Li Diose la spas li baʼyel vinik xchiʼuk li baʼyel antse

Li Jeovae la stʼuj jsep osil sventa skʼatajes ta jun nichimaltik, Eden laj yakʼbe sbi. Tee oy toʼox ep ta chop nichimetik, teʼetik xchiʼuk chonbolometik. Ta tsʼakale, li Jeovae la spas li baʼyel vinike, jaʼ sbi Adan. Sventa spase, la stunes lum, vaʼun la xvuchʼtabe sniʼ. ¿Mi xanaʼ kʼusi kʼot ta pasel? ¡Lik kuxiuk li Adane! Vaʼun, li Jeovae laj yalbe ti akʼo xchabi li nichimaltike xchiʼuk ti akʼo xakʼbe sbi skotol li chonbolometike.

Li Jeovae xi laj yalbe mantal li Adane: «Xuʼ chaloʼ skotol li sat teʼetik liʼ oy ta tsʼunobaltike. Jaʼ noʼox mu xuʼ xalobe sat jpets teʼ, yuʼun mi la loʼe, ta xacham».

Ta tsʼakale, xi laj yal li Jeovae: «Ta jpasbe jun yajkoltaobba li Adane». Jaʼ yuʼun, laj yakʼ akʼo ochuk lek svayel li Adane, vaʼun te lik slokʼesbe jun xchʼilteʼ sventa spasbe ta yajnil. Li antse Eva la sbiin. Li Adan xchiʼuk Evae jaʼik li baʼyel nupultsʼakale. ¿Kʼu yelan laj yaʼi sba Adan kʼalal laj yil li yajnile? Solel muyubaj tajek, yuʼun xi laj yale: «¡Kʼelo avil kʼusi la smeltsan-o xchiʼuk jun jchʼilteʼ li Jeovae! ¡Xikoʼolajkutik tajek!».

Li Jeovae laj yalbe Adan xchiʼuk Eva ti akʼo x-alaj xnichʼnajik sventa snojesik li balumile. Yuʼun li Jeovae oy ta yoʼonton ti akʼo xkuxetuk noʼox yoʼonton ch-abtejik sventa skʼatajesik ta jun paraiso spʼejel li balumile. Pe muʼyuk bu xkʼot ta pasel, ¿kʼu yuʼun? Taje jaʼ ta jchantik li ta yan xchanobile.