Pasbilutik sventa xijkuxi sbatel osil

¿Mi chopol ti jech oy ta koʼontontik taje? Moʼoj. Li Vivliae chal ti jaʼ laj yakʼ ta koʼontontik Dios ta skʼanel taje (Eclesiastés 3:11). Chalbutik xtok ti «jaʼ kʼanelal li Diose» (1 Juan 4:8). Ta skoj taje, ¿mi lek van xanaʼ ti jech laj yakʼ ta koʼontontik li Dios ti mu onoʼox xkʼot ta pasele?

Muʼyuk buchʼu tskʼan chcham. Yuʼun li Vivliae chal ti jaʼ kajkontratik li lajelale (1 Korintios 15:26). Bakʼintike ta ora noʼox ta xvul, yantik veltae ta tsʼakal to jutuk, pe ta persa onoʼox ta xvul. Epal krixchanoetike mu skʼan snopbeik skʼoplal li lajelale, li yantike ta xiʼik-o. ¿Mi chkʼot van skʼakʼalil ti chichʼ akʼbel slajeb li kajkontratik taje?

OY SPATOBIL KOʼONTONTIK

¿Mi anaʼoj xa ti mu ox skʼan Dios ti xcham li krixchanoetike? Li ta Genesise te chakʼ ta ilel ti tskʼan ox Dios ti xijkuxiutik sbatel osil liʼ ta balumile. Li Jeovaea toj lek la smeltsan li jbalumiltike. Vaʼun, la spas li baʼyel vinik ti jaʼ li Adane, te laj yakʼ ta jun nichimaltik ti Eden sbie. Li Diose laj yakʼ venta ti «toj lec» li kʼusitik la spase (Génesis 1:26, 31).

Li Adane laj yichʼ pasel ta slokʼol Dios; yuʼun jaʼ toʼox jun tukʼil vinik (Deuteronomio 32:4). Li Eva eke jaʼ jun tukʼil ajnilal. Xi albatik yuʼun li Jeovae: «Bolanic; epajanic. Nojesic li banamile; ventainic o. Pasic ta mantal scotol li choyetique, li mutetique, xchi’uc scotol li chonetic ti xquilet ta banamil chanovique» (Génesis 1:28).

Li snitilultake mu ta orauk noʼox ta xnoj yuʼunik li balumile. Sventa xkʼot ta pasel li kʼusi tskʼan Diose, skʼan xil yalabtak li Evae, vaʼun li yalabtake ta xil yalab xnichʼnabik jaʼ to ti kʼuxi xnoj yuʼunik li balumile (Isaías 45:18). Mi muʼyuk onoʼox chilik chkʼot ta pasel kʼusi tskʼan Dios li Adan xchiʼuk Evae xchiʼuk ti jaʼ noʼox chkuxiik sventa xil li yalab xnichʼnabik xchiʼuk ti xuʼ van xil chchʼi li smamobtakike, ¿mi sta-o van li mantal akʼbatik yuʼun Jeovae?

Nopo xa noʼox avaʼi ti skʼan spas ta mantal li chonbolometike. Li Adane skʼan xakʼbe sbi li chonbolometike, pe taje mu ta aniluk pas yuʼun (Génesis 2:19). Pe sventa skʼel o xchabi li kʼusitik kuxajtike skʼan baʼyel xojtikinan lek, jaʼ yuʼun mas to van jal pas-o yuʼun taje.

Li chib mantaletik akʼbatik yuʼun Dios li Adan xchiʼuk Evae, ti spasik ta mantal li chonbolometike xchiʼuk ti snojesik li balumile, jaʼ te chakʼ ta ilel ti laj yichʼik pasel sventa jal xkuxiike. Yuʼun li Adane jal onoʼox kuxi.

EPAL JABIL KUXIIK

Li Vivliae chal ti kʼalal skʼan toʼox xtal li Nojelal ta voʼe, li krixchanoetike mas toʼox jal ta xkuxiik kʼuchaʼal li avie. Li ta Génesis 5:5 xi chale: «Ti cʼu yepal jabil icuxi ta scotol li Adane ja’ baluneb ciento xchi’uc lajuneb xcha’vinic (930) jabil ta scotol». Vaʼun chalbe skʼoplal ti kuxiik mas ta baluneb sien jabil li vakvoʼ viniketik liʼe: Set, Enos, Kenan, Jared, Matusalen xchiʼuk Noe ti yichʼoj xa ox vakib sien jabil kʼalal tal li Nojelal ta voʼe (Génesis 5:6-27; 7:6; 9:29). ¿Kʼu yuʼun toj jal kuxiik?

Li viniketik taje jaʼo ayanik o vokʼik kʼalal mu toʼox jaluk yechʼel ti la saʼ smulik li Adan xchiʼuk Evae. Taje jaʼ van srasonal ti mas jal kuxiike. Pe ¿kʼuxi te snitojbe sba skʼoplal li tukʼil kuxlejal xchiʼuk ti jal chijkuxie? Xchiʼuk ¿kʼuxi ta xichʼ akʼbel slajeb li lajelale? Sventa jnabetik stakʼobil taje, skʼan baʼyel jnaʼtik ti kʼu yuʼun chijmalubutike xchiʼuk ti chijchamutike.