XCHANOBIL 11
Laj yakʼ ta ilel li xchʼunel yoʼontone
Li Isaake chanubtasat yuʼun stot sventa skʼan li Jeovae xchiʼuk ti akʼo spat yoʼonton li ta kʼusitik yaloj tspase. Pe kʼalal 25 xa ox van sjabilal li Isaake, li Jeovae oy kʼusi la skʼanbe Abraan ti toj vokol ta pasele. ¿Mi xanaʼ kʼusi kʼanbat?
Li Diose xi laj yalbe li Abraane: «Ikʼo batel ta yosilal Moria li akerem Isaak ti jaʼ noʼox stuk anichʼone. Te xamilbun ta jmoton ta jol vits Moria». Li Abraane mu snaʼ lek ti kʼu yuʼun jech kʼanbat yuʼun li Jeovae, akʼo mi jech, la xchʼun.
Ta sob yokʼomale, li Abraane laj yikʼ batel li Isaak xchiʼuk chib yajtuneltak li ta vits Moriae. Kʼalal xanavemik xa ox oxib kʼakʼale, te laj yilik batel ta nom li vits taje. Li Abraane laj yalbe li yajtuneltak ti akʼo te xkomike, yuʼun li stukike chbat xchikʼbeik smoton li Diose. Li Isaake albat yuʼun stot ti akʼo xkuch batel li siʼe, yan li Abraane jaʼ chichʼ batel li kuchilue. Vaʼun, li Isaake xi la sjakʼbe li stote: «¿Bu oy li chij sventa ta jmilbetik ta smoton li Diose?». Xi la stakʼ li Abraane: «Kuni kerem, Jeova chakʼbutik tana li chij sventa matanale».
Kʼalal kʼotik li ta vitse, la spasbeik li skajleb smoton Diose. Laje, li Abraane la xchukbe yok skʼob li skereme, vaʼun la skajan li ta xchikʼobil matanale.
Kʼalal la stsak xa ox xkuchilu li Abraane, jaʼo kʼopoj talel li yaj-anjel Jeova ta vinajele, xi laj yale: «¡Abraan! ¡Mu me kʼusi xapasbe li akereme! Yuʼun laj xakil ti oy xchʼunel avoʼonton ta stojolal li Diose, yuʼun ta sjunul avoʼonton chavakʼ li jun noʼox akereme». Kʼalal joyij li Abraane, te laj yil ti oy jkot chij tsʼotol xulub ta chʼixtike. Jech te bat yikʼ tal, jaʼ la xchikʼ ta smoton Dios ta sventa xkʼexol li xnichʼone.
Kʼalal jech kʼot ta pasele, li Jeovae laj yal ti kʼot ta yamigo li Abraane. ¿Xanaʼ kʼuchaʼal? Yuʼun li Abraane la spas skotol li kʼusi kʼanbat yuʼun Jeovae akʼo mi mu xaʼibe smelolal ti kʼu yuʼun jech kʼanbate.
Li Jeovae xi la svulesbe ta sjol li Abraane: «Ta xkakʼbot ep bendision, ta xkakʼ epajuk amomnichʼnabtak». Ti jech la spas li Abraane xuʼ staik bendision skotol li buchʼutik jaʼ tspasik li kʼusitik lekike.
«Yuʼun skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16).