Achʼ to lik tunuk ta Jtsop Jbeiltasvanej

Li ta sob mierkoles ta 5 yuʼun septiembre ta 2012, laj yaʼiik jun aʼyej li buchʼutik te chtunik ta Betel ta Estados Unidos xchiʼuk ta Canadae. ¿Kʼusi aʼyejal? Jaʼ ti lik tunuk ta Jtsop Jbeiltasvanej yuʼun Stestigotak Jeova li ermano Mark Sanderson ta 1 yuʼun septiembree.

Li stot smeʼe jaʼik yajtsʼaklomtak Cristo, te chʼi ta San Diego (California, Estados Unidos) li ermano Sandersone, laj yichʼ voʼ ta 9 yuʼun fevrero ta 1975. Te la slikes li abtelal ta prekursor ta Saskatchewan (Canadá) ta 1 yuʼun septiembre ta 1983. Ta disiembre ta 1990 nel yuʼun chanun ta Chanob vun sventa Xchanubtasel Jtuneletik, numero 7 (ti xi sbi avie: Chanob vun ta Vivlia sventa Ermanoetik ti Chʼabal Yajnilike) ta Estados Unidos. Vaʼun li ta avril ta 1991 laj yichʼ takel batel ta prekursor espesial ta Terranova (Canadá), ta jun lum ti kakal ta nabe. Ta mas tsʼakale, tun ta xkʼexol jkʼelvanej ta sirkuito jaʼ to ti laj yichʼ takel ta ikʼel ta fevrero ta 1997 sventa chtun ta Betel ta Canadá. Laje laj yichʼ takel batel ta Betel ta Estados Unidos ta noviembre ta 2000, te abtej ta Servicios de Información sobre Hospitales xchiʼuk ta mas tsʼakale ta Departamento sventa cholmantal.

Li ta septiembre ta 2008 ay ta chanun li ermano Sanderson ta Chanob vun sventa Buchʼutik Sbainojik Betel, vaʼun laj yichʼ biiltasel ta komite sventa Betel ta Filipinas. Albat ti akʼo sut tal ta Estados Unidos ta septiembre ta 2010, te abtej ta jkoltavanej yuʼun li Komite sventa Cholmantal yuʼun Jtsop Jbeiltasvaneje.