Chlik jun tsatsal kuxlejal

TI KʼALAL muʼyuk xaʼox te oyik ta nichimaltik Edene, ayan ep svokolik ti Adán xchiʼuk Evae. Tsots abtejik sventa oyuk sveʼelik. Yuʼun chʼabal xa lekil alakʼ sba teʼetik ti chakʼ sate, kʼajomal xa noʼox chʼixetik xchiʼuk yantik chopol vomoletik lik chʼianuk la jyilik. Liʼe jaʼ jech kʼot ta pasel kʼalal muʼyuk la xchʼunbeik smantal ti Diose, yuʼun maʼuk xa Yamigotak.

Pe li kʼusi mas toj chopole jaʼ ti lik sokuk sbekʼtal li Adán xchiʼuk Evae. Vuleso ta ajol: Albatik yuʼun Dios ti mi la slobeik sat li jtekʼ teʼe ta xchamik. Veno, ta skʼakʼalil onoʼox ti kʼalal la sloʼik li sat teʼ taje lik sokuk li sbekʼtalike. ¡Toj bolik ti kʼalal jech muʼyuk la xchikintabeik smantal ti Diose!

Skotol li yalab xnichʼnabik ti Adán xchiʼuk Evae, jaʼ to vokʼ ti kʼalal nutsbilik xaʼox lokʼel ta nichimaltik Edene. Taje jaʼ smelolal ti ta xmalubik xchiʼuk ta xchamik li yalab xnichʼnabik eke.

Ti lajuk xchʼunbeik smantal Jeova ti Adán xchiʼuk Evae, muyubajik ta xkuxlejalik ti jechuke, li yalab xnichʼnabike muyubajik ek ti jechuke. Jun yoʼonton kuxiik sbatel osil ta Balumil ti jechuke. Muʼyuk buchʼu malub, muʼyuk buchʼu iʼipaj mi jaʼuk buchʼu cham ti jechuke.

Ti Diose tskʼan ti junuk yoʼonton xkuxiik sbatel osil li krixchanoetike, xchiʼuk ta xal ta melel ti chkʼot skʼakʼalil ti jech chkʼot ta pasele. Maʼuk noʼox toj alakʼ sba chkʼot spʼejel li Balumile, yuʼun li krixchanoetike muʼyuk xa ta x-ipajik. Lek ta xil sbaik skotolik xchiʼuk lek ta xil sbaik xchiʼuk ti Diose.

Pe ti Evae muʼyuk xa lek ilbil yuʼun ti Diose. Jech oxal kʼalal ch-alaje toj vokol ta xaʼi. Toj echʼ noʼox xkʼuxul ta xaʼi. Jech ta melel, ta skoj ti muʼyuk la xchʼunbe smantal Jeova ti Evae toj ep chil svokol, ¿mi mu jechuk cha vil?

La jyil ep skeremik xchiʼuk ep stsebik ti Adán xchiʼuk Evae. Kʼalal vokʼ ti sbaʼyel keremike, Caín la jyakʼbeik sbi. Ti xchibal skeremike, Abel la jyakʼbeik sbi. ¿Mi xa naʼ kʼusi kʼot ta stojolalik?