¿Kʼu yuʼun chijmalubutik xchiʼuk chijchamutik?

Xi albat yuʼun li Diose: «Me chaloʼe, ta xacham» (Génesis 2:17). Ti tauk onoʼox xmalub xchiʼuk chcham li Adane, muʼyuk sbalil jechuk li kʼusi albate. Li Adane snaʼoj ti mi muʼyuk tsloʼ li sat teʼe, muʼyuk chcham.

Li ta nichimaltike oy epal teʼetik ti stakʼ lobel sate, jaʼ yuʼun li Adan xchiʼuk Evae mu persauk ox sloʼik li sat teʼ taje (Génesis 2:9). Ti muʼyukuk jech la spasike, la xchʼunbeik smantal li buchʼu akʼbat xkuxlejalike xchiʼuk jaʼ te laj yakʼik ta ilel jechuk ti jaʼ oy sderecho Dios ta yalel li kʼusi xuʼ spasike.

¿KʼU YUʼUN CHAMIK LI ADAN XCHIʼUK EVAE?

Sventa xkaʼitik ti kʼu yuʼun chamik li Adan xchiʼuk Evae, skʼan baʼyel xkalbetik skʼoplal li kʼusi la sloʼiltaik jun veltae, ti jaʼ yakal chakʼ-o jvokoltik li avie. Li Satanas ti jaʼ jun chopol anjele la stunes jkot kiletel chon sventa xal li kʼusi mu meleluke. Xi chal li Vivliae: «Li quiletel chon ta voʼonee jaʼ noʼox stuc toj manya cʼusi tspas xchiʼuc sbijil ta scotol yantic chonbolometic ti pasbil yuʼun Mucʼul Diose. Jaʼ yuʼun jech la sjacʼbe li antse: ‹¿Me ta melel laj yalboxuc Mucʼul Dios mu xuʼ chaloʼbeic sat jpetsuc li teʼetic liʼ ta tsʼunubaltique?›» (Génesis 3:1).

Xi la stakʼ li Evae: «Xuʼ ta jloʼbecutic sat scotol li teʼetic liʼ ta tsʼunubaltique. Jaʼ noʼox mu xuʼ ta jloʼbecutic sat li jpets teʼ te ta oʼlol tsʼunubaltique. Laj yalbuncutic Dios ti mu xuʼ ta jloʼcutique, ti mu xuʼ ta jpicutique. Me jech ta jpascutique, ta xichamcutic». Vaʼun, li kiletel chone xi laj yalbe li antse: «Mu meleluc. Mu xachamic yuʼun. Yuʼun li Diose snaʼoj ti chjam asatic me laj aloʼique; chlic anaʼic cʼusi lec xchiʼuc cʼusi chopol. Chacoʼlajic jech chac cʼu chaʼal Dios». Kʼalal jech laj yal li Satanase, jaʼ te laj yal ta jamal ti jaʼ la jun jutkʼop li Jeovae xchiʼuk ti oy la kʼusi mu x-akʼbat skʼupinike (Génesis 3:2-5).

Tsʼuj ta petsʼ li Evae. La skʼel lek li jtekʼ teʼe, solel tskʼan xa tslobe sat laj yil... La skʼok li sat teʼe, vaʼun la sloʼ. Li Vivliae chal li kʼusi kʼot ta pasel ta tsʼakale: «Bat yac’be li smalale; te la slo’ ec» (Génesis 3:6).

¡Toj kʼux van laj yaʼi Dios ti la stoy sba li yalab xnichʼnab ti skʼanojan toʼoxe! ¿Kʼusi la spas? Li Jeovae xi laj yalbe li Adane: «Ep chachiqʼuinaj c’alal chata ave’el. Ja’ to chlaj avocol c’alal me lapas ta lum yan veltae. Yu’un ta lum ono’ox pasbilot, jech chac’ataj ta lum yan velta noxtoc» (Génesis 3:17-19). Jech onoʼox kʼot ta pasel, «ti cʼu yepal jabil icuxi ta scotol li Adane ja’ baluneb ciento xchi’uc lajuneb xcha’vinic (930) jabil ta scotol. C’alal jech yepal sjabilale, icham» (Génesis 5:5). Kʼalal cham li Adane, muʼyuk bat ta vinajel o muʼyuk te bat ti bu oy kuxlejaletik ti mu xvinaje. Kʼalal muʼyuk toʼox spasoj Adan li Jeovae, muʼyuk toʼox skʼoplal, kʼalal chame pas ta lum yan velta, jaʼ xkaltik, te laj-o skʼoplal. ¡Toj chopol li kʼusi kʼot ta pasele!

¿KʼU YUʼUN MAʼUK TUKʼIL KRIXCHANOUTIK?

Ta skoj ti la snop stukik ti la stoy sbaik ta stojolal Diose, li Adan xchiʼuk Evae maʼuk xa tukʼil krixchanoetik komik xchiʼuk mu xa stakʼ xkuxiik sbatel osil. Kʼalal jech la spasike, oy kʼusi jel ta xkuxlejalik: maʼuk xa tukʼil krixchanoetik xchiʼuk pasik ta jmulaviletik. Pe taje maʼuk noʼox laj yil svokol stukik, yuʼun laj yakʼbe svokol li snitilulaltake. Li Romanos 5:12 xi chale: «Ta jun noʼox vinik och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik ta skoj ti jpasmulil kʼot skotolike».

Li Vivliae chal ti xkoʼolaj kʼuchaʼal ta jlik pokʼ li lajelale, ti smakoj skotol li lumetike xchiʼuk jech kʼuchaʼal jlik manta ti xpixoj li balumile (Isaías 25:7). Li pokʼ ti smakoj li krixchanoetike xkoʼolaj ta lumal tok ti yichʼoj veneno ti muʼyuk buchʼu xuʼ xkol ta stojolale. Jaʼ jech, ta stojolal «Adan yakal chcham skotol li krixchanoetike» (1 Korintios 15:22). Jaʼ yuʼun, xuʼ van jech ta jakʼbe jbatik kʼuchaʼal li jtakbol Pabloe: «¿Buchʼu van xuʼ tskoltaun ta sventa li slajel jbekʼtale?». ¿Mi oy buchʼu xuʼ spojutik lokʼel? (Romanos 7:24).