Li Moisese kʼanvan

¿KʼUSI JAʼ LI KʼANELALE?

Kʼalal chijkʼanvane oy ta koʼontontik li yantike. Li buchʼu chkʼanvane chakʼ ta ilel ta skʼopojel xchiʼuk ta kʼusitik tspas, manchuk mi vokol chaʼi spasel.

¿KʼUXI LAJ YAKʼ ILUK TI KʼANVAN LI MOISESE?

Laj yakʼ ta ilel ti skʼanoj li Diose. ¿Kʼuxi? Jvules ta joltik li kʼusi chal 1 Juan 5:3 ti xi chale: «Me jcʼanojtic o li Diose, ta jchʼunbetic li smantaltaque». Li Moisese jech laj yakʼ ta xkuxlejal taje. La xchʼun skotol li kʼusi albat yuʼun Diose, akʼo mi tsots ta pasel, jech kʼuchaʼal kʼalal ay skʼopon li ajvalil Faraone o kʼalal albat ti akʼo syeʼ snamteʼ ta sba Tsajal Nab ti kʼun noʼox ta pasel yilele. Akʼo mi tsots ta pasel o mi kʼun noʼox «la spas jech chac cʼu chaʼal iʼalbat yuʼun li Mucʼul Diose» (Éxodo 40:16).

Li Moisese laj yakʼ iluk ti skʼanojan li xchiʼiltak ta israelale. Laj yakʼik venta ti jaʼ vaʼanbil yuʼun Jeova sventa tsbeiltas li jteklume, jaʼ yuʼun jaʼ tskʼoponik kʼalal oy svokolike. Xi chal li Vivliae: «Sbejel cʼacʼal te oyic o ta stojol li Moisese» (Éxodo 18:13-16). Jnoptik noʼox ti sjunul kʼakʼal chchikintabe skʼop j-israeletik li Moisese, xuʼ van chlub tajek ta skoj taje. Pe xmuyubaj tskoltaan, yuʼun skʼanojan.

Pe maʼuk noʼox chchikintabe skʼop li xchiʼiltake, yuʼun tspas orasion ta stojolalik xtok. Jech xtok, li Moisese la spas orasion sventa li buchʼutik tspasik kʼusi chopol ta stojolale. Jech kʼuchaʼal liʼe, kʼalal akʼbat kʼaʼemal chamel yuʼun Jeova li xvix ti María (Míriam) sbi ta skoj ti chopol kʼoptavane. Li Moisese maʼuk yuʼun xmuyubaj, xi la spas orasion ta stojolale: «Dios cuʼun, avocoluc coltao ta sventa li xchamele» (Números 12:13). Ta skoj ti kʼanvaneme jech la spas.

¿KʼUSITIK XUʼ JCHANTIK?

Jtos kʼuxi xuʼ jchanbetik stalelal li Moisese, jaʼ mi ta jkʼantik ta sjunul koʼontontik li Diose. Li kʼanelal taje jaʼ tstij koʼontontik ta xchʼunel li smantaltak ta skotol koʼontontike (Romanos 6:17). Kʼalal ta sjunul koʼonton ta jchʼuntik mantale, jech xkuxet noʼox yoʼonton kuʼuntik li Jeovae (Proverbios 27:11). Ta me jtabetik sbalil ek mi jech ta jpastike. Yuʼun kʼalal chijtun ta stojolal Dios ta sjunul koʼontontike maʼuk noʼox ti lek ta jpastike, moʼoj, yuʼun ta jkʼupintik spasel xtok (Salmo 100:2).

Yan kuxi xuʼ jchanbetik stalelal Moisés xtoke, jaʼ mi ta jkʼantik ta sjunul koʼontontik li yantike. Kʼalal oy kamigotik o kutsʼ kalaltik chalbutik li kʼusi vokol chaʼie, mi jkʼanojtike jaʼ tskoltautik sventa 1) ta sjunuluk koʼonton jchikintabetik, 2)  jechuk xkaʼi jbatik kʼuchaʼal chaʼi sbaike xchiʼuk 3) ti xkalbetik ti oy ta koʼontontike.

Jech kʼuchaʼal la spas li Moisese xuʼ jpastik orasion ta sventa li buchʼutik jkʼanojtike. Oy van bakʼintik mu kʼusi spas kuʼun chkaʼi jbatik kʼalal oy buchʼu chalbutik svokole. Xuʼ van xi chkalbetike: «Akʼun ta perton, pe jaʼ noʼox xuʼ jpas orasion ta atojolal». Pe vuleso ta ajol liʼe: «Cʼalal tscʼopan Dios bochʼo tucʼ yoʼntone, oy lec stsatsal li scʼope» (Santiago 5:16). Kʼalal ta jpastik orasion ta stojolale xuʼ van oy kʼusi tspas Jeova ti mu jechuk toʼox snopoj tspase. Ta melel, li kʼusi mas lek xuʼ jpastik ta stojolal li buchʼu jkʼanojtike, jaʼ ti jpastik orasion ta stojolalike.a

¿Mi mu jechuk chavil ti ep kʼusitik xuʼ jchanbetik li Moisese? Manchuk mi jaʼ noʼox jun krixchano kʼuchaʼal voʼotike, jaʼ jun slekil kʼelobil kuʼuntik ta skoj li xchʼunel yoʼontone, ti bikʼit laj yakʼ sbae xchiʼuk ti kʼanvane. Kʼalal chkakʼtik persa xchanbel li stalelale, ta jtabetik sbalil voʼotik xchiʼuk tstabeik sbalil li yantike (Romanos 15:4).