KʼUSITIK CHICHʼ JAKʼEL TA SVENTA VIVLIA
¿Mi oy kʼusi xuʼ jmalatik ta sventa li animaetike?
Xkoʼolaj kʼuchaʼal vayel li lajele, yuʼun mu kʼusi snaʼik li buchʼutik chamemike xchiʼuk muʼyuk kʼusi xuʼ spasik. Akʼo mi jech, xuʼ xchaʼkuxesan li Jpasvanej kuʼuntike. Yakʼoj xa ta ilel ti jech tspase, yuʼun laj yakʼbe sjuʼel Jesús sventa la xchaʼkuxes krixchanoetik. (Kʼelo Eclesiastés 9:5; Juan 11:11, 43, 44.)
¿Kʼuxi ti xkoʼolaj kʼuchaʼal vayel li lajele?
Li Diose yaloj ta melel ti chchaʼkuxesan ta jun achʼ balumil ti bu oy tukʼilal li animaetik ti te oy ta snopbene. Li buchʼutik chchaʼkuxesatik yuʼun Diose te smalaojik-o ta smukinalik jaʼ to mi akʼbat xkuxlejalik yan veltae. Oy tajek ta yoʼonton chchaʼkuxes animaetik li Dios ti skotol xuʼ yuʼune. (Kʼelo Job 14:14, 15.)
¿Kʼu yelan chchaʼkuxiik talel?
Kʼalal mi laj yichʼik chaʼkuxesel yuʼun Dios li animaetike mu xchʼay ta sjolik ti buchʼu echʼike, chojtikin yan velta li yutsʼ yalalik xchiʼuk yamigotakike. Akʼo mi sokem xa li sbekʼtalike, li Diose xuʼ yuʼun chakʼbe yan sbekʼtalik mi la xchaʼkuxesane, pe jaʼ onoʼox li jun krixchano taje. (Kʼelo 1 Corintios 15:35-38.)
Oy jvokʼ krixchanoetik ti chbatik ta vinajel mi chaʼkuxesatike (Apocalipsis 20:6). Pe jutuk mu skotoluk li buchʼutik chchaʼkuxiik tale chkuxiik ta Balumil ti kʼatajem xaʼox ta paraisoe. Te chlik yan velta xkuxlejalik ti bu xuʼ van xkuxiik sbatel osile. (Kʼelo Salmo 37:29; Hechos 24:15.)