NOPAJAN TA STOJOLAL DIOS
«Jaʼ Dios yuʼun li bochʼotic cuxulique»
¿Mi mas van tsots sjuʼel li lajele, ti jaʼ mu sta jech sjuʼel li Diose? Moʼoj ta melel. ¿Kʼuxi xa noʼox mas tsots sjuʼel li lajel o yan «yajcontra» Dios, ti jaʼ «Echʼem Stsatsal» Stuke? (1 Corintios 15:26; Éxodo 6:3.) Li Diose oy sjuʼel sventa chchʼayes li lajele, yuʼun yaloj ta melel ti chchaʼkuxesvan ta achʼ balumile.a ¿Kʼuxi xuʼ jchʼuntik ti oy ta melel li chaʼkuxesele? Yuʼun li Jesús ti jaʼ li Xnichʼon Diose jech laj yal, jaʼ yuʼun xuʼ tspat koʼontontik. (Kʼelo Mateo 22:31, 32.)
Kʼalal la skʼopon Jesús li jsaduseoetik ti mu xchʼunik ti oy chaʼkuxesele, xi laj yale: «¿Me yuʼun muʼyuc aqʼuelojic cʼusi chal ta scʼop Dios ta sventa li chaʼcuxesele? ¿Me mu xanaʼic ti jech laj yal li Diose?: “Vuʼun Diosun yuʼun Abraham, Diosun yuʼun Isaac, Diosun yuʼun Jacob”, xi li Diose. Li Diose mu jaʼuc Dios yuʼun li bochʼotic chamenic oe; jaʼ Dios yuʼun li bochʼotic cuxulique». Li Jesuse jaʼ laj yalbe skʼoplal kʼalal loʼilaj xchiʼuk Dios li Moisés ta jpets chʼix ti tsanem skʼakʼal ti oy xa van ta 3,500 jabile (Éxodo 3:1-6). Jech kʼuchaʼal laj yal Jesuse, li Jeovae xi laj yalbe li Moisese: «Vuʼun Diosun yuʼun Abraham, Diosun yuʼun Isaac, Diosun yuʼun Jacob». Li kʼusi laj yale chakʼ ta ilel ti chchaʼkuxesvan onoʼoxe. ¿Kʼuxi?
Jkʼeltik li stsʼak loʼile. Kʼalal la skʼopon Moisés li Jeovae jal xaʼox slajel li Abraham, Isaac xchiʼuk Jacobe. Li Abrahame oy xaʼox 329 jabil slajel, li Isaaque 224, li Jacobe 197. Akʼo mi jech, li Jeovae laj yal «vuʼun Diosun yuʼun», muʼyuk laj yal «vuʼun toʼox Diosun yuʼun». Li Jeovae koʼol xchiʼuk kuxulik to laj yalbe skʼoplal li oxvoʼ viniketik ti chamemik xae. ¿Kʼu yuʼun?
Xi laj yal li Jesuse: «Li Diose mu jaʼuc Dios yuʼun li bochʼotic chamenic oe; jaʼ Dios yuʼun li bochʼotic cuxulique». Jnoptik kʼusi skʼan xal taje. Ti muʼyukuk li chaʼkuxesele te oyik-o xkaltik ta skʼob lajelal li Abraham, Isaac xchiʼuk Jacobe. Ti yuʼun jechuk taje, li Jeovae jaʼ jun Dios yuʼun animaetik xchiʼuk ti mas tsots sjuʼel li lajele, ti jaʼ mu sta li Jeovae, ti mu xpoj yuʼun lokʼel yajtuneltak li ta skʼob lajele.
Jaʼ yuʼun chaʼa, ¿kʼusi xuʼ xkaltik ta sventa li Abraham, Isaac, Jacob xchiʼuk li yan yajtuneltak Jeova ti chamemike? Li Jesuse xi laj yal ta melele: «Ta stojol Diose cuxajtic» (Lucas 20:38). Ta melel chkʼot ta pasel kʼusi tskʼan yoʼonton Dios ta sventa li chaʼkuxesele, yuʼun koʼol xchiʼuk kuxulik chalbe skʼoplal li tukʼil yajtuneltak ti chamemike (Romanos 4:16, 17). Jech, te oy-o ta sjol Jeova skotol li yajtuneltak ti chamemik xae, yuʼun tukʼ tajek li snopbene, jaʼ to mi kʼot yorail ti chchaʼkuxesane.
Mas to tsots sjuʼel li Jeovae, jaʼ mu sta li lajele
¿Mi oy van ta avoʼonton chakʼel yan velta li avutsʼ avalal ti chamemike? Mi jeche teuk me ta joltik ti mas to tsots sjuʼel li Jeovae, ti jaʼ mu sta li lajele. Yuʼun muʼyuk kʼusi xuʼ xmakat ta be sventa xchaʼkuxes li buchʼutik chamemike. ¿Kʼu yuʼun mu xachanbe mas skʼoplal li chaʼkuxesele xchiʼuk ti xachanbe skʼoplal li Dios ti yaloj tspas taje? Mi jech chapase chanopaj ta stojolal Jeova, ti jaʼ «Dios yuʼun li bochʼotic cuxulique».
a Mi chakʼan chachanbe mas yaʼyejal li chaʼkuxesel albil skʼoplal ta Vivliae, kʼelo li kapitulo 7 ta livro ¿Kʼusi chchanubtasvan ta melel li Vivliae?, ti pasbil yuʼun stestigotak Jeovae.