj yakʼ li Juane?
3 Kʼalal skʼan toʼox vakibuk u xichʼ voʼ li Jesuse, li Juan J-akʼvanej ta voʼe lik xchol ta taki xokol balumil yuʼun Judea li mantal liʼe: «Suteso avoʼntonic, yuʼun nopol xa yorail chlic ventainvanuc li Diose», xi (Mateo 3:1, 2). Li buchʼutik laj yaʼiik li mantal taje xchiʼuk ti la stsakik lek ta mukʼe laj yakʼik ta ojtikinel li smulike, la sutes yoʼontonik xchiʼuk batik ta stojolal Juan sventa chichʼik voʼ te ta yukʼumal Jordán. Li ichʼ voʼ ti laj yakʼ li Juane, jaʼ noʼox ta sventa li judioetike (Lucas 1:13-16; Hechos 13:23, 24).
4. ¿Kʼu yuʼun skʼan xa noʼox sutes yoʼontonik li judioetik ta baʼyel sigloe?
4 Skʼan xa noʼox sutes yoʼontonik li judioetik taje. Li ta sjabilal 1513 kʼ.m.jkʼ., skotol li smoltotakik ta slumal Israele la xchap lek skʼopik ti toj tsots skʼoplal xchiʼuk li Jeova Dios te ta vits Sinaie, la spasik jun trato ti oy lek sbalile. Pe kʼalal la spasik tsots mulile, muʼyuk bu ipas yuʼunik li kʼusitik skʼan pasel li ta trato taje, jech oxal, liʼe akʼbat yilik ti oy smulike. Li ta skʼakʼalil Jesuse, ti kʼuyelan li xkuxlejal jteklume solel toj chopol. Nopol xaʼox li «scʼacʼalil li Mucʼul Diose, jaʼ li jun cʼacʼal ti toj tsots, ti toj xiʼbal sbae», ti yalojbe xa onoʼox skʼoplal li Malaquiase. Li «scʼacʼalil» taje kʼot ta sjabilal 70 t.jkʼ., kʼalal li soltaroetik ta Romae bat sjinesik li Jerusalén xchiʼuk li xchʼulnaile, mas ta jun miyon lajik li judioetike. Li Juan J-akʼvanej ta voʼe, ti laj yakʼ ta ilel ti ta sjunul yoʼonton ta xichʼ ta mukʼ ta melel li Diose, laj yichʼ takel batel kʼalal mu toʼox chtal li lajelal taje, sventa «jech lec chapal li steclumal Cajvaltic cʼalal chtale». Li judioetike skʼan sutes yoʼontonik ta sventa li smulik ta skoj ti muʼyuk la spasik li kʼusi chal li trato ta sMantal Moisese xchiʼuk ti akʼo xchapan sbaik ta xchʼamel ti buchʼu ta stak tal li Jeovae, jaʼ xkaltik, li Jesuse (Malaquías 4:4-6; Lucas 1:17; Hechos 19:4).
5. 1) Li Juane, ¿kʼu yuʼun mu ox skʼan xakʼbe yichʼ voʼ li Jesuse? 2) ¿Kʼusi laj yakʼ ta ilel ti laj yichʼ voʼ li Jesuse?
5 Li buchʼutik ay yichʼik voʼ ta stojolal li Juane te ay yichʼ voʼ ek li Jesuse. Pe, ¿kʼu yuʼun? Li Juane xi laj yale: «Voʼot chavacʼbun quichʼ voʼ ti jechuque. ¿Me smelol ti voʼot tal acʼanbun ichʼ voʼe?» xut, yuʼun li Juane snaʼoj ti muʼyuk smul li Jesuse. Pe kʼalal laj yichʼ voʼ li Jesuse yan-o kʼusi laj yakʼ ta ilel, jech oxal xi la stakʼe: «Jaʼ lec acʼbun quichʼ voʼ, yuʼun tscʼan acʼo jpastic scotol cʼusi tscʼan li Diose», xi (Mateo 3:13-15). Ta sventa ti muʼyuk smul li xNichʼon Diose, kʼalal laj yichʼ voʼe maʼuk laj yakʼ ta ilel ti tsutes yoʼonton ta skoj smule; jech xtok maʼuk laj yakʼ ta ilel ti chakʼ sba ta stojolal Jeovae, moʼoj, yuʼun li ta slumal ti bu likem tale oy xa onoʼox ta stojolal Dios. Ti laj yichʼ voʼ kʼalal yichʼoj xaʼox 30 jabile, jaʼ skʼelobil ti tskʼan tspasbe li kʼusi tskʼan yoʼonton li sTot ta vinajele, taje mu xkoʼolaj kʼuchaʼal li yantik ichʼ voʼe.
6. ¿Kʼu yelan la stsak ta mukʼ spasbel kʼusi tskʼan yoʼonton Dios li Jesuse?
6 Li kʼusi tskʼan yoʼonton Dios ta sventa li Cristo Jesuse tsakal skʼoplal xchiʼuk li abtelaletik yuʼun li Ajvalilal yuʼun Diose (Lucas 8:1) xchiʼuk ti chakʼ ta matanal pojelal li stukʼil kuxlejal ti jaʼ chtun sventa slikeb jun achʼ trato o kʼusi achʼ chapanbil (Mateo 20:28; 26:26-28; Hebreos 10:5-10). Li Jesuse lek la stsak ta mukʼ li kʼusi laj yakʼ ta ilel kʼalal laj yichʼ voʼe, jech oxal muʼyuk kʼusi laj yakʼ ti akʼo xchʼaybat-o yoʼonton ta spasele. Jaʼ laj yabtelan ta xcholbel skʼoplal li Ajvalilal yuʼun Diose, jech la spas batel jaʼ to kʼalal ichame, tukʼ la spas batel li kʼusi tskʼan Diose (Juan 4:34).
Li ichʼ voʼ ta sventa li yajtsʼaklomtak Cristoe
7. ¿Kʼusi mantal ta sventa ichʼ voʼ lik kʼotuk ta pasel yuʼunik li yajtsʼaklomtak Cristo ta Pentecostés ta sjabilal 33 t.jkʼ.?
7 Li Juane laj yakʼbe yichʼ voʼ li buchʼutik baʼyel chkʼotik ta yajtsʼaklom li Jesuse xchiʼuk la sbeiltasan echʼel ta stojolal, taje jaʼ me jech xuʼ chkʼotik ta ajvalil ta vinajel ek (Juan 3:25-30). Ta smantal li Jesuse, li yajtsʼaklomtake laj yakʼik ichʼ voʼ ek, ti xkoʼolaj smelolal kʼuchaʼal la spas li Juane (Juan 4:1, 2). Pe li ta Pentecostés ta sjabilal 33 t.jkʼ., lik xchʼunik batel li mantal ti chakʼbeik yichʼ voʼ li krixchanoetik «ta sventa ti Dios Totile, [...] ta [s]venta ti Nichʼonil[e], [xchiʼuk] ta sventa ti Chʼul Espiritue» (Mateo 28:19). Ta melel toj tunel me avuʼun xchanel li kʼusi smelolal taje.
8. ¿Kʼusi smelolal ti chichʼ ichʼel voʼ «ta sventa ti Dios Totile»?
8 ¿Kʼusi smelolal ti chichʼ ichʼel voʼ «ta sventa ti Dios Totile»? Jaʼ smelolal ti chichʼ ichʼbel ta mukʼ li sbie, ti jaʼ noʼox stuk Mukʼul Diose, ti chichʼ ichʼbel ta mukʼ li ajvalilal yuʼune, li kʼusi tskʼan tspase xchiʼuk li smantaltake. Nopo avaʼi li kʼusitik smakoj batele: 1) Ta sventa li sbie, li Salmo 83:18 ta Traducción del Nuevo Mundo xi chale: «Ti voʼote, ti jaʼ Jeova abie, voʼot noʼox atuk ti Toj Toyol Oyot ta sba spʼejel li balumile». 2) Ta sventa ti jaʼ noʼox stuk Mukʼul Diose, li 2 Reyes 19:15 xi chale: «Mucʼul Dios [...]. Voʼot noʼox atuc Diosot». 3) Ta sventa li ajvalilal yuʼune, li Apocalipsis 4:11 xi chale: «Cajval, voʼot Diosot cuʼuncutic, voʼot noʼox atuc oy ta aventa albel alequilal, ichʼel ta mucʼ, xchiʼuc voʼot noʼox atuc oy avuʼel. Yuʼun voʼot laj apas scotol li cʼusitic oye, yuʼun jech la scʼan avoʼnton ti jech oye, ti jech iʼayin scotole». 4) Skʼan jnaʼtik noxtok ta sventa ti jaʼ J-akʼ kuxlejale, yuʼun tspojutik li ta mulile xchiʼuk li ta lajelale: «Mucʼul Dios, voʼot noʼox xuʼ chacoltavan» (Salmo 3:8; 36:9). 5) Jech noxtok, skʼan jtsaktik lek ta venta ti jaʼ noʼox Mukʼta Jchapanvaneje: «Yuʼun jaʼ jchapanvanej cuʼuntic stuc li Mucʼul Diose; jaʼ tspas mantal stuc, jaʼ mucʼul ajvalil cuʼuntic» (Isaías 33:22). Kʼalal chkiltik ti kʼuyelan li Diose, jech ta xkichʼtik albel li mantal liʼe: «Cʼano me ta scotol avoʼnton li Dios avuʼune, xchiʼuc ta scotol achʼulel, xchiʼuc ta scotol ajol» (Mateo 22:37).
9. ¿Kʼusi smelolal ti chichʼ ichʼel voʼ «ta [s]venta ti Nichʼonil[e]»?
9 ¿Kʼusi smelolal ti chichʼ ichʼel voʼ «ta [s]venta ti Nichʼonil[e]»? Jaʼ smelolal ti chichʼ ichʼbel ta mukʼ li sbie, ti buchʼu ta melele xchiʼuk li ajvalilal yuʼun li Jesucristoe. Li sbi Jesuse, jaʼ smelolal «jaʼ Chpojvan li Jeovae». ¿Buchʼu jaʼ ta melel? Jaʼ li jun noʼox xNichʼon Diose, jaʼ baʼyel laj yichʼ pasel ta skotol li kʼusitike (Mateo 16:16; Colosenses 1:15, 16). Ta Juan 3:16 xi chalbutik ta sventa li Jesuse: «Toj ep la xcʼuxubin scotol cristianoetic ta banamil li Diose [krixchanoetik ti xuʼ ta xichʼik pojele], jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil», xi. Ta skoj ti lek tukʼ yoʼonton ichame, laj yichʼ chaʼkuxesel yuʼun Dios xchiʼuk mas to tsots yabtel akʼbat. Jech kʼuchaʼal chal li jtakbol Pabloe, «la stoy muyel cʼalal to ta toyol» vinajel-balumil, jaʼ xa noʼox jaʼ bankilal kʼotem yuʼun li Jeovae. Jech un chaʼa «jech ta sventa sbi Jesús [skʼan] squejan sbaic [...]. Scotol[ik] ta jujuchop cʼop chlic yalic ta jamal ti jaʼ Ajvalil stuc li Jesucristoe; jech ichʼbil ta mucʼ chcʼot li Dios Totile» (Filipenses 2:9-11). Kʼalal chichʼ alel ta jamal ti jaʼ ajvalil li Jesuse, jaʼ me smelolal ti skʼan chʼunbel li smantaltak ti likem tal ta stojolal Jeovae (Juan 15:10).
10. ¿Kʼusi smelolal ti chichʼ ichʼel voʼ «ta sventa ti Chʼul Espiritue»?
10 ¿Kʼusi smelolal ti chichʼ ichʼel voʼ «ta sventa ti Chʼul Espiritue»? Jaʼ smelolal ti jnaʼojtik li kʼusi tspase xchiʼuk li yabteltake. ¿Kʼusi jaʼ li chʼul espiritue chaʼa? Jaʼ li yip ch-abtej ti Jeovae, ti jaʼ tstunes sventa chkʼot ta pasel yuʼun li kʼusi tskʼan yoʼontone. Li Jesuse xi laj yalbe li yajtsʼaklomtake: «Ta jcʼanbe li Jtote ti acʼo stacboxuc talel li Chʼul Espíritue yoʼ chtal scoltaoxuc. Jaʼ chaschiʼinic sbatel osil. Jaʼ sventainoj eʼuc li cʼop ti jaʼ melele» (Juan 14:16, 17, Achʼ Testamento, ta skʼop San Andrés). ¿Kʼusi chkʼot ta pasel yuʼunik ti jech chkoltaatike? Li Jesuse xi laj yale: «Me laj avichʼic li Chʼul Espiritue, chavichʼic avuʼel atsatsalic. Jech voʼoxuc chavalic batel liʼ ta lum Jerusalén, xchiʼuc ta yosilal Judea, xchiʼuc ta Samaria banamil, xchiʼuc ta sbejel banamil li cʼusi laj avilic ta jventae», xi (Hechos 1:8). Ta sventa li chʼul espiritue, li Jeovae la spas ti akʼo xichʼ tsʼibael li Vivliae: «Li scʼop Diose mu ta yoʼntonuc cristiano ilocʼ tal. Jaʼ iventainatic yuʼun Chʼul Espíritu. Jaʼ viniquetic icʼopojic ta sventa Dios» (2 Pedro 1:21). Jech un chaʼa, kʼalal ta jchantik li Vivliae, chkiltik li yabtel chʼul espiritue. Yan ti kʼuxi xuʼ jtsaktik ta venta li yabtel xtoke jaʼ ti kʼalaluk ta jkʼanbetik Jeova «li yabtel Chʼul Espiritue», taje jaʼ chi skoltautik sventa «ta jcʼanan jbatic, xcuxet noʼox coʼntontic, jun noʼox coʼnton jcotoltic, oy smucʼul coʼntontic, lec noʼox chijcʼopojutic, oy slequil coʼntontic, oy xchʼunojel coʼntontic, mu jtoybauticuc, jnaʼtic spajesel jbatic» (Gálatas 5:22, 23).
11. 1) ¿Kʼusitik smakoj batel li ichʼ voʼ ta jkʼakʼaliltike? 2) ¿Kʼu yuʼun xkoʼolaj ta lajelal xchiʼuk ta chaʼkuxesel li ichʼ voʼe?
11 Li buchʼutik baʼyel laj yichʼik voʼ ti kʼuyelan laj yal Jesuse jaʼik li judioetik xchiʼuk li buchʼutik koʼol xa srelijionik xchiʼuk li judioetike, ti lik tal ta sjabilal 33 t.jkʼ. Ta mas tsʼakal jutuke, laj yichʼik albel li jsamariaetik ti xuʼ chkʼotik ta yajtsʼaklomtak Cristo eke, ta sjabilal 36 t.jkʼ., li jyanlum krixchanoetik ti muʼyuk yichʼojik sirkunsisione xuʼ xkʼotik ta yajtsʼaklom Cristo ek. Kʼalal mu to ta xichʼik voʼe, li jsamariaetik xchiʼuk li jyanlum krixchanoetike skʼan chakʼ sbaik ta stojolal Jeova ta jujuntal sventa chtunik ta yajtsʼaklom li xNichʼone. Li avie jaʼ jech smelolal ek li ichʼ voʼ ta sventa li yajtsʼaklomtak Cristoe. Li mukel ta voʼe, jaʼ jun slekil kʼelobil ti yakʼoj sba ta stojolal Dios li jun krixchanoe, yuʼun xkoʼolaj xchiʼuk chichʼ mukel kʼalal ta xichʼ voʼe. Kʼalal ta xichʼ mukel ta voʼ li jun krixchanoe xkoʼolaj xchiʼuk chcham li xkuxlejal ta voʼnee, vaʼun kʼalaluk chlokʼ tal li ta voʼe xkoʼolaj xchiʼuk chchaʼkuxi sventa tspas li kʼusi tskʼan yoʼonton Diose. Skotol ti buchʼutik chkʼotik ta yajtsʼaklom Cristoe «jun noʼox li ichʼ [voʼ]» ta sventaike. Kʼalal ta xichʼike ta xkʼotik ta yajtsʼaklom Cristo xchiʼuk ta spasik ta yajrextikotak Jeova, ti biiltasbilik ta jtuneletik yuʼun Diose (Efesios 4:5; 2 Corintios 6:3, 4).
12. ¿Kʼusi xkoʼolaj skʼoplal xchiʼuk li ichʼ voʼ ta sventa li yajtsʼaklomtak Cristoe, xchiʼuk kʼu yuʼun?
12 Ta sat Diose, li ichʼ voʼe oy tsots sbalil ti chpojvane. Jech kʼuchaʼal liʼe, kʼalal laj xaʼox yalbe skʼoplal ti laj yichʼ meltsanel arka sventa kolik-o li Noé xchiʼuk li yutsʼ yalale, li jtakbol Pedroe xi la stsʼibae: «Li voʼ leʼe [ti kuxul echʼ ta Nojelal ta voʼ li Noee] jaʼ senyail li voʼ chquichʼtique, jech chijcolutic. Li voʼ chquichʼtique mu jaʼuc sventa chispocbutic jbecʼtaltic. Jaʼ sventa ti lecuben xa jol coʼntontic ta stojol Dios ta sventa ti ichaʼcuxi li Jesucristoe» (1 Pedro 3:21). Vinaj ti lek tukʼ la spasbe yabtel Dios li Noee yuʼun la spas li arkae. Kʼalaluk itsuts smeltsanele, tal li «pulel ta voʼ[e,] ichʼay li banamile» (2 Pedro 3:6). «Pero [...] jaʼ noʼox vaxquib icolic ta sventa li voʼe», jaʼ noʼox li Noé xchiʼuk li yutsʼ yalale (1 Pedro 3:20).
13. ¿Ta kʼusi ti chichʼ pojel lokʼel-o li yajtsʼaklom Cristo ta sventa li ichʼ voʼe?
13 Li avie, li buchʼutik ta xakʼ sbaik ta stojolal Jeova ta sventa ti oy xchʼunel yoʼontonik ta stojolal Cristo ti yichʼoj chaʼkuxesele, ta xichʼik voʼ sventa chakʼik ta ilel ti jech chakʼ sbaike. Vaʼun chlik spasbeik batel li kʼusi tskʼan yoʼonton Dios ta sventa li jkʼakʼaliltike xchiʼuk chpojatik lokʼel li ta chopol lum liʼe (Gálatas 1:3, 4). Maʼuk xa stamojbeik batel sbelel li lajelal ti jaʼ te chbat li kʼusitik chopol liʼ ta jkʼakʼaliltike. Ta xpojatik li ta lajelal taje, vaʼun ch-akʼbatik lek snopbenik yuʼun li Diose. Li jtakbol Juane xi chalbe ta melel li yajtuneltak Jeovae: «Li banamile xchiʼuc li cʼusi chacʼ batuc coʼntontic yuʼune, ta onoʼox xlaj; yan li bochʼo jaʼ tspasilan cʼusi tscʼan yoʼnton Diose jaʼ ta xcuxi sbatel osil», xi (1 Juan 2:17).
Jpastik me li kʼusitik oy ta jbatike
14. ¿Kʼu yuʼun mu xuʼ xkaltik ti ta xi jkolutik ta skoj ti kichʼojtik xa voʼe?
14 Muʼyuk me lek mi ta jnoptik ti yuʼun jaʼ xa ta jtaʼo jkuxlejaltik ti kichʼojtik xa voʼe. Jaʼ noʼox me oy sbalil mi ta sjunul yoʼonton yakʼoj sba ta stojolal Jeova ta sventa Jesucristo li jun krixchanoe xchiʼuk mi tukʼ yoʼonton ta spas batel kʼalal to ta slajebal li kʼusi tskʼan yoʼonton Diose. «Li bochʼo ta xcuch yuʼun cʼalal to ta slajebe jaʼ ta xcol.» (Mateo 24:13.)
15. 1) Li avie, ¿kʼusi tskʼan yoʼonton Dios ta sventa li yajtsʼaklomtak Cristo ti yichʼojik xa voʼe? 2) ¿Kʼusi mas tsots skʼoplal skʼan xkakʼ ta jkuxlejaltik kʼalal jaʼutik xa yajtsʼaklom Cristoe?
15 Li kʼusi tskʼan yoʼonton Dios ta sventa li Jesuse te tsakal skʼoplal xchiʼuk ti kʼuyelan la stunes xkuxlejale. Icham sventa chakʼ ta matanal li xkuxlejale. Li ta jtojolaltik eke, skʼan xkakʼtik ta stojolal Dios li jkuxlejaltike xchiʼuk ti ta jpastik batel li kʼusi tskʼan yoʼontone, kʼalal jech ta jpastike jaʼ me jech ta xkakʼtik ta ilel ti maʼuk ta jkʼuxubin jba jtuktike (Romanos 12:1, 2). Mi oy bakʼintik yalel xa jech chkakʼtik ta ilel jtalelaltik kʼuchaʼal li balumile, o mi jaʼ batem ta koʼontontik ta spasel li kʼusi ta jkʼan jtuktike xchiʼuk ti jaʼ noʼox ta jpasbetik yabtel Dios sventa noʼox xilutik yantik ti oy kʼusi lek ta jpastike li voʼotike muʼyuk me bu ta jpastik li kʼusi tskʼan yoʼonton Diose (1 Pedro 4:1-3; 1 Juan 2:15, 16). Jech jun veltae, jun judío vinik la sjakʼ kʼusi skʼan spas sventa tsta li kuxlejal sbatel osile, li Jesuse laj yakʼ ta ilel ti tsots skʼoplal ti skʼan sakuk li jtalelaltike, manchuk mi jech, oy to kʼusi mas tsots skʼoplal laj yal: jaʼ ti skʼan ta jtsʼaklitike, ti skʼan xi jkʼotutik ta yajtsʼaklome. Taje jaʼ me skʼan mas tsotsuk skʼoplal ta jkuxlejaltik. Mu me stakʼ jaʼ tsʼakal to chkakʼ ta jkuxlejaltik, ti jaʼ xa baʼyel ta jsaʼtik batel li kʼusitik ta jkʼantike (Mateo 19:16-21).
16. 1) ¿Kʼusi skʼan spasik skotol li yajtsʼaklomtak Cristo ta sventa li Ajvalilale? 2) Li ta pajina 116 xchiʼuk ta 117, ¿kʼusitik toj lek jtunel te chvinaj ta sventa xcholbel skʼoplal li Ajvalilale? 3) ¿Kʼusi chkakʼtik ta ilel mi ta sjunul koʼontontik ta jcholtik mantale?
16 Toj lek ti chkalbetik skʼoplal yan velta li kʼusi tskʼan yoʼonton Dios ta sventa li Jesuse ti te tsakal skʼoplal xchiʼuk li abtelaletik ti toj tsots skʼoplal ta sventa li Ajvalilal yuʼun Diose. Yuʼun maʼuk noʼox laj yichʼ tʼujel sventa chkʼot ta Ajvalil, yuʼun kʼalaluk liʼ toʼox oy ta Balumile ta sjunul yoʼonton laj yalbe batel skʼoplal li Ajvalilale. Jech me skʼan xkaltik ek, toj ep me srasonaltak kuʼuntik sventa chkaltik batel ta sjunul koʼontontik. Mi jech ta jpastike, ta me xkakʼtik ta ilel ti ta jtojbetik ta vokol li ajvalilal yuʼun Jeovae xchiʼuk ti jkʼanojtik li jchiʼiltaktike (Mateo 22:36-40). Jech noxtok, ta xkakʼtik ta ilel ti jmoj tsobolutik xchiʼuk li yantik ti chichʼik ta mukʼ Jeova ta spʼejel Balumile, ti chalbeik skʼoplal li Ajvalilale. Jmoj chi jxanav batel sventa ta jtatik li kuxlejal ta sbatel osil ta Balumil ti tsventain tal li Ajvalilale.
Svulesobil ta joltik
• Li ichʼ voʼ yuʼun Jesús xchiʼuk li ichʼ voʼ li avie, ¿kʼusi xkoʼolaj-o xchiʼuk kʼusi jelel-o?
• ¿Kʼusi smelolal ti chichʼ ichʼel voʼ «ta sventa ti Dios Totile, ta [s]venta ti Nichʼonil[e], ta sventa ti Chʼul Espiritue»?
• ¿Kʼusitik smakoj batel kʼalal ta xichʼ voʼ jun krixchano sventa chkʼot ta yajtsʼaklom Cristoe?
[Lokʼol ta pajina 116 xchiʼuk 117]
JLOM TI KʼUYELAN XUʼ CHKALBETIK SKʼOPLAL LI AJVALILALE
Kutsʼ kalaltik
Jchiʼiltaktik ta abtel
Jchiʼiltaktik ta chanun
Ta bebetik
Ta naetik
Ta xchaʼvulaʼanel ta snaik li buchʼutik oy ta yoʼontonik mantal chkiltike
Ta yakʼel chanubtasel ta Vivlia ta snaik