¿Buchʼutik li Jtsop Jbeiltasvanej yuʼun stestigotak Jeovae?

Jaʼik jtsop yajchankʼoptak Kristo ti lek yijik ta mantale xchiʼuk ti tsbeiltasik li stestigotak Jeova ta spʼejel Balumile. Chaʼtos kʼusi sbainojik, jaʼ liʼe:

• Jaʼ sbainojik skʼelel vunetik ti lokʼemik ta Vivliae, chchapanik mantaletik sventa tsobajeletik xchiʼuk li chanob vunetik yuʼun stestigotak Jeovae (Lukas 12:42).

• Tsbeiltasik li abtelal tspasik ta spʼejel Balumil li stestigotak Jeovae. Taje te tsakal skʼoplal li cholmantale xchiʼuk ti kʼu yelan chichʼ tunesel li matanal takʼine.

Li Jtsop Jbeiltasvaneje jaʼ chchanbeik li «jtakboletik xchiʼuk moletik» ta Jerusalen ta baʼyel siglo ti oy kʼusi tsots skʼoplal la snopik ti te tsakal skʼoplal sjunul stsobobbailike (Echos 15:2). Xchiʼuk jech tspasik kʼuchaʼal li viniketik ti tukʼ laj yakʼ sbaik ta baʼyel sigloe, yuʼun maʼuk tspasik mantal li ta j-organisasionkutike. Tsaʼik beiltasel ta Vivlia xchiʼuk snaʼojik ti jaʼ jolil ta tsobobbail li Kristoe (1 Korintios 11:3; Efesios 5:23).

¿Buchʼutik chtunik li ta Jtsop Jbeiltasvanej avie?

Li buchʼutik chtunik ta Jtsop Jbeiltasvaneje jaʼik Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph Mark Sanderson, David Splane xchiʼuk Jeffrey Winder. Te ch-abtejik ta Warwick, (Nueva York, Estados Unidos).

¿Kʼu yelan ch-abtejik li Jtsop Jbeiltasvaneje?

Li Jtsop Jbeiltasvaneje svaʼanoj vakib komite sventa sbainik skʼelel li abtelale. Ta jujun departamentoe ta jun o ta chaʼvoʼ ch-abtejik.

• Komite yuʼun Kordinadoretik. Li buchʼutik te ch-abtejike oy ta sbaik skʼelel li kʼusitik skʼan chapanbel lek skʼoplale xchiʼuk jaʼ oy ta sbaik skʼelel kʼalal oy kʼusi tsots chkʼot ta pasele, jech kʼuchaʼal nojelal ta voʼ, nikel o yan kʼusitik, kʼalal chichʼik nutsel lokʼel ta slumalik ta skoj li kʼusitik jchʼunojkutike xchiʼuk kʼalal ta jnuptankutik yan vokoliletike.

• Komite sventa Jtuneletik. Jaʼ oy ta sbaik skʼelel li kʼusitik chtun yuʼunik li buchʼutik chtunik ta Betele.

• Komite sventa Vunetik. Jaʼ oy ta sbaik skʼelel sventa spasik imprimir vunetik ti lokʼemik ta Vivliae, stakel batel ta jujun tsobobbailetik xchiʼuk tskʼelik li svaʼanel salonetik ti bu chichʼ ichʼel ta mukʼ Diose, svaʼanel ofisinaetik xchiʼuk Beteletik.

• Komite sventa Cholmantal. Jaʼ sbainojik skʼelel ti xichʼ cholel «li lekil aʼyejetik ta sventa li Ajvalilale» (Mateo 24:14).

• Komite sventa Chanubtasel. Jaʼ sbainojik xchapanel li tsobajeletike, chanob vunetik, audio xchiʼuk video.

• Komite sventa Stsʼibael vunetik. Jaʼ sbainojik skʼelel li kʼusitik yichʼoj tal li vunetik ti lokʼemik ta Vivliae, jpajinakutik ta Internet xchiʼuk tskʼel kʼu yelan xbat li sjelubtasel kʼopetike.

  Oy to kʼusi yan tspasik li Jtsop Jbeiltasvaneje, tstsob sbaik jujun xemana sventa tskʼelik li kʼusitik chtun yuʼun li organisasione. Chchanbeik lek skʼoplal li Vivliae xchiʼuk chakʼ sbaik ta beiltasel yuʼun li xchʼul espiritu Diose. Chakʼik persa xtok ti jmojuk kʼusi xkʼot ta nopel yuʼunike (Echos 15:25).

¿Buchʼutik tskoltaik li Jtsop Jbeiltasvaneje?

Jaʼik li buchʼutik tukʼ yakʼoj sbaik, ti xtojobik lek xchiʼuk ti ep xa kʼusi xchanojike, jaʼ tskoltaik li Komiteetik yuʼun Jtsop Jbeiltasvaneje (1 Korintios 4:2). Li jkoltavanejetik taje chkʼotik jujun xemana ek li ta tsobajeletik ti tspasik li Jtsop Jbeiltasvaneje. Muʼyuk bu tstikʼ sbaik ta snopel ti kʼusi chichʼ pasele, pe xuʼ xal sloʼilik xchiʼuk xuʼ xalik kʼusitik jtunelik sventa li kʼusi tskʼelbeik skʼoplale, jech xtok jaʼ jech tspasik li kʼusi chkʼot ta nopel yuʼun li Komiteetike xchiʼuk tskʼelik ti kʼusitik lek kʼotemik ta pasele. Xchiʼuk xuʼ xtakatik batel ta svulaʼanel ermanoetik ta spʼejel balumil o ch-albatik ti sjelubtasik mantal li ta tsobajeletik tspasik jujun jabile xchiʼuk li ta tsobajel sventa Chanob vun ta Galaade.