Nopajan ta stojolal Dios
«Li vuʼune muʼyuc bu jchʼayojot o ta coʼnton»
¿MI TA melel skʼanoj yajtuneltak li Diose? Mi jeche, ¿kʼu to yepal kʼanvanem? Sventa jtabetik stakʼobil taje skʼan jchantik li kʼusi chal Diose. Ti kʼuyelan chaʼi sba li Jeovae jamal chakʼ iluk ta Vivlia. Jun skʼelobile jaʼ li kʼusi chal ta Isaías 49:15.
Li ta slivroal Isaiase, li Jeovae laj yakʼ jun skʼelobil ti chkʼot ta oʼontonal sventa chakʼ iluk ti kʼu to yepal skʼanoj li yajtuneltake. Xi la sjakʼe: «Li jun antse ¿me xuʼ chicta comel li mero yole? ¿Me xuʼ chchʼay o ta yoʼnton ti cʼalal jaʼ mero xchʼichʼal sbecʼtale?». Ti xkaltik noʼox yaʼeluke kʼun noʼox li stakʼobile. Yuʼun, ta alele, mi junuk meʼil xuʼ xchʼay ta yoʼonton li yol ti chchuʼun toe. Ta kʼakʼal akʼobal skʼan kʼelel. Pe oy to kʼusi mas skʼan xal li kʼusi la sjakʼ Jeovae.
¿Kʼu yuʼun chakʼ chuʼunuk xchiʼuk chakʼbe skotol kʼusi chtun yuʼun yol li meʼile? ¿Mi jaʼ noʼox van sventa mu xa x-okʼ? Moʼoj. Li meʼiletike stalel onoʼox ti mu «xuʼ chchʼay o ta yoʼnton ti cʼalal jaʼ mero xchʼichʼal sbecʼtale» (Isaías 54:10). Jech xtok, kʼux chaʼi xchiʼuk oy ta yoʼonton li buchʼu mu stakʼ skʼel sba stuke. Ti kʼuyelan kʼux ta yoʼonton yol li meʼile stuk noʼox jech.
Kʼux ta alel, pe kʼalal chviʼnaj yolik jlom meʼiletike mu xkʼuxubaj ta yoʼontonik. Li Jeovae chal ti «oy jech chcʼot ta pasel[e]». Li avie ep xa viniketik xchiʼuk antsetik ti muʼyuk slekil yoʼontonike (2 Timoteo 3:1-5). Bakʼintike oy xkaʼitik ti oy meʼiletik mu skʼelik, chilbajinik o tsten komel li yolike. Jun j-al-loʼil ta sventa Vivliae xi laj yalbe skʼoplal li Isaías 49:15: «Li meʼiletike jmulaviletik xchiʼuk oy bakʼintik ti mu xa xkʼanvanik ta skoj li choplejale. Manchuk mi chkʼanvan tajek li jun krixchanoe, xuʼ sok yoʼonton».
Pe li Jeovae xi chal ta melele: «Li vuʼune muʼyuc bu jchʼayojot o ta coʼnton». Mas xa jamal xkaʼibetik smelolal li kʼusi la sjakʼ Jeova ta Isaías 49:15. Maʼuk noʼox la skoʼoltas ti kʼuyelan skʼanoj yol li meʼile, jaʼ chakʼ ta ilel ti oy kʼusi jelel xchiʼuk ti kʼuyelan kʼanvanem stuke. Li meʼiletike xuʼ van mu skʼel li yolik ti mu stakʼ skʼel sba stuke, yan li Jeovae oy ta yoʼonton skotol ora li yajtuneltake. Jaʼ yuʼun, li j-al-loʼil ta sventa Vivlia ti laj xa kalbetik skʼoplale chal ti ta Isaías 49:15 jaʼ la jun teksto ta «sjunul Pokoʼ Testamento ti chakʼ ta ilel ti solel chkʼanvan tajek li Diose, xuʼ van stuk xa noʼox jech chakʼ ta ilel».
Tstsatsubtas koʼontontik ta jyalel ti jaʼ jun Dios ti chkʼanvan tajek li Jeovae, ti «toj ep cʼuxutic ta yoʼnton[e]» (Lucas 1:78). Yuʼun xi chal stuke: «Muʼyuc chaquictaot, muʼyuc chajcomtsanot» (Hebreos 13:5). ¿Kʼu yuʼun mu xachan mas kʼuxi xuʼ xanopaj ta stojolal?