Kʼelo me aba li ta kʼusitik jecheʼ xchʼunoj relijionetike
LI JTAKBOL Pabloe xi la stsʼibae: «Li scʼop Diose cuxul, oy stsatsal» (Heb. 4:12). ¿Kʼusi la skʼan laj yal taje? Jaʼ ti oy stsatsal li Vivlia sventa xkʼot ta yoʼonton krixchanoetik xchiʼuk sjelbe li xkuxlejale.
Ti kʼu toʼox yelan chichʼ ilel Vivlia ta sventa ti oy yipe, jaʼo jel kʼalal och li jecheʼ chanubtaseletik ta tsobobbail kʼalal chamik xaʼox li jtakboletike (2 Ped. 2:1-3). Ta jelavele, li jnitvanejetik ta relijione lik yalik ti oy smajia li Vivliae. Li jchanubtasvanej Harry Y. Gamblee laj yal ta sventa li kʼusi la stsʼibaik li yajtsʼaklomtak Cristoe. Li stuke laj yal ti ta yoxibal sigloe, li Orígenes ti jaʼ jun Pale ta Chʼulnae, laj yakʼ ta aʼyel ti «yechʼomal kʼopetik ti chʼulike oy kʼusi lek chkʼot ta pasel yuʼun. Mi oy yip li majiae, jaʼ mas to li Vivliae». Li jchanubtasvanej Gamblee laj yal xtok ti Juan Crisóstomo —ti lek ojtikinbil ta sventa relijion li ta slajebaltik xchanibal sigloe— laj yal ti oy buchʼutik tsjokʼan ta snukʼik loʼiletik ti yichʼoj Evanjelio ti xkoʼolaj kʼuchaʼal metsʼuletik ti oy yipe, li Crisóstomo xtoke, jech laj yal liʼe: «Mu xnopaj tal pukuj ta jun na ti bu oy li Evanjelioe». Jech xtok, li buchʼu chchanbe skʼoplal Dios (teólogo) li Agustín de Hipona ti jaʼ jkatolikoe «laj yal ti xuʼ stikʼ ta yolon xonjolik jun loʼil ta Evanjelio yuʼun Juan sventa xpaj li kʼux jolile». Jaʼ yuʼun chaʼa, li krixchanoetike chalik ti xuʼ stunesik kʼuchaʼal majia li Skʼop Diose. ¿Mi mu meleluk ti mu xkʼot-o jtunestik kʼuchaʼal jun metsʼul o sventa oyuk suerte li Vivliae?
Li avie, li kʼusi nopem xaʼiik spasel li krixchanoetike, jaʼ ti bu xkʼot ta jamel yuʼunik li Vivliae, vaʼun tskʼelik ti bu chkʼot satike yuʼun tsnopik ti jaʼ te tstaik li beiltasel tskʼanike. Jech kʼuchaʼal chal li jchanubtasvanej Gamblee, Agustín de Hipona laj yaʼi ti oy jun kerem ti xi laj yale: «Tsako xchiʼuk kʼelo, tsako xchiʼuk kʼelo». Li kʼusi laj yaʼibe smelolal taje jaʼ ti albat yuʼun Dios ti akʼo sjam li Vivliae xchiʼuk skʼel ti bu la sta ta jamele.
Xuʼ van oy avaʼioj ti oy krixchanoetik ti tskʼoponik Dios kʼalal chil svokolike, mi laje tsjam Svivliaik jaʼ ti bu xkʼot ta jamel yuʼunike, yuʼun tsnopik ti jaʼ chkoltaatik li versikulo bu chkʼot satike. Li kʼusi tspasik taje xuʼ van mu chopoluk, pe li yajtsʼaklomtak Cristoe muʼyuk jech tspasik kʼalal tsaʼik beiltasel ta Skʼop Diose.
Li Jesuse laj yalbe yajtsʼaklomtak ti chtakbatik tal «Chʼul Espiritue». Xchiʼuk xi laj yale: «Jaʼ ta xa scoltaoxuc, jaʼ ta xa xchanubtasoxuc scotol taje, jaʼ ta svules ta ajolic scotol ti vaʼi sʼelan laj calboxuque» (Juan 14:26, Ch). Jaʼ yuʼun skʼan oyuk yojtikinobil yuʼunik ta sventa li Vivliae. Li krixchanoetik ti tsjamik Vivlia ti bu xkʼot ta jamel yuʼunike, mu persauk oyuk yojtikinobil yuʼunik li ta Vivliae.
Li Vivliae chal ti mu stakʼ jsaʼtik koltael ta stojolal jtʼunoletik, akʼo mi nopem xaʼiik spasel jech ta stojolal Vivlia li krixchanoetike (Lev. 19:26; Deut. 18:9-12; Hech. 19:19). Ta melel «li scʼop Diose cuxul, oy stsatsal», pe skʼan jnaʼtik lek stunesel. Li kʼusi xuʼ skolta li krixchanoetike jaʼ li yojtikinobil Vivliae, maʼuk li kʼusitik jecheʼ chʼunbile. Epal krixchanoetik staojik koltael ta Vivlia sventa lekuk li kʼusitik tspasike, ti lekuk xil sbaik xchiʼuk yutsʼ yalalike xchiʼuk ti lekuk xil sbaik xchiʼuk Jeovae.
[Lokʼol ta pajina 3]