¿Mi laj yalbe ti tsta xkuxlejal ta vinajel jpasmulil vinik li Jesuse?

Jaʼ jech chichʼ jakʼel ta skoj li kʼusi laj yalbe Jesús li jun jpasmulil vinik ti te jokʼol ta jtel teʼe, xi laj yale: «Ta melel chkalbot li avie: Te chachiʼinun li ta Paraisoe» (Lucas 23:43, TNM). Li Jesuse muʼyuk laj yal bu jotukal oy li paraiso taje. ¿Mi yuʼun van jaʼ skʼan xal ti jmoj chbatik ta vinajele?

Jkʼeltik baʼyel mi pas yuʼun li kʼusi chkʼanbat sventa sta xkuxlejal ta vinajele. Li buchʼutik oy spatobil yoʼonton chbatik ta vinajele laj yichʼik voʼ xchiʼuk laj yichʼik tʼujel ta chʼul espiritu, kʼotemik xa ta yajtsʼaklom Jesús ta skoj ti ayanemik xa ta achʼ ta chʼul espiritue (Juan 3:3, 5). Jech xtok, skʼan xakʼ ta xkuxlejalik li smantal Diose xchiʼuk tukʼ tspas sbaik, ti lekuk stalelalik xchiʼuk ti kʼuxuk ta yoʼontonik li yantike (1 Corintios 6:9-11). Jech xtok, skʼan tukʼ xakʼ sbaik ta stojolal Dios xchiʼuk ta stojolal Cristo, skʼan jech spasik jaʼ to mi chamik liʼ ta Balumile (Lucas 22:28-30; 2 Timoteo 2:12). Mi jech tspasik taje xuʼ xchaʼkuxiik sventa chbat spasik jun mukʼta abtelal ta vinajel xchiʼuk Cristo, chtunik ta paleal xchiʼuk ta ajvalilal sventa stabeik sbalil ta jmil jabil li krixchanoetike (Apocalipsis 20:6).

Pe li jun jpasmulil vinike oy tsots smul la spas xchiʼuk jech-o cham (Lucas 23:32, 39-41). Li vinik taje ta melel laj onoʼox yichʼ ta mukʼ Jesús kʼalal xi laj yalbee: «Naʼun me ti cʼalal chlic apas mantale» (Lucas 23:42). Pe muʼyuk toʼox yichʼoj voʼ, maʼuk jun yajtsʼaklom Cristo ti ayanem ta achʼ ta chʼul espiritue xchiʼuk muʼyuk yakʼoj ta ilel kʼuk sjalil mi lek stalelal xchiʼuk mi tukʼ chakʼ sba ta stojolal Dios. Jaʼ yuʼun, ¿mi sta-o van ti albat yuʼun Jesús ti koʼol chkʼotik ta ajvalil ta vinajel xchiʼuk yan yajtsʼaklom ti tukʼ yakʼoj sbaike? (Romanos 2:6, 7.)

Xi jkoʼoltastike: jnoptik ti oy buchʼu laj yelkʼanbot atakʼine, pe ti la sutes yoʼonton xchiʼuk tskʼanbot pertone, vaʼun xuʼ van chanop ti muʼyuk chatikʼ ta chukele. Pe, ¿mi ta van xakʼubanbe li apʼolmale o ti xchabi li avutsʼ avalale? Moʼoj ta melel. Taje jaʼ van chakʼubanbe li buchʼu apatoj-o lek avoʼonton ta stojolale. Jaʼ jech ek li buchʼutik chkuxiik ta vinajele, skʼan yakʼojikuk xa ta ilel ti stakʼ chʼunbel li skʼopike xchiʼuk ti chchʼunik-o li stukʼil mantaltak Dios kʼalal jaʼo tsventainik li krixchanoetike (Apocalipsis 2:10). Akʼo mi ta sjunul yoʼonton laj yal li jpasmulil vinik kʼalal poʼot xa xchame, muʼyuk toʼox yakʼoj ta ilel ti stakʼ chʼunbel li skʼope.

Pe, ¿mi maʼuk van laj yalbe skʼoplal Jesús ti tsta sbaik ta vinajel li vaʼ kʼakʼal taje? Moʼoj. Mu jaʼuk laj yalbe skʼoplal Jesús maʼ taje, yuʼun muʼyuk bat ta vinajel li vaʼ kʼakʼale, te kom «ta chʼen» oxib kʼakʼal (Mateo 12:40; Marcos 10:34). Jech xtok, kʼalal laj yichʼ chaʼkuxesel li Jesuse 40 to kʼakʼal kom ta Balumil, ta tsʼakale bat ta vinajel (Hechos 1:3, 9). Jaʼ yuʼun, mu xuʼ jchʼuntik ti koʼol bat ta vinajel xchiʼuk Jesús vaʼ kʼakʼal li jpasmulil vinike.

¿Bu junukal paraiso chbat li jpasmulil vinike? Kʼalal mi chaʼkuxie, liʼ chkiltik ta Paraiso ta Balumile, jaʼo kʼalal chventainvan li Jesuse (Hechos 24:15; Apocalipsis 21:3, 4). Mi chakʼan to chachanbe mas smelolal kʼuyelan li Paraisoe xchiʼuk li kʼusi tskʼanbutik Dios sventa te oyukutike, chiʼino ta loʼil jun stestigo Jeova.