Jmoj oyutik ta skoj ti jkʼanoj jbatike yaʼyejal tsobajel ti chichʼ pasel jujun jabile

LEK xvinaj li muyubajel ta Salon sventa Mukʼta Tsobajel ta Jersey City (Nueva Jersey, Estados Unidos). Jaʼo ta sob 3 yuʼun oktuvre ta 2009, mas ta voʼmil la stsob sbaik li ta tsobajel ti chichʼ pasel jujun jabil ti jaʼ li numero 125 yuʼun Watch Tower Bible and Tract Society of Pennsylvania. Li ta yoxibal Betel ta Estados Unidos xchiʼuk ta Betel ta Canadae ta smilal noʼox ti la stabeik sbalil li kʼusi echʼe, yuʼun laj yaʼiik xchiʼuk laj yilik ta television. Ta stekelike 13,235 la skʼupinik li tsobajel ti oxib ora jalije, jmoj tsobolik ta skoj ti skʼanojik Jeovae.

Li buchʼu laj yichʼ ta venta li kʼusitik jelave jaʼ jun li ta Jtsop Jbeiltasvaneje, Geoffrey Jackson, laj yal ti akʼo xjelav jtsop ermanoetik ta Betel sventa tskʼejintaik kʼejojetik li ta svunal kʼejoj ti achʼ to lokʼe. Jaʼ onoʼox li ta Jtsop Jbeiltasvanej ti buchʼu la sbeiltas li kʼejoje, jaʼ li ermano David Splane, laj yal uni jaypʼel kʼu yuʼun toj tsots skʼoplal ta sventa melel yichʼel ta mukʼ Jeova li sone. Li buchʼutik te tsobole laj yichʼik albel ti akʼo skʼejintaik oxib li achʼ kʼejojetike: baʼyel kʼejinik li jkʼejimoletike, laje jmoj kʼejin skotolik. Ti jech oy noʼox jayvoʼ la xchapan sba ermanoetik sventa chkʼejinike jaʼ noʼox me sventa li tsobajel tsots skʼoplal echʼ taje, mu me stakʼ ti jech xichʼ pasel li ta tsobajeletike xchiʼuk li ta mukʼta tsobajeletike.

Yaʼyejal yan Beteletik

Laje laj yalbeik yaʼyejal li lumetik bu likemik tal voʼob ermanoetik ti chtunik ta komite ta Betel ta slumalike. Li Kenneth Little ti likem tal ta Canadae laj yal ti poʼot xa la mas ep chlik spasik vunetik ta sventa Estados Unidos xchiʼuk sventa Canadae, taje jaʼ skʼan xal ti lajuneb to velta x-echʼ yepal tspasik li vunetike. Sventa spas yuʼunike, chlik stunesik achʼ makina ti jutuk mu kʼakʼal-akʼobal ch-abteje, jaʼ xkaltik, vaklajuneb ora ch-abtej.

Li Reiner Thompson jaʼ laj yalbe skʼoplal li abtel sventa Ajvalilal yuʼun Dios ta República Dominicana, yan li Albert Olih jaʼ laj yalbe skʼoplal li kabteltik ta Nigeriae. Li Emile Kritzinger ti likem ta Mozambiquee laj yal ti muʼyuk toʼox lek tsakal skʼoplalik ta stojolal ajvalile, jaʼ to ta 1992 chap skʼoplalik kʼalal oy xaʼox sjaylajunebal jabil yiloj svokolike. Li jabiletik echʼem tale epajem tajek jcholmantaletik li ta oxib lum taje. Li Viv Mouritz ta Australiae laj yalbe skʼoplal ti kʼuyelan epajemik tal li ta Timor Orientale, ti jaʼ yichʼoj ta venta li Betel bu chtune.

Komiteetik yuʼun Jtsop Jbeiltasvanej

Stekel li yabteltak yajrextikotak Jeovae, kom ta skʼob skʼelel li vakib komiteetik yuʼun Jtsop Jbeiltasvanej li ta 1976. Echʼ jayib jabil ta mas tsʼakale laj yalbeik yan chijetik ti akʼo xkoltavanike, li avi une oyik xa 23. Laj yichʼ jakʼbel sloʼilik vakvoʼ, ti 341 jabiletik ta skotol ti kʼu xa sjalil chtunik tal ta tsʼakal orae, o 57 jabil chtunik ta jujuntal xkaltik.

Li buchʼu baʼyel laj yichʼ jakʼbel sloʼile jaʼ li ermano Don Adams ti lik abtejuk ta Betel ta 1943. La xchapbe skʼoplal ti Komite ti Jbabeetike jaʼ yabtel kʼuchaʼal chkalbetik sbie, jaʼ jbabe yuʼun li voʼob komiteetik ti parejo tskolta sbaik ta abtele. Li komite taje jaʼ oy ta sba skʼelel li vokoliletik ta skoj nutsel, kʼusitik skʼan chapanbel skʼoplal ta stojolal ajvalil, yan vokoliletik ti anil noʼox tsnuptanike, nojelal ta voʼ, nikel o yan kʼusitik ti tsnuptanik li yajrextikotak Jeova ta spʼejel Balumil ti anil noʼox skʼan kʼelbel skʼoplale.

Li Dan Molchan laj yalbe smelolal li yabtel Komite ti tskʼelbe skʼoplal Buchʼutik chtunik ta Betele, ti jaʼ tskʼel ti lekuk oyik ta mantal xchiʼuk ti mu kʼusi snuptanik li 19,851 ermanoetik ti chtunik ta Betel ta spʼejel Balumile. Laje li David Sinclair laj yalbe skʼoplal li Komite sventa Vunetik ti jaʼ tskʼelbe skʼoplal li stakel ta kʼanel kʼusitik chtune xchiʼuk li abtejebaletik chtun ta Betele. Vaʼun li Robert Wallen, ti jutuk xa mu 60 jabil chtun ta Betele, laj yalbe skʼoplal ti Komite sventa Chol mantale jaʼ tskʼelbe yabtel steklumal Jeova ta chol mantal xchiʼuk li ta tsobobbailetike. Laje li William Malenfant laj yalbe skʼoplal ti tsots li abtel tspas li Komite sventa Chanubtasel ti kʼalal chchapan li kʼusitik ch-echʼ ta mukʼta tsobajel ta oxib kʼakʼale. Ta slajebe li John Wischuk laj yalbe skʼoplal ti Komite sventa Stsʼibael vunetike jaʼ tskʼel ti lek tukʼ xichʼ kʼelbel skʼoplal li mantaletik ti chlokʼ ta jvuntike.a

Li teksto sventa sjabilal 2010 jaʼ chalbe skʼoplal kʼanelal

Li yan mantaletike jaʼ la sjelubtasik oxvoʼ li buchʼutik ta Jtsop Jbeiltasvaneje. Li baʼyele jaʼ li Gerrit Lösch ti xi la slikese: «¿Mi cha kʼan ti kʼanbilote?». Laje laj yal ti toj tsots skʼoplal ti kʼanbiluk xaʼi li krixchanoe xchiʼuk toj tsots me skʼoplal ti jechuk xkaʼi jbatik sventa lek xi jchʼie. Jaʼ koliyal ti jech skʼanojutik Jeova ti kuxulutike, yuʼun muʼyuk kʼusi smalaoj tsta ti jech la spasutike. Li kʼusi tstij koʼontontik sventa jcholtik mantal xchiʼuk ti xi jchanubtasvan eke jaʼ ti jkʼanojtik li Jeovae.

Li kʼanelal yuʼun yajtsʼaklomtak Cristoe te tsakal lek skʼoplal li ta beiltaseletik ta Vivliae, jaʼ yuʼun maʼuk noʼox jkʼanoj li jchiʼiltaktike yuʼun jkʼanojtik kʼalal ta kajkontratik (Mat. 5:43-45). Li ta mantal taje te laj yichʼik albel sventa snopbeik skʼoplal li vokoliletik laj yil Jesús ta jkojtike. La spas orasion ta stojolal li soltaroetik ti la sjokʼanik ta jtel teʼe, akʼo mi laj yichʼ tsitsel, laj yichʼ akʼel ta kʼexlal, laj yichʼ tubtael xchiʼuk laj yichʼ xenbel xokon. ¿Mi mu jechuk ti jaʼ tstij koʼontontik ta skʼanel mase? Vaʼun li ermano Lösch laj yalbe skʼoplal li teksto ta sjabilal 2010 ti te lokʼem ta 1 Corintios 13:7, 8: Li kʼanelale tstsʼik yuʼun skotol. Mu xlaj-o skʼoplal. Ta melel, maʼuk noʼox ti xuʼ xi jkuxi sbatel osile, yuʼun xuʼ xkichʼtik kʼanel xchiʼuk xi jkʼanvan sbatel osil.

¿Mi oy xlaj agasolina ta be?

Li Samuel Herd la slikes ta jun lokʼolkʼop li mantal laj yale. Jnoptik avaʼiik ti laj yikʼutik batel ta xanbal ta skaro jun kamigotike, 50 kilometro snamal. Te to ta kuni chotlebtik laj kiltik batel ti bu chakʼ ta ilel ti xokol xa stankeal li gasolinae. Chkalbetik li buchʼu yakal tstsʼot karoe, pe chalbutik ti mu la jvul koʼontontike yuʼun la oy to chanib litro li sgasolinaile. Ta jlikel une paj ta abtel li smotoral karoe. ¿Mi laj van jtabetik sbalil ti laj yichʼ tsʼotel-o echʼel li karo ti chʼabal lek sgasolinaile xchiʼuk ti te xa jechuk ti li jkom ta be yuʼune? Ta melel, jaʼ lek ti lajuk yichʼ nojesbel li stankeale. Ta sventa li mantale jaʼ jechtik ek: skʼan me nojuk li jtanketike, jaʼ xkaltik, ti nojuk ta joltik li yojtikinel Jeovae.

Sventa mu chʼabaluk xkom jgasolinatik xkaltik li ta mantale skʼan me nopajtik noʼox jnojesbetik li yave. Chantos ti kʼuyelan xuʼ jpastike. Baʼyel, jechuk jpastik-o batel ti kʼuyelan jchapanojtik chi jchanunaj xchiʼuk ti kʼuyelan ta jkʼeltik Vivlia jujun kʼakʼale. Pe taje maʼuk noʼox me ta jkʼeltik letraetik; yuʼun ta jkʼan chkojtikintik mas li Vivliae xchiʼuk ti xkaʼibetik smelolal li kʼusi chale. Xchibal, skʼan me jtunestik lek li Akʼobal sventa Yichʼel ta Mukʼ Jeova ta Kutsʼ Kalaltike. ¿Mi ta jnojestik jujun xemana xkaltik li jtanketike, o mi jujutiʼ noʼox chkakʼbetik? Yoxibal, jaʼ ti xi jbat li ta tsobajeletik ti bu ta jchantik Vivlia jtekeltike. Li ta xchanibal une, jaʼ ti jsaʼtik ti bu lek tsʼijil noʼox xchiʼuk ti mu kʼusi xchʼay koʼontontik sventa jnopbetik skʼoplal li smantaltak Jeovae. Ta jkʼan ta jchanbetik stalelal li jtsʼibajom yuʼun salmo ti xi laj yale: «Jnaʼ ti cʼu xiʼelan ta voʼonee; ta jnopilan scotol cʼu xʼelan li avabtel[e]» (Sal. 143:5).

«Li bochʼotic tucʼ yoʼntonique xojobanic noʼox»

Li ermano John Barr ti jaʼ la sbain li yoxibal mantal ti slajeb xae, te laj yalbe skʼoplal li trigo xchiʼuk li chopol jobele (Mat. 13:24-30, 38, 43). Li ta slokʼolkʼop Jesús taje te chalbe skʼoplal ti kʼalal «tsta yorail chichʼ tuchʼel» li trigoe jaʼo chichʼ tsobel «li xnichʼnab Diose», vaʼun parte chichʼ akʼel li chopol jobel sventa chichʼ chikʼele.

Jamal laj yal ermano Barr ti mu ta sbateluk osil chichʼ tsobel li tsʼunobile. Laj yalbe skʼoplal Mateo 24:34 ti xi chale: «Li cristianoetic ti liʼ cuxulic ta orae, oy muʼyuc to chchamic jaʼ to me iʼechʼ scotol li cʼusitic laj calboxuque». Vaʼun chib to velta la skʼel liʼe: «Taje jaʼ chakʼ ta ilel Jesús ti tsta sba xkuxlejalik li tʼujbil yajtsʼaklomtak Cristo ta 1914 kʼalal liʼik toʼox ta Balumile —kʼalal lik vinajuk senyail ti liʼ xa oy li Cristoe— xchiʼuk li buchʼutik tʼujbil ti chilik chlik li mukʼta tsatsal vokolile». Mu jnaʼtik kʼu sjalil smakoj ti «liʼ to cuxulic» ti xie, pe taje te smakojbe skʼoplal li chaʼvokʼ kuxlejal ti tsjelilan sbae. Akʼo mi jeltos sjabilalik li tʼujbil ermanoetike, li buchʼutik «liʼ to cuxulic» xie, tsjelilan sba xkuxlejalik li ta slajeb kʼakʼale. ¡Tspat tajek koʼontontik ti muʼyuk toʼox bu chamemik li buchʼutik tʼujbil chbatik ta vinajel ti mas to keremik kʼalal mi lik li mukʼta tsatsal vokolile, jaʼ xkaltik, li buchʼutik la sta sba xkuxlejalik xchiʼuk li tʼujbil ermanoetik ti malubemik xae, ti laj yilbeik li senyail kʼalal lik vinajuk ta 1914!

«Li xnichʼnab Diose» ta sjunul yoʼonton smalaojik li smoton tstaik ta vinajele. Pe kʼusiuk ti spatobil koʼontontike, jkotoltik me skʼan tukʼ xkakʼ jbatik, ti xi jxojobaj noʼox kʼalal to ta slajebale. ¡Jaʼ jun mukʼta matanal chkaʼitik ti jaʼo kuxulutik ti kʼalal chichʼ tsobel li trigo taje!

Kʼalal laj xaʼox skʼejintaik li slajeb kʼejoje, jaʼ la stsutses tsobajel ta jun orasion li Theodore Jaracz ti jaʼ li ta Jtsop Jbeiltasvaneje. ¡Toj echʼ xa noʼox la spat oʼontonal li tsobajel taje!

[Tsʼib ta yok vun]

[Rekuadro ta pajina 5]

CHANOB VUN SVENTA MOLETIK

Li ta tsobajel taje, li ermano Anthony Morris ti jaʼ li ta Jtsop Jbeiltasvaneje, te laj yalbe skʼoplal ti chichʼik to yan chanubtasel li moletik ta tsobobbailetike. Lik ta slikebal 2008 ta Estados Unidos ta snail chanubtasel ta Patterson (Nueva York) li chanob vun sventa moletike. Jaʼ toʼox tsutsem li chanob vun 72, yichʼojik xaʼox chanubtasel 6,720 moletik. Pe toj ep to abtel skʼan pasel, yuʼun oy mas ta 86,000 moletik li ta Estados Unidose. Jaʼ yuʼun li Jtsop Jbeiltasvaneje, laj yal ti akʼo xlik jun chanob vun ta Brooklyn (Nueva York), ti lik ta 7 yuʼun disiembre ta 2009.

Chib u chichʼik chanubtasel chanvoʼ jkʼelvanejetik ta sirkuito ta Patterson sventa chtunik ta jchanubtasvanej, mi laj une chbatik ta Brooklyn sventa chchanubtasvanik. Chchanubtasik chanvoʼ ermanoetik, mi laj une jaʼ xa chchanubtasvanik li achʼetike, jaʼ xa chbat chanubtasvanikuk ta Salonetik sventa Mukʼta Tsobajel xchiʼuk ta Salonetik sventa Tsobobbail. Jaʼ jech chichʼ pasel, jaʼ to mi oy xaʼox lajchaʼvoʼ jchanubtasvanejetik ti chakʼik vakjot chanubtasel jujun xemana ta inglés ta Estados Unidose. Mi laje chichʼ chanubtasel chanvoʼ jchanubtasvanejetik ta español. Li chanob vun taje maʼuk me xkʼexol li Chanob vun sventa Moletik xchiʼuk yajKoltaobbatake. Taje jaʼ sventa chichʼik tsatsubtasel ta mantal li moletike. Li Beteletik ta spʼejel Balumile chlik yetʼesik li chanob vun ta Salonetik sventa Mukʼta Tsobajel xchiʼuk Salonetik sventa Tsobobbail li ta kabteltik chlik ta septiembre yuʼun 2010 kʼalal ta agosto yuʼun 2011.

[Lokʼol ta pajina 4]

Li tsobajel ti chichʼ pasel jujun jabile laj yichʼ likesel ta kʼejojetik ti jaʼ la stunesik li achʼ svunal kʼejoj ti jaʼ sbi Jkʼejintatik li Jeovae