Li Moisese oy lek xchʼunel yoʼonton

¿KʼUSI JAʼ LI XCHʼUNEL OʼONTONALE?

Kʼalal «xchʼunel oʼontonal» xi li Vivliae, jaʼ skʼan xal ti oy kʼusi chʼunbil ti oy lek sprevailtake. Li buchʼu oy xchʼunel yoʼonton ta stojolal Diose xchʼunoj ta melel ti chkʼot ta pasel yuʼun skotol li kʼusi yaloj tspase.

¿KʼUXI LAJ YAKʼ ILUK TI OY XCHʼUNEL YOʼONTON LI MOISESE?

Li kʼusitik la spase te vinaj ti xchʼunoj ta melel li kʼusi yaloj tspas Diose (Génesis 22:15-18). Li stuke xuʼ ox van oy lek kʼusitik la skʼupin ta xkuxlejal ta Egipto, pe mu jechuk la spas, yuʼun «jaʼ la scʼan ti coʼol acʼo yichʼ utsʼintael xchiʼuc li xchiʼiltaque, jaʼ li steclumal Diose. Muc jaʼuc la scʼan li cʼusi sventa noʼox banamil ti jliquel noʼox xcuxet yoʼnton yuʼune» (Hebreos 11:25). Kʼalal jech la spase, ¿mi xlaj to van snaʼ ta tsʼakal? Moʼoj, yuʼun li Vivliae chal ti «mu xicta sba ti cʼusi snopoj ti Moisese. Yuʼun coʼol sʼelan laj yil ti cuxul Dios ti mu xquiltique» (Hebreos 11:27, Ti Achʼ Rextomento yuʼun ti Jesucristoe, ta skʼop Chamula). Li Moisese muʼyuk xlaj to snaʼ ta tsʼakal li kʼusi la spas ta skoj li xchʼunel yoʼontone.

Li Moisese la skolta yantik sventa stsatsub xchʼunel yoʼontonik. Jnoptik li kʼusi kʼot ta pasel ta stojolal j-israeletik kʼalal te makik ta Tsajal Nab xchiʼuk ti te xa xtal li yajsoltarotak Faraone. Ta skoj ti xiʼik tajek ti oy kʼusi xibal sba chkʼot ta stojolalike la skʼanbeik vokol li Jeova xchiʼuk Moisese. ¿Kʼusi la spas li Moisese?

Li Moisese mu toʼox van snaʼ lek mi chchʼak ta oʼlol Tsajal Nab li Diose ti jech xuʼ xjatavik li j-israeletike. Akʼo mi jech, spatoj yoʼonton ti oy kʼusi tspas Dios sventa chchabi li steklumale. Li Moisese tskʼan ox ti jechuk spat yoʼontonik li j-israeletik eke. Xi chal li Vivliae: «Itacʼov li Moisese: “Mu xaxiʼic. Junuc avoʼntonic. Tana liʼi chavilic cʼu xʼelan chascoltaoxuc ti Mucʼul Diose”» (Éxodo 14:13). ¿Mi laj van stsatsubtasbe xchʼunel yoʼonton j-israeletik li Moisese? Laj, yuʼun li Vivliae maʼuk noʼox chalbe skʼoplal li Moisese, chalbe skʼoplal xtok skotol j-israeletik, xi chale: «Ta sventa xchʼunojel yoʼntonic li jchiʼiltactic ta voʼonee jech ijelovic tal ta Tsajal Nab. Xcoʼlaj xchiʼuc taqui banamil laj yaʼyic» (Hebreos 11:29). Maʼuk noʼox la stabe sbalil stuk ti laj yakʼ ta ilel xchʼunel yoʼonton li Moisese, moʼoj, yuʼun xuʼ jtabetik sbalil ek.

¿KʼUSITIK XUʼ JCHANTIK?

Mi jchʼunojtik ti chkʼot ta pasel li kʼusi yaloj tspas Diose chkakʼtik iluk ta kʼusitik ta jpastik, vaʼun jech ta jchanbetik li Moisese. Jech kʼuchaʼal liʼe, li Diose chal ti chakʼ kʼusi chtun kuʼuntik mi jaʼ mas tsots skʼoplal ta jkuxlejaltik li yichʼel ta mukʼe (Mateo 6:33). Melel onoʼox ti xuʼ tsots chkaʼitik ti jaʼ jpastik li kʼusitik tskʼan Diose, yuʼun jutuk mu skotoluk li krixchanoetike jaʼ chbat ta yoʼontonik saʼel li skʼulejalike. Pe xuʼ jchʼuntik ta melel, mi jaʼ chkakʼ ta koʼontontik spasel li kʼusitik sventa yichʼel ta mukʼe xchiʼuk ti mu xkakʼ kʼusi smakutike, li Jeovae chakʼ skotol li kʼusitik chtun kuʼuntike. Xi chal ta melele: «Yuʼun jech yaloj li Diose: “Muʼyuc chaquictaot, muʼyuc chajcomtsanot”» (Hebreos 13:5).

Li voʼotik eke chkakʼtik persa skoltael yantik yoʼ stsatsub xchʼunel yoʼontonik. Jech kʼuchaʼal li totil meʼiletike xuʼ skolta yalab xnichʼnabik sventa xchʼi xchʼunel yoʼontonik ta stojolal li Diose. Kʼalal yakal to chchʼiike tsots skʼoplal ti snaʼik ti oy ta melel Diose xchiʼuk ti yakʼoj mantaletik sventa li kʼusi lek xchiʼuk kʼusi chopole. Jech xtok, skʼan xchʼunik ta melel ti ep sbalil tsta ta xkuxlejalik mi chchʼunik li mantaletike (Isaías 48:17, 18). Li totil meʼiletike chakʼbeik jun lekil matanal kʼalal chchanubtasik ti skʼan xchʼunik «ti oy li Diose, xchiʼuc ti ch-acʼbat smoton li bochʼo ta saʼe» (Hebreos 11:6).