La stoy sbaik ta stojolal Dios li Adan xchiʼuk Evae

Jun kʼakʼal kʼalal stuk te oy li Evae, laj yichʼ kʼoponel yuʼun jkot kiletel chon. Xi jakʼbate: «¿Mi ta melel laj yalboxuk Dios ti mu xuʼ xalobeik sat jpetsuk li teʼetik li’ ta tsʼunobaltike?». Xi la stakʼ li Evae: «Xuʼ ta jlobekutik sat skotol li teʼetik li’ ta tsʼunobaltike. Jaʼ no’ox oy jpets te’ ti mu xuʼ jlobekutik sate. Yuʼun mi ta jloʼkutike, chichamkutik». Xi laj yal li chone: «Mu xachamik. Yuʼun mi chaloʼike, chakoʼolajik jech kʼuchaʼal Dios». ¿Mi melel van taje? Maʼuk melel. Pe li Evae la xchʼun, jech xtok kʼalal mas tskʼel li sat teʼe, tskʼan xa sloʼ yaʼi ta ora. Vaʼun, la sloʼ xchiʼuk laj yakʼbe li Adan eke. Li Adane snaʼoj ti xuʼ xchamik mi muʼyuk chchʼunbeik smantal li Jeovae, akʼo mi jech, la sloʼ ek.

Kʼalal bat xa ox kʼakʼale, kʼoponatik yuʼun Jeova li Adan xchiʼuk Evae. Jakʼbatik ti kʼu yuʼun muʼyuk la xchʼunik mantale. Li Evae laj yal ti jaʼ ta smul li chone, li Adan eke laj yal ti jaʼ ta smul li Evae. Ta skoj ti muʼyuk la xchʼunbeik smantal Jeova li Adan xchiʼuk Evae, laj yichʼik nutsel lokʼel li ta nichimaltike. Jaʼ yuʼun, li Jeovae laj yakʼ anjeletik xchiʼuk jun espada ti xtiltun skʼakʼal li ta yochebal nichimaltik sventa mu x-ochik yan veltae.

Jech xtok, li Jeovae laj yal ti chakʼbe kastigo li buchʼu la sloʼla Evae. Ta melel maʼuk kʼopoj stuk li chone. Yuʼun li Jeovae muʼyuk bu la spas chonetik ti xuʼ xkʼopojike. Jaʼ jun chopol anjel ti laj yakʼ akʼo kʼopojuk li chon sventa sloʼla li Evae. Li anjel taje jaʼ li Diablo Satanase. Ta mas jelavele, li Jeovae ta slajes li Satanas sventa mu jechuk-o sloʼla li krixchanoetike.