Ti kʼusi spasoj Dios sventa tspojutike

Li Diose laj onoʼox yalbe ta melel Abraham ti te chlokʼ ta yutsʼ yalal li nitilulal ti albil xa onoʼox skʼoplale. Laj yalbe ti skotol «mucʼtic lumetic» tstaik bendision ta stojolal li nitilulal taje (Génesis 22:18). Li smom Abraham ti jaʼ li Jacobe bat ta naklej ta Egipto, vaʼun epaj li yutsʼ yalale jaʼ kʼotik li ta voʼneal Israele.

Ta mas tsʼakal li chopol ajvalil Faraone la smosoin li j-israeletike, vaʼun li Diose la svaʼan Moisés sventa xkʼot ta j-alkʼop, ti tslokʼes ta Egipto li jteklume xchiʼuk ta skʼelobil juʼelal echʼik li ta Tsajal Nabe. Laje laj yakʼbe mantaletik j-israeletik li Diose, te tsakal skʼoplal li Lajuneb Mantaletik ti jaʼ sventa chbeiltasatik xchiʼuk chchabiatike. Taje chal kʼusi chakʼik ta milbil matanal yoʼ staik perton ta sventa li smulike. Ta skoj ti akʼbat snaʼ yuʼun Dios li Moisese, laj yalbe j-israeletik ti chtal yan j-alkʼope. Taje jaʼ li nitilulal ti albil xa noʼox skʼoplale.

Kʼalal echʼem xaʼox chanibuk sien jabile, li Diose laj yalbe ajvalil David ti mi vul ta lokʼel li nitilulal ti albil xa onoʼox skʼoplal ta nichimaltik Edene ta x-ajvalilaj ta sbatel osil. Taje jaʼ skʼoplal li Mesiase, ti jaʼ li buchʼu svaʼanoj Dios sventa xkʼot ta Jkoltavaneje xchiʼuk ti tspas ta paraiso yan velta li Balumile.

Li Diose la stunes David xchiʼuk yan yaj-alkʼoptak sventa kʼunkʼun laj yakʼ ta ojtikinel buchʼu jaʼ li Mesiase. Laj onoʼox yalik ti bikʼit chakʼ sbae, ti oy slekil yoʼontone xchiʼuk ti chchʼay yuʼun viʼnal, choplejal xchiʼuk paskʼop mi lik ventainvanuke. Jun yoʼontonik ta jujuntal li krixchanoetike xchiʼuk li chonbolometike. Chchʼay skʼoplal li chameletike, li il vokolile, li lajele xchiʼuk li buchʼutik chamemike ta xchaʼkuxiik yan velta liʼ ta Balumile, yuʼun li vokoliletik taje muʼyuk onoʼox jech ta yoʼonton li Diose.

Li Diose la stunes j-alkʼop Miqueas sventa laj yakʼ ta naʼel ti te chvokʼ ta Belén li Mesiase xchiʼuk ta stojolal j-alkʼop Daniel laj yal xtok ti chichʼ milele. Pe la xchaʼkuxes Mesías li Diose xchiʼuk la svaʼan ta Ajvalil te ta vinajel. Li Daniel xtoke laj yal ti jaʼ onoʼox chkʼot ta xkʼexol skotol ajvaliletik kʼuk sjalil li Ajvalilal tspas Mesiase. ¿Mi melel ti chvul li Mesías kʼuchaʼal albil xa onoʼox skʼoplale?

​(Te lokʼem ta Génesis kapitulo 22 kʼalal ta 50, te chata xtok ta Éxodo, Deuteronomio, 2 Samuel, Salmos, Isaías, Daniel, Miqueas, Zacarías 9:9.)