Oy kʼusi kʼux chaʼi li Diose. ¿Kʼuxi xuʼ xmuyubaj kuʼuntik?

¿Mi oy okʼemot junuk velta ta skoj ti oy kʼusi kʼux chavaʼie?...a Jkotoltik oy van jech kʼotem ta jtojolaltik. Pe bakʼintike maʼuk ta skoj ti lajem o yayijem junuk jkʼobtik o koktike. Xuʼ van oy buchʼu chal jutbil kʼop ta jtojolaltik. ¿Mi mu jechuk ti kʼux chkaʼitik taje?... Kʼux chaʼi Dios ek kʼalal chalik jutbil kʼop ta stojolale. Jkʼelbetik skʼoplal taje xchiʼuk jkʼeltik kʼusi xuʼ jpastik sventa xmuyubaj kuʼuntik.

Li Vivliae chalbe sloʼilal jlom krixchanoetik ti chalik ti skʼanojik li Diose, pe oy kʼusi la spasik ti «ep laj yacʼbeic yat yoʼnton[e]». Ta melel kʼux laj yaʼi li Diose. Jkʼeltik batel ti kʼu yuʼun kʼux chaʼi Dios kʼalal muʼyuk ta jpastik li kʼusi chalbutike.

Li baʼyel chaʼvoʼ krixchano la spas li Jeovae oy kʼusi la spasik ti kʼux tajek laj yaʼi li Diose. Li Jeovae te la snakan ta jun Paraiso ti jaʼ sbi «nichimaltik Edene». ¿Kʼusi sbi li chaʼvoʼ krixchano taje?... Jaʼ taje, jaʼ li Adán xchiʼuk Evae. Jkʼeltik kʼusi la spasik ti kʼux laj yaʼi yuʼunik li Jeovae.

Kʼalal te xaʼox oyik ta nichimaltike albatik yuʼun Jeova ti skʼan xchabiik leke. Albatik xtok ti xuʼ xil yalab xnichʼnabike xchiʼuk ti xuʼ jmoj xkuxiik sbatel osil tee. Pe oy kʼusi toj chopol kʼot ta pasel kʼalal muʼyuk toʼox mi junuk yalab xnichʼnabik li Adán xchiʼuk Evae. ¿Mi xanaʼ kʼusi la spasik?... Oy jun anjel ti la stijbe yoʼonton Eva sventa stoy sba ta stojolal li Jeovae xchiʼuk ta tsʼakale jech la spas li Adán eke. Jkʼeltik kʼuxi kʼot ta pasel.

Li jun anjel taje la spas ti chkʼopoj xa yilel jkot kiletel chon sventa tskʼopon li Evae. Li Evae lek laj yaʼi li kʼusi albate: ti xuʼ xkʼot jech «chac cʼu chaʼal Dios[e]». Jaʼ yuʼun, la spas li kʼusi laj yal li kiletel chone. ¿Mi xanaʼ kʼusi la spas?...

Li Evae la slobe sat jpets teʼ, taje albilik xa onoʼox yuʼun Dios ti mu stakʼ sloʼike. Kʼalal muʼyuk toʼox pasbil yuʼun Dios li Evae, xi laj yalbe li Adane: «Xuʼ chaloʼ scotol li sat teʼetic liʼ oy ta tsʼunubaltique. Jaʼ noʼox mu xaloʼbe sat li jpets teʼ ti jaʼ sventa chacʼ ta naʼel cʼusi lec, xchiʼuc cʼusi chopole, yuʼun me chaloʼe, ta xacham».

Taje snaʼoj xa onoʼox li Evae. Pe bat ta yoʼonton skʼelel li jpets teʼe, jaʼ yuʼun «laj yil ti toj cʼupil sba li sat teʼe; chac xa sloʼ yaʼay ta ora [...]. Jech bat stul jbej li sat teʼe; la sloʼ». Laje laj yakʼbe li Adane, vaʼun «la sloʼ ec». ¿Kʼu van yuʼun xanaʼ ti la sloʼ eke?... Jaʼ ta skoj ti mas skʼanoj li Evae, ti jaʼ mu sta jech skʼanoj li Jeovae, jech oxal jaʼ la spas li kʼusi lek chil li yajnile. Akʼo mi jech, mas toj tsots skʼoplal ti jchʼunbetik smantal li Diose, jaʼ mu sta li krixchanoetike.

¿Mi xvul ta ajol li jkot kiletel chon ti la skʼopon Evae? Jech kʼuchaʼal liʼe, oy buchʼu spas yuʼun ti chkʼopoj xa yilel junuk ixtolale. Jech ek, oy buchʼu la spas ti chkʼopoj xa yilel li kiletel chone. ¿Buchʼu van laj yakʼ kʼopojuk li kiletel chone?... Jaʼ «li chon ta voʼonee, jaʼ li banquilal pucuje, jaʼ li Satanase».

¿Mi xanaʼ kʼusi skʼan jpastik sventa xmuyubaj kuʼuntik li Jeovae?... Xuʼ xmuyubaj avuʼun kʼalal chachʼunbe smantale. Li Satanase chal ti xuʼ la yuʼun ti jaʼuk jpastik li kʼusi tskʼan stuke. Jaʼ yuʼun, xi tstojobtasutik li Jeovae: «Jnichʼon, bijan me, jech xcuxet noʼox coʼnton avuʼun; jech xuʼ ta jtacʼbe li bochʼo chopol chiyalbun jcʼoplale». Tslaban Jeova li Satanase. Chal ti xuʼ la yuʼun snamajesutik ta stojolal li Diose. Jaʼ yuʼun, ¡muyubajuk avuʼun Jeova ta skoj ti chachʼunbe smantal xchiʼuk ti chatun ta stojolale! ¿Mi chavakʼ persa sventa jechuk xapas?...