Chanubtaso avalab anichʼnabik
¿Kʼu yuʼun muʼyuk bat xpoxta ta anil Lázaro li Jesuse?
KʼALAL jaʼo te oy ta jot ukʼum Jordán li Jesuse laj yichʼ albel jun chopol aʼyej: toj tsots ip li yamigo ti jaʼ li Lazaroe. Li vaʼ kʼakʼal taje, toj nom oy ta jteklum Betania li Jesuse, yoʼ bu nakal Lázaro xchiʼuk li xvixobtak ti jaʼ li Marta xchiʼuk Mariae. Akʼo mi nom oy li Jesuse, la stakbeik batel mantal, yuʼun spatoj yoʼontonik ti xuʼ xpoxtabatik tal ta nom li smukike. Yuʼun maʼuk to onoʼox sba velta ti jech tspase (Mateo 8:5-13; Juan 11:1-3, Ch).
Pe li Jesuse muʼyuk kʼusi la spas sventa xpoxta ta anil li yamigoe. Li Vivliae chal ti «com to chib cʼacʼal» ti bu toʼox oye (Juan 11:6, Ch). ¿Mi cha kʼan cha naʼ kʼu yuʼun jech la spas li Jesuse?a... Jkʼeltik kʼuxi chal batel li loʼile.
Kʼalal xchibal xaʼox kʼakʼal yabinoj Jesús li aʼyej taje, snaʼoj xa onoʼox ti chamem li Lazaroe, jaʼ yuʼun xi laj yalbe li yajtakboltake: «Batic noʼox xtoc ta Judea». Labal to laj yaʼiik, jaʼ yuʼun xi la stakʼbeike: «Ti bu taje, achʼto noʼox jutuc mu laj smilot ta ton ti israeletique. ¿Mi ta xabat avaʼi xtoc?». «Vay xa ti Lázaro ti lec xquil jbatic xchiʼuque —xi li Jesuse—. Jaʼuc leʼe, ta xbat jtij ti jech vay xae.»
«Cajval —xi takʼav li jtakboletike—, mi vayeme, jaʼ svinajeb ti ta xlecube.» Vaʼun, li Jesuse xi jamal laj yale: «Cham xa maʼ ti Lázaro une». Pe oy to kʼusi laj yal ti mas to muʼyuk xaʼibeik smelolale: «Ta sventa ti voʼoxuque, ximuyubaj xa ti muʼyuc tey oyune [...]. Jaʼuc leʼe, batic, ba jqʼueltic».
Li jtakbol Tomase xi laj yalbe li yantike: Batik ek, akʼo mi te jmoj xi jcham jchiʼuktik. Yuʼun snaʼojik ti tskʼan chmilat yan velta yuʼun li yajkontratake, xchiʼuk ti xuʼ te xmilatik eke. Akʼo mi jech, bat onoʼox xchiʼinik li Jesuse. Ta xchibal kʼakʼale, kʼotik li ta jteklum ti bu nakal Lazaroe, ti oxib kilometro yiloj Jerusalene (Juan 11:7-18, Ch).
¿Mi xa naʼ kʼu yuʼun muʼyuk bat skʼel noʼox Lázaro li Jesuse? Yuʼun li Jesuse xchaʼkuxesoj xa onoʼox baʼyel junantik krixchanoetik, pe mu toʼox jaluk xchamelik kʼalal la xchaʼkuxesane (Lucas 7:11-17, 22; 8:49-56). Yan li Lazaroe xchanibal xaʼox kʼakʼal smukel kʼalal kʼot li Jesuse. Jaʼ yuʼun, muʼyuk buchʼu xuʼ smuk ti chamem ta melel li Lazaroe.
Kʼalal laj yaʼi Marta ti chkʼot xa ta jteklum li Jesuse, lokʼ ta anil sventa xbat snup ta be. «Cajval —xi laj yal li Martae—, ti liʼuc oyucote, muʼyuc xcham ti jchiʼil ta voqʼuel jechuque.» Li Jesuse xi la spatbe yoʼontone: «Ti achiʼil ta voqʼuele, ta xchaʼcuxi talel». Li Martae sut batel ta sna xchiʼuk xi laj yalbe ta mukul li Mariae: «Liʼ xa oy ti Jchanubtasvaneje, ta xastaot ta iqʼuel».
Kʼalal yilik lokʼ batel María li slakʼnatak xchiʼuk yamigotake, te tijil batik ek, yalojik mi te chbat li ta smukinal Lazaroe. Pe jaʼ bat snup ta be li Jesuse. Kʼalal laj yil ch-okʼ li Mariae xchiʼuk li yan krixchanoetik te xchiʼuke, lik okʼuk ek. Laj une, bat skotolik li ta mukinale, kʼalal makbil ta mukʼta ton stabeik li stiʼe, xi laj yal mantal li Jesuse: «Loqʼuesic ti smac stiʼe». Pe li Martae xi laj yale: «Tu xa van, Cajval, yuʼun oy xa xchanibal cʼacʼal ti chame».
Akʼo mi jech, li krixchanoetike la xchʼunbeik li Jesuse xchiʼuk la slokʼesik li tone. Vaʼun lik skʼopon Dios. La stojbe ta vokol ti ch-akʼbat svuʼel sventa xuʼ xchaʼkuxes li Lazaroe. Laje xi tsots laj yaptae: «Lázaro, locʼan talel». ¿Kʼusi kʼot ta pasel un? Jaʼ ti lokʼ tal ta chʼen li Lazaroe. Ta skoj ti lek «tsʼotol ta pocʼ yoc scʼob locʼ talel, xchiʼuc pixil ta pocʼ ti sate», li Jesuse xi laj yale: «Jitunic ti stsʼote, acʼo batuc» (Juan 11:19-44, Ch).
¿Mi laj avaʼibe xa smelolal kʼu yuʼun ti muʼyuk bat skolta ta anil li yamigoe?... Yuʼun jaʼ jech xuʼ xakʼbe lek ta ilel svuʼel li sTote, ti jaʼ li Jeovae. Jech kʼot ta pasel: li Jesuse la stabe lek yorail, ta skoj taje ep kʼotik ta jchʼunolajel (Juan 11:45, Ch). Li voʼote, ¿mi oy van kʼusi stakʼ xa chanbe li ta sloʼilal xkuxlejal Jesús liʼe?...
Melel onoʼox ti muʼyuk buchʼu chchaʼkuxi avuʼune. Pe jech kʼuchaʼal la spas li Jesuse, xuʼ xa sabe lek yorail sventa xavalbe yantik li kʼusitik kʼupil sba spasoj xchiʼuk li kʼusitik tspas ta mas jelavel li Diose. Xuʼ van jaʼ xavalbe li achiʼiltak ta chanun o li amaestrotake. Jech xtok, xuʼ van x-ayan yorail kʼalal xyaket chanun sventa xavalbe skʼoplal li kʼusitik lek chichʼ talel ta stojolal krixchanoetik li Ajvalilal yuʼun Diose. Jaʼ jech xuʼ xa kolta yantik sventa xojtikinik li Jeovae, li Dios ti tskʼan xchiʼuk ti xuʼ yuʼun xchaʼkuxes li buchʼutik chamem kuʼuntik ti jkʼanojtike.
[Tsʼib ta yok vun]
a Mi yakal cha kʼel xchiʼuk jun olol li loʼil liʼe, pajan jlikeluk li bu oy oxib puntoetike, xchiʼuk tijbo yoʼonton akʼo yal ta skʼop stuk li sloʼile.
SJAKʼOBILTAK:
▪ ¿Kʼu yuʼun muʼyuk la xpoxta noʼox ta anil Lázaro li Jesuse?
▪ ¿Kʼu yuʼun laj yal Tomás ti xuʼ te xlajik-o ta milel xchiʼuk li yan jtakboletik mi bat xchiʼinik li Jesuse?
▪ ¿Bu la sta svuʼel Jesús sventa xchaʼkuxes li Lazaroe?
▪ ¿Kʼusi xuʼ xa chanbe li Jesuse?