¿Mi jaʼ te liktal stsʼunobalik li krixchanoetik ta Edene?
Nopo noʼox avaʼi ti te oyot ta nichimaltik balumile, ti chʼabal kʼusi chavaʼi chbakʼ, ti nom oyot ta jteklume. Muʼyuk kʼusi chavul-o avoʼonton xchiʼuk muʼyuk kʼusi kʼux ip chavaʼi jsetʼuk. Chakʼupin tajek li kʼusitik chavile.
Mu albajuk yutsil li kʼusi oy ta apat axokone: kʼalal chavil chlokʼ tal xojobal li kʼakʼale, chakʼel li nichimetike, chakʼupin kʼu yelan chkʼejin li mutetike, ti kʼu yelan tstokʼik pom li bikʼtal chonetike, ti kʼu yelan chanav li yok voʼe... ¿Mi mu jechuk ti chakʼan xa te oyote?
Li epal krixchanoetike xchʼunojik ti jaʼ jech kuxiik li baʼyel jtot jmeʼtike jech kʼuchaʼal laj xa kalbetik tal skʼoplale. Li ta epal sigloe, li judioetik, jchʼunolajeletik xchiʼuk li jmusulmanetike jaʼ jech xchʼunojik ti te kuxiik ta nichimaltik Eden li baʼyel jtot jmeʼtike. Li Vivliae chal ti xmuyubajik noʼox xchiʼuk jun yoʼontonik xchiʼuk li chonbolometike. Jech xtok, lek toʼox xil sbaik xchiʼuk li Jpasvanej yuʼunike ti jaʼ akʼbatik ti akʼo xkuxiik sbatel osil li ta nichimaltike (Jenesis 2:15-24).
Li j-induetike xchʼunojik ti oy toʼox jun nichimaltike. Epal jbudistaetike xchʼunojik ti li jbabeetik ta mantal yuʼunike te likik tal kʼalal nichimaltik toʼox li balumile. Jech xtok, epal relijionetik li ta Africae xkoʼolaj kʼusi chalik jech kʼuchaʼal chal li Vivliae.
Ti melel xkaltike, jutuk mu skotol li relijionetike xchiʼuk li krixchanoetike xchʼunojik ti oy toʼox li nichimaltike. Xi chal jun j-al loʼil Jean Delumeau sbie: «Li ta voʼnee oy krixchanoetik ti jeltos stsʼunobalike xchʼunojik ti baʼyel krixchanoetike te nakiik ta jun nichimaltik balumil ti bu tukʼ toʼox skotole, muʼyuk toʼox kʼusi chakʼ xiʼel xchiʼuk oy toʼox yuʼunik skotol sventa xmuyubajikuke. [...] Ta skoj ti kʼu yelan xchʼunojike, epal krixchanoetike tskʼan tstaik li nichimaltik taje, akʼo mi chʼayem xa».
¿Kʼu yuʼun ti jech ep buchʼutik xchʼunojike? ¿Mi ta melel kuxiik ta nichimaltik Eden li Adan xchiʼuk Evae?
Epal krixchanoetike mu xchʼunik ti oy toʼox ta melel li nichimaltik Edene, yuʼun tsnopik ti jaʼ noʼox jun loʼile. Jech xtok, oy jnitvanejetik ta relijione mu xchʼunik ti oy toʼox li nichimaltik Edene, yuʼun tsnopik ti jaʼ noʼox la jun loʼil o jun lokʼolkʼope.
Li Jesuse laj onoʼox stunes lokʼolkʼopetik sventa xchanubtas li yajtsʼaklomtake, jaʼ yuʼun yichʼoj tal epal lokʼolkʼopetik li Vivliae. Jech xtok, chal ti ayan ta melel li nichimaltik Edene maʼuk noʼox jecheʼ loʼil. Ti maʼukuk melele, ¿kʼuxi xa noʼox xuʼ jpat koʼontontik ta sventa li kʼusi chal spoklejil li Vivliae? Jaʼ yuʼun, ta jkʼeltik batel kʼu yuʼun oy junantik krixchanoetik ti mu xchʼunik ta sventa li nichimaltik Edene. Ta tsʼakale, ta jkʼelbetik srasonaltak ti kʼu yuʼun toj tsots skʼoplal ta jventatike.