¿Kʼuxi chapal li Jtsop Jbeiltasvaneje?
LI Jtsop Jbeiltasvanej yuʼun yajrextikotak Jeovae jaʼik viniketik ti yakʼoj sbaik ta tunel ta stojolal Dios ti yichʼojik tʼujele. Jaʼ jkʼopojel kʼotemik ta stojolal li j-abtel ti tukʼ yoʼonton, ti lek pʼije, ti jaʼ oy ta sba chakʼ veʼlil ta mantale, ti chbeiltasvan xchiʼuk ti jaʼ jbabe echʼel ta xcholbel skʼoplal li Ajvalilal yuʼun Dios ta spʼejel Balumile (Mat. 24:14, 45-47).
Ta stsob sbaik jujun xemana li Jtsop Jbeiltasvaneje —ta jujun onoʼox mierkoles—, vaʼun jaʼ jech jmoj-o tsobol ch-abtejik (Sal. 133:1). Maʼuk noʼox chbeiltasvanik li ermanoetik taje, moʼoj, yuʼun yichʼoj yabtelik ta komiteal xtok. Sventa xchabiik lek li kʼusitik yuʼuntak Ajvalilal yuʼun Diose, li jujuvokʼ komitee oy me kʼusi ta sbaik skʼelel, jech kʼuchaʼal chkaltik batel tana liʼe.
◼ BANKILAL YUʼUN KOMITEETIK. Jaʼik li jbabeetik ta jujuvokʼ komite yuʼun li Jtsop Jbeiltasvaneje xchiʼuk jun yajsekretarioik ti jaʼ ek li ta Jtsop Jbeiltasvaneje. Li yabtelike jaʼ ti tskʼelik ti lekuk xchiʼuk ti ta yorailuk xkʼot ta pasel yuʼun yabtelik li komiteetike. Ta xkoltavan xtok kʼalal chkʼot tsots vokolile, nutsel, nojelal ta voʼ, nikel, xchiʼuk yantik vokoliletik ti anil skʼan kʼelele, ti chil-o svokolik li yajrextikotak Jeova ta buyuk noʼox jotukal ta spʼejel Balumile.
◼ KOMITE TI TSKʼELBE SKʼOPLAL BUCHʼUTIK CHTUNIK TA BETELE. Li ermanoetik taje jaʼ sbainojik skʼelbel slekilalik ta mantal xchiʼuk ta yantik kʼusitik li buchʼutik chtunik ta Betel ta spʼejel Balumile. Sbainojik stʼujel xchiʼuk stakel ta ikʼel li buchʼutik chlik tunikuk ta beteletik ta butikuk noʼoxe xchiʼuk tstakʼik li kʼusitik tsjakʼik ta sventa li yabtelik ta Betele.
◼ KOMITE SVENTA VUNETIK. Tskʼelbe skʼoplal ta spʼejel balumil li spasel vunetik ti lokʼem sloʼilal ta Vivliae xchiʼuk li stakel batele. Oy ta sba skʼelel li spasobil vunetik xchiʼuk li kʼusitik yuʼuntake xchiʼuk tstunes jujuvokʼ j-abteletik yuʼun yajrextikotak Jeova. Tskʼel ti lekuk xichʼ tunesel li matanal takʼin ta sventa li abtelal yuʼun Ajvalilal yuʼun Dios ta spʼejel Balumile.
◼ KOMITE SVENTA CHOL MANTAL. Tskʼelbeik skʼoplal li chol mantale xchiʼuk li kʼusitik sventa tsobobbaile, prekursoretik, moletik xchiʼuk li jkʼelvanejetik ti chvulaʼanvanike. Tskʼelik kʼuxi chichʼ chapanel Kabteltik sventa Dios, tstakik ta ikʼel jchanunetik ta Chanob vun ta Galaad, ta Chanob vun sventa Xchanubtasel Jtuneletik, vaʼun jaʼ tstakik batel xtok ta yan butikuk kʼalal mi lokʼik ta chanun taje.
◼ KOMITE SVENTA CHANUBTASEL. Jaʼ oy ta sba li kʼusitik chichʼ akʼel ta chanel ta mukʼta tsobajeletik xchiʼuk ta tsobajeletik ta tsobobbaile. Tskʼel kʼuxi chichʼ chanubtasel ta mantal li ermanoetik ta Betele xchiʼuk tskʼel jayibuk chanob vunetik, jech kʼuchaʼal ta Galaad xchiʼuk ta sventa Abtelal ta Prekursor, xchiʼuk tskʼel xtok ti kʼuxi xuʼ chichʼ chapanel li spasel diskoetik xchiʼuk pelikulaetik.
◼ KOMITE SVENTA STSʼIBAEL VUNETIK. Jaʼ oy ta sba skʼelel xchapanel li veʼlil ta mantale, ti chichʼ tsʼibael sventa xichʼ akʼbel li ermanoetike xchiʼuk li yan krixchanoetike. Tstakʼ li kʼusitik chichʼ jakʼel ta Vivliae xchiʼuk chalik mi xuʼ xlokʼ jtosuk mantal, jech kʼuchaʼal li sventa dramae xchiʼuk li voskejoetik ta sventa mantale. Jech xtok, tskʼel li abtelal ta sjelubtasel kʼop ti chichʼ pasel ta spʼejel Balumile.
Li jtakbol Pabloe laj yal ti xkoʼolaj la kʼuchaʼal sbekʼtal jun krixchano li stsobobbail yajtsʼaklomtak Cristo ti tʼujbilike, vaʼun laj yal ti tsots yabtelik ta jujuntale, mu stakʼ chʼakal x-abtejik, skʼan xkʼuxubin sbaik xchiʼuk jmoj spas li yabtel akʼbilik yuʼun Diose (Rom. 12:4, 5; 1 Cor. 12:12-31). Li Jolil Jesucristoe, chakʼbe li kʼusitik chtun yuʼun li buchʼutik taje, sventa skolta sbaik, jmojuk x-abtejik xchiʼuk sventa oyuk veʼlil ta mantal (Efe. 4:15, 16; Col. 2:19). Jaʼ jech chapal li Jtsop Jbeiltasvanej sventa tsbeiltas li abtelal ta spʼejel Balumil ti koltabilik yuʼun Jeova ta xchʼul espiritue.