¿Kʼusi xuʼ jchantik yuʼun jun jpasmulil vinik?

Li jpasmulil vinik ti oy kʼusi xuʼ jchanbetike, jaʼ li te xvinaj ta lokʼol ti chloʼilaj xchiʼuk Jesuse. Li vinike chopol chaʼi sba ta skoj li kʼusitik chopol spasojane. Xi laj yalbe li Jesuse: «Naʼun me ti cʼalal chlic apas mantale». ¿Mi xanaʼ kʼusi yakal chal li Jesuse?...a Xi laj yalbee: «Melel chacalbot, liʼ ta jliquele, te ta jchiʼin jbatic ta lequilal», jaʼ xkaltik, ta jun Paraiso.

¿Kʼu yelan xanaʼ li Paraiso taje?... Sventa xtakʼ lek kuʼuntike, kalbetik skʼoplal li Paraiso la spas Dios sventa li Adán xchiʼuk Evae. ¿Bu toʼox oy li Paraisoe? ¿Mi liʼ van ta Balumile o mi ta vinajel?...

Mi chaval ti liʼ ta Balumile, jaʼ ta melel. Jech xtok, kʼalal ta jnopbetik skʼoplal ti chnaki ta paraiso li jpasmulil vinike, xuʼ jnoptik ti liʼ chnaki ta Balumil mi kʼataj xaʼox ta Paraisoe. ¿Kʼu van yelan taje?... Jkʼeltikik.

Li Paraiso bu laj yakʼ nakiikuk Adán xchiʼuk Eva li Jeovae jaʼ «nichimaltik Eden» sbi chal li Vivliae. ¿Mi xnop avuʼun kʼu to yutsil li nichimaltik taje?... Ta melel, toj lek xchiʼuk toj kʼupil van sba sventa xijnaki-o ti muʼyuk bu jech kilojtik-oe.

¿Kʼusi chanop li voʼote? ¿Mi liʼ van chnaki ta Balumil Jesús xchiʼuk li jpasmulil vinik ti la sutes yoʼontone?... Moʼoj, yuʼun li Jesuse te xaʼox ta vinajel tsventain tal li Paraiso liʼ ta Balumile. Vaʼun, chchaʼkuxes li jmulavil vinike xchiʼuk tskʼel ti oyuk yuʼun li kʼusitik chtun yuʼun ta Paraiso ta Balumile, taje xkoʼolaj ti te oy xchiʼuk li jpasmulil vinike. Pe, ¿kʼu yuʼun chakʼ nakiuk ta Paraiso ti jaʼ jun jpasmulile?... Kalbetik skʼoplal taje.

Melel onoʼox ti toj chopol li kʼusitik la spas li vinik taje. Pe jech xtok, oy epal miyon krixchanoetik ti chopol kʼusitik la spasike. Jutuk mu skotolikuk la spasik li kʼusi chopole, yuʼun muʼyuk laj yojtikinik xchiʼuk muʼyuk bu xchanik li kʼusitik tskʼan yoʼonton Jeovae.

Li buchʼutik taje xchiʼuk li jmulavil vinik ti loʼilaj xchiʼuk Jesuse, chchaʼkuxesatik ta Paraiso liʼ ta Balumile. Chchanik li kʼusi tskʼan yoʼonton Jeovae. Vaʼun, te chakʼik ta ilel mi skʼanojik.

¿Mi xanaʼ kʼuxi chakʼik ta ilel?... Jaʼ mi chchʼunik mantale. ¡Toj kʼupil sba li kuxlejal ta paraisoe, ti chijkuxi xchiʼuk krixchanoetik ti skʼanojik Jeova xchiʼuk ti skʼanoj sbaik ta jujuntale!