Jelbat-o xkuxlejalik yuʼun li Vivliae

¿KʼUXI kom yuʼun stunesel droga jun ants ta Rusia xchiʼuk ti lik lekubuk kʼuyelan xil sba xchiʼuk li yalabtake? Jun vinik ti likem ta Japón ti nakal toʼox ta kayetike, ¿bu la sta yipal sventa tstsal yuʼun li kʼusitik nopem xaʼi spasele xchiʼuk sventa xlekub li xkuxlejale? Jun vakero ti ta Australia likeme, ¿kʼusi koltaat-o sventa xikta li poxe? Akʼo stakʼ stukʼik kʼusi koltaatik-o.

«La jchan ti skʼan xi abteje xchiʼuk ti skʼan jkʼel li kalabe»

(NELLY BAYMATOVA)

SJABILAL: 45

SLUMAL: RUSIA

KʼU TOʼOX YELAN XKUXLEJAL: JTUNESEJ DROGA TOʼOX

LI JKUXLEJAL TOʼOXE: Te li chʼi ta Vladikavkaz, ti jaʼ skapital li República de Osetia del Norte (ti Alania sbi avie). Li kutsʼ kalale oy noʼox lek stakʼinik, jaʼ yuʼun ep kʼusitik la jkʼupin. Akʼo mi jech, mu stakʼ xkal ti xi muyubaje. Kʼalal 34 xaʼox jabilale, xchibal xaʼox velta li nupun, pe muʼyuk lek li lokʼ. Oy xa onoʼox ta slajunebal jabil ta jtunes tal droga xchiʼuk chib xaʼox velta laj kichʼ poxtael ta klinika. Muʼyuk xaʼox mas lek xkil jbakutik xchiʼuk li kutsʼ kalal xchiʼuk li kamigotake. Oy chaʼvoʼ kalab, pe jamal chkal ti muʼyuk toʼox jkʼanojane.

Li jmeʼ ti jaʼ xaʼox yajrextiko Jeovae, ep ta velta chokʼita sba ta jmul xchiʼuk xvokolet ta skʼanbe Dios ti akʼo skoltaune. Xi toʼox ta jnope: «¡Abol yuni ba, mu snaʼ li kʼusi chale! ¿Mi yuʼun smalaoj ti jaʼ chchapan jkʼop ta melel li Jeovae?». Chkakʼ persa jtuk yiktael li drogae, pe muʼyuk onoʼox bu xkom kuʼun. Jun veltae, jelav chib kʼakʼal ti mu jutuk la jtunes drogae, pe mu xa stsʼik laj kaʼi ti te bajalun-o ta jnae, jech oxal li pʼit lokʼel ta sventanail xchaʼkojal to jna. Ta skoj taje, la jkʼas jkʼob xchiʼuk kok, xchiʼuk la jyayijes jpat. Jelav mas ta jun u te telel li kom ta tem sventa xi kol.

Li jmeʼe la xchabiun ti kʼu sjalil ipune. Muʼyuk la stikʼbun ta jsat li kʼusitik jpasoje, yuʼun snaʼoj ti kʼun koʼonton li vaʼ ora taje. Li kʼusi noʼox la spase jaʼ ti laj yiktabun komel ta stsʼel jtem jaylikuk revista ¡Despertad!a Toj kʼupilik sba li kʼusitik chal kile, jaʼ yuʼun la jkʼel sliklej li revistaetike. Jaʼ te la jnop ti chlik jchan Vivlia xchiʼuk li yajrextikotak Jeovae.

TI KʼUYELAN LA SJEL JKUXLEJAL LI VIVLIAE: Li kʼusi jtos la skoltaune, jaʼ ti la jchan ta sKʼop Dios li kʼusitik oy ta jba spasele. La jchan ti skʼan xi abteje xchiʼuk ti skʼan jkʼel li kalabe; mu xa sta-o chkaʼi ti jaʼ chi smaklinunkutik-o li jmeʼe. Pe ta skoj ti nopem xkaʼi spasel li kʼusi tskʼan koʼontone, jamal chkal ti toj vokol laj kaʼi ti skʼan xi abteje.

Jech xtok, toj ep la skoltaun li kʼusi chal Deuteronomio 6:5-7, ti bu chal ti skʼan xchanubtas sventa Dios yalab xnichʼnabik li totil-meʼiletike. Laj kakʼ venta ti chchapanun ta tsʼakal Jeova ta skoj ti kʼuyelan ta jchanubtas li kalabe. Jaʼ yuʼun, te lik jchʼakbe yorail sventa mas jchiʼinan xchiʼuk la jpas persa ti xlik jkʼanan ta melele.

Toj echʼ noʼox ta jtojbe ta vokol Dios ti laj kojtikine, jaʼ yuʼun la jnop ti chkakʼ jkuxlejal ta stojolale xchiʼuk ti chkichʼ voʼ sventa xi kʼot ta yajrextiko Jeovae.

KʼUSITIK SBALIL JTAOJAN: La xa jchan spajtsanel jba li ta ilinele, jaʼ yuʼun mas xa lek xkil jba xchiʼuk li jmeʼe, xchiʼuk mas xa lek xkil jba xchiʼuk li kalabe.

Yan xtoke, li avie toj chopol xa chkil li kʼusitik muʼyuk lek chil Diose, koliyal taje, ep li kʼusitik toʼox ta jpase laj xa kiktaan spasel. Li avi kʼakʼale, xi muyubaj noʼox ta jchʼakbe yorail sventa ta jkolta krixchanoetik yoʼ xojtikinik li jkʼanvanej Dios kuʼuntike, li Jeovae.

«Jaʼ la sjelbun jkuxlejal li beiltaseletik ta Vivliae»

(MINORU TAKEDA)

SJABILAL: 54

SLUMAL: JAPÓN

KʼU TOʼOX YELAN XKUXLEJAL: TA KAYETIK TOʼOX NAKAL

LI JKUXLEJAL TOʼOXE: Kʼalal bikʼitun toʼoxe te nakalun xchiʼuk jtot xchiʼuk jyaya li ta jteklum Yamaguchie. Muʼyuk bu xkojtikin li jmeʼe. Kʼalal balunlajuneb xaʼox jabilale cham li jyayae, jaʼ yuʼun jtuk xa li kom xchiʼuk li jtote. Voʼone chi abtej toʼox ta pas veʼlil, jech li jtot eke koʼoltik li yabtele. Pe ta skoj ti jelel yorail chi abtejkutike, muʼyuk mas xkil jbakutik. Kʼunkʼun mas xa jalik chi abtej jujun kʼakʼal, xchiʼuk lik jtikʼ jba ta yuchʼel pox xchiʼuk li kamigotake.

Pe ta tsʼakale, tavan tajek kaʼi li kabtele. Tsots la jtsak jbakutik ta kʼop xchiʼuk li kajval ta abtele, jaʼ yuʼun lik kuchʼ-o mas pox. Jun kʼakʼal kʼalal jutuk mu 30 xaʼox jabilale, li lokʼ batel ta jna, jaʼ xa ti bu xi tal xi bate. Kʼalal laj jtakʼine, li och ta abtel ti bu oy makinaetik ti chichʼ tikʼbel takʼin, ti pachinko sbie, ti lek ojtikinbil ta Japón li makinaetik taje. Li vaʼ kʼakʼal taje laj kojtikin jun tseb, vaʼun li nupunkutik, pe kʼalal echʼ chib jabil xchiʼuk oʼlole laj kikta jbakutik.

Batsʼi li ipaj ta at-oʼonton. Lik jkʼanilan takʼin li butik chakʼik ta chʼome, vaʼun la stsob sba ep kil. Ta skoj ti tskʼanilanbikun li kile, li jatav batel ta sna jtot, jaʼ ti bu likemun toʼoxe. Pe ta skoj ti ta jutilanbe kʼop li jtot xtoke, li namaj-o ta stojolal. Jech noxtok, la jtsak batel takʼin li ta jnae xchiʼuk jaʼ xa noʼox li kuxi-o li kʼuyepal ta jpas kanal li ta tajimol ta takʼine. Pe ta tsʼakale toj abol xa noʼox tajek jba li kom, jaʼ yuʼun ta skotleb tren xa noʼox chi vay. Laje li bat ta jteklum Hakata, ta tsʼakale ta Himeji, ta slajebe li bat ta Kioto. Te van chib jabil jech ta kayeetik li kom.

TI KʼUYELAN LA SJEL JKUXLEJAL LI VIVLIAE: Li ta sjabilal 1999 kʼalal jaʼo te oyun ta parke ta stsʼel li ukʼum Kamogawa, ta Kiotoe, te tal xchiʼinikun ta loʼil chaʼvoʼ antsetik. Li june la sjakʼbun mi ta jkʼan ta jchan Vivlia, laj kalbe ti tanae. Ta tsʼakal jutuke, bat svulaʼanikun yan yajrextikotak Jeova ti lek chanemike xchiʼuk la xchanubtasikun ti toj tsots skʼoplal ti xkakʼ ta jkuxlejal li beiltaseletik ta Vivliae. Jech xtok, laj yalbikun ti akʼo jsaʼ kabtele xchiʼuk ti jsaʼ bu xi nakie. Ay jakʼ jun-chibuk velta kabtel —pe jaʼ noʼox sventa junuk yoʼontonik kuʼun—, jaʼ yuʼun muʼyuk laj kakʼ lek ta koʼonton saʼel. Pe ta tsʼakale, la jkʼanbe koltael Dios sventa jta li kabtele, jaʼ yuʼun lik kakʼ ta koʼonton saʼel. Laj onoʼox jta un.

Li orasion xtoke la skoltaun sventa stsal kuʼun yan mukʼta vokolil. Yuʼun la staikun ta saʼel li buchʼutik jchʼamunojanbe stakʼinike xchiʼuk tskʼanbikun xa li kile. Mu xa noʼox jnaʼ kʼusi ta jpas kaʼi. Vaʼun, kʼalal jaʼo yakalun skʼelel li Vivliae la jta ta kʼelel Isaías 41:10 ti xi chale: «Vuʼun chajcoltaot», taje chakʼ ta ilel ti tskolta yajtuneltak li Diose. Taje jaʼ xaʼox li kʼusi chtun tajek kuʼune. Jaʼ yuʼun lik kakʼbe-o yipal abtel, vaʼun te laj-o skʼoplal li kile. Li ta sjabilal 2000 pas kuʼun li kʼusitik chichʼ kʼanel sventa xkichʼ voʼ kʼuchaʼal yajrextiko Jeovae.

KʼUSITIK SBALIL JTAOJAN: Li kʼusi la jchan ta Vivliae la stijbun koʼonton sventa xbat jlajesbe yoʼonton li jtote, vaʼun la spasbun perton li kʼusitik jpasoje. ¡Toj echʼ noʼox xmuyubaj ti lik kakʼ ta jkuxlejal li beiltaseletik ta Vivliae! Kʼalal ta jvules ta jol li kʼu toʼox kelane, xuʼ xkal ti jaʼ la sjelbun jkuxlejal li beiltaseletik ta Vivliae.

Ta skoj ti chi abtej xa avie ta jta xa noʼox li kʼusitik chtun kuʼune (Efesios 4:28; 2 Tesalonicenses 3:12). Jech xtok, li ta tsobobbaile oy xa lek kamigotak (Marcos 10:29, 30). Ta melel, toj echʼ noʼox ta jtojbe ta vokol Jeova ta sventa li kʼusitik xchanubtasojune.

«Mu kʼunuk laj kaʼi ti la jel li jkuxlejale»

(DAVID HUDSON)

SJABILAL: 72

SLUMAL: AUSTRALIA

KʼU TOʼOX YELAN XKUXLEJAL: JYAKUBEL TOʼOX

LI JKUXLEJAL TOʼOXE: Li jtot jmeʼe —ti jaʼ sbi Lucy xchiʼuk Willie— lajunvoʼ xaʼox yol xnichʼonik kʼalal li vokʼe. Te toʼox nakalunkutik ta stsʼel nab ta snorteal estado yuʼun Queensland. Li bikʼit jteklum taje Aurukun sbi, te xkom ta stsʼel ukʼum Archer. Li jtot jmeʼkutike la xchanubtasunkutik ta nutsol xchiʼuk ta tsak choy sventa oyuk noʼox jveʼelkutik. Li vaʼ kʼalal taje, li buchʼutik nakalunkutik ta uni bikʼtal lumetike muʼyuk mas kolemunkutik, yuʼun li ajvalile mu xakʼ jpikkutik takʼin xchiʼuk oy noʼox bu kʼalal xuʼ xi nakikutik yuʼun.

Xvul to ta jol ti skotol ora tspasik persa chalbunkutik mantal ti lekuk jtalelalkutik li jtot jmeʼkutike. La xchanubtasunkutik ti akʼo oyuk ta koʼonton xkakʼkutik li kʼusi oy kuʼunkutike —akʼo mi chʼabal kʼusi oy mas kuʼunkutik— xchiʼuk ti xkichʼkutik ta mukʼ li buchʼutik ep xa sjabilalike. Jaʼ yuʼun jech xa chkilkutik kʼuchaʼal jtot, jmeʼkutik, juntotkutik xchiʼuk junmeʼkutik li krixchanoetike.

Kʼalal kichʼoj vukub jabile jaʼo cham li jtote. Vaʼun li batkutik ta naklej ta jun bikʼit lum Mapoon, ti 150 kilometro yiloj ta snorteal Aurukune. Kʼalal kichʼoj xaʼox lajcheb jabile la jchan skʼelel kaʼetik xchiʼuk vakaxetik, jaʼ to laj kikta vakeroal kʼalal jutuk xaʼox skʼan jta 50 jabilale. Pe toj tsots li abtel taje. Jech xtok, toj echʼem xkuchʼ pox, jech te ayan-o tal skotol li jvokoltake.

Oy jun kʼakʼal kʼalal jaʼo chi yakub tajek ta jun otele, xi tamlajet xa lokʼel, vaʼun la snetʼun jkot karo ti jaʼo tsots tajek chtale. Chib jabil la xpoxtaikun sventa stsatsub li jbekʼtal jtakopale. Kʼux ta alel, pe muʼyuk xa li abtej-o li ta vakeroale.

TI KʼUYELAN LA SJEL JKUXLEJAL LI VIVLIAE: Kʼalal jaʼo ta xpoxtaikun sventa stsatsub li jbekʼtal jtakopale, jun kamiga ti lek jkʼopon jba xchiʼuke laj yichʼbun talel jaylikuk revista ¡Despertad! xchiʼuk Li Jkʼel osil ta toyole. Pe muʼyuk mas tun kuʼun, yuʼun muʼyuk lek la jchan vun xchiʼuk mu xi tojob lek skʼelel li vune. Mas tsʼakal jutuke la stijbun stiʼ jna jun vinik ti yichʼoj 83 sjabilale. Li vaʼ kʼakʼal taje xvul to ta jol ti toj echʼ noʼox kʼixin kʼakʼale, jaʼ yuʼun laj kakʼ ochuk ta jna xchiʼuk laj kakʼbe jun vaso voʼ. Laj yiktabun jaylikuk vunetik lokʼem ta Vivlia xchiʼuk laj yalbun ti tsut to talel sventa chalbun smelolale. Jaʼ jech lik jchanilan-o Vivlia taje. Kʼunkʼun laj kaʼibe smelolal ti skʼan jel jkuxlejal xchiʼuk jtalelal mi ta jkʼan ta jlekubtasbe yoʼonton li Jeovae.

Jamal chkal ti mu kʼunuk laj kaʼi sjelel li jkuxlejale. Ta skoj ti jech xchanubtasojun li jmeʼe, lek la jtsak ta venta li vinik ti oy xa sjabilal ti ep yakal chi xchanubtasune. Akʼo mi jech, mu toʼox jkʼan xkakʼ jba ta stojolal Dios xchiʼuk mu toʼox jkʼan xi kʼot ta yajrextiko Jeova. Ta jnop noʼox ti baʼyel skʼan jchan skotol kʼusi chal li Vivliae.

Li kʼusi labal laj kaʼie jaʼ ti jchiʼil noʼox ta abtel la skoltaun ta sjelel li kʼusi toʼox ta jnope. Jaʼ yajrextiko Jeova maʼ stuke xchiʼuk laj yalbun ti akʼo jkʼel kʼusi chal Colosenses 1:9, 10. Tee chtijbat yoʼonton li yajtsʼaklomtak Cristo ti akʼo chʼiikuk «batel ta yotquinel li Diose». Ta skoj li versikuloetik taje, li jchiʼil ta abtele la skoltaun ta skʼelel ti oy kʼusitik achʼ xuʼ jchan jujun kʼakʼale xchiʼuk ti chʼabal srasonal sventa jaʼ to ta jpas ta tsʼakal li kʼusi jnopoj xae.

Kʼalal lik batkun ta stsobajel li yajrextikotak Jeovae, labal to laj kil. Chʼayal to li kom kʼalal laj kil ti jun yoʼontonik chtunik ta stojolal Dios epal krixchanoetik ti jelel slumalike. Toj lek tsobol oyik laj kil, jaʼ yuʼun xi laj kale: «Ta melel, jaʼ melel relijion maʼ liʼe». Vaʼun ta 1985 laj kichʼ voʼ kʼuchaʼal yajrextiko Jeova.

KʼUSITIK SBALIL JTAOJAN: Avie mas xa jnaʼ lek skʼelel vun, xchiʼuk jal ta jchʼakbe yorail skotol xemana sventa ta jchanubtas ta skʼelel xchiʼuk xchanel Vivlia li krixchanoetike. Jech xtok, li kamiga ti laj yichʼbun talel jaylikuk revista ¡Despertad! xchiʼuk Li Jkʼel osil ta toyole lik xchan Vivlia xchiʼuk li yajrextikotak Jeova eke, laj yichʼ voʼ, vaʼun jaʼ xa kuni ajnil li avie. Jaʼ jun muyubajel chkaʼikutik skoltael li krixchanoetik ta bikʼtal lumetik sventa xojtikinik li Jeova Diose.

[Tsʼib ta yok vun]

[Lokʼol ta pajina 21]

Jaʼ jun muyubajel chkaʼikutik skoltael li krixchanoetik ta bikʼtal lumetik sventa xojtikinik li Diose