«Laj xa jtacutic Buchʼu ti Mesiase»

Kʼalal vukub xaʼox siglo laj yichʼ tsʼibaele, kʼot ta pasel li albilkʼop laj yal Miqueas ta sventa li Mesiase: te vokʼ ta Belén li Jesuse. Kʼalal echʼ xaʼox 30 jabil, jaʼ xkaltik, li ta jabil 29 ta jkʼakʼaliltike, kʼot ta pasel li sbavokʼal albilkʼop laj yal Daniel ti chvul ta lokʼel li Mesiase. Kʼalal laj yichʼ voʼ xchiʼuk tʼujat ta xchʼul espiritu Dios li Jesuse, jaʼo vul ta lokʼel li nitilulal ti malabil xa onoʼoxe, jaʼ xkaltik, li Mesiase.

Lik noʼox spas yabtel li Jesuse, yuʼun «la xchol batel li Lequil Aʼyej ta sventa ventainel yuʼun Diose» (Lucas 8:1). Jech kʼuchaʼal laj onoʼox yichʼ albel skʼoplale, laj yakʼ ta ilel xkʼuxul yoʼonton li Jesuse, slekil yoʼonton xchiʼuk la stsak ta venta li yantike. Jtunel xchiʼuk ta slekil yoʼonton chanubtasvan, jech xtok «cʼusiuc noʼox cʼux chaʼyic» li krixchanoetike la xpoxtaan li Jesuse, jaʼ jech vinaj ti te oy xchiʼuk li Diose (Mateo 4:23). Ta bikʼit ta mukʼ nopajik ta stojolal Jesús xchiʼuk xi laj yalike: «Laj xa jtacutic Buchʼu ti Mesiase» (Juan 1:41, Ch).

Kʼalal skʼan toʼox stsak lek yabtel li Jesuse, kak laj yal ti baʼyel tsnuptanik paskʼop, nikel xchiʼuk yan vokoliletik li krixchanoetike. Jech xtok, xi tsots skʼoplal laj yale: «Viqʼuiluc me asatic» (Marcos 13:37).

Tukʼil krixchano echʼ xchiʼuk la xchʼunbe smantal Dios li Jesuse, akʼo mi jech, milat onoʼox yuʼun li yajkontratake. Kʼalal chame jaʼ jech laj yakʼ jun matanal sventa jtatik yan velta li kʼusi chʼay yuʼunik Adán xchiʼuk Evae, jaʼ xkaltik, li kuxlejal sbatel osil ta Paraisoe.

Li slajel xchiʼuk ti chaʼkuxesat yuʼun Dios kʼuchaʼal jun kuxlejal ta espiritu kʼalal oxib xaʼox kʼakʼal slajel li Jesuse, jaʼ kʼot ta pasel li kʼusi albil xa onoʼox skʼoplale. Jech xtok, laj yakʼ sba ta ilel ta stojolal voʼob sien yajtsʼaklomtak. Kʼalal jutuk xaʼox skʼan xbat ta vinajele, laj yalbe yajtsʼaklomtak ti akʼo yalbeik skʼoplal li Ajvalilal tspase xchiʼuk li lekil aʼyej ta skotol «li cristianoetic ta jujun banamile» (Mateo 28:19). ¿Kʼuxi xuʼ spasik lek li abtelal taje?

​(Te lokʼem ta Mateo, Marcos, Lucas, Juan, 1 Corintios.)