Toj kʼux yipal li lajelale

Toj tsots ta albel skʼoplal ta sventa li lajelale. Epal krixchanoetik jaʼ mas lek chaʼiik ti mu xalbeik skʼoplal jsetʼuk ta sventa taje. Pe ta onoʼox xkʼot ta jtojolaltik. Li lajelale toj kʼux yipal xchiʼuk toj tsots ta chʼamel.

Muʼyuk onoʼox bu chapalutik kʼalal chcham jtotik o jmeʼtike, jnup jchiʼiltik o junuk kalab jnichʼnabtike. Li kʼusitik chopole xuʼ ta anil noʼox xkʼot ta jtojolaltik o mu xkʼot ta pasel ta anil. Kʼusiuk ti xkʼot ta pasele, li xkʼuxul kʼalal oy buchʼu chcham kuʼuntike muʼyuk kʼusi stakʼ pasel xchiʼuk xuʼ toj echʼem xkʼuxul chkom.

Kʼalal laj ta karo stot li Antonioe xi laj yale: «Yuʼun xkoʼolaj ti oy buchʼu la smak li anae xchiʼuk laj yichʼbe batel li syaveale. Jaʼ yuʼun mu xa stakʼ xa sut ta ana. Ta skoj taje jaʼ xa noʼox chavules ta ajol kʼu toʼox yelan oy. Taje jaʼ xa li kʼusi melel kʼotem ta pasele. Akʼo mi vokol chkaʼitik xchʼunel ti kʼu yuʼun jech kʼot ta jtojolaltik li voʼotike, mu xa kʼusi stakʼ pasel ta sventa taje».

Li Dorothy eke jechtik kʼot ta stojolal, kʼalal 47 toʼox sjabilale meʼon ants kom, laj yakʼ persa saʼel stakʼobiltak li kʼusitik tsjakʼbe sbae. Li Dorothye laj toʼox xchanubtas ololetik ta jujun domingo ti oy jchʼuleltik ti mu snaʼ xchame. Pe akʼo mi jech, mu toʼox snaʼ mi te chlaj-o skʼoplal skotol kʼalal mi lijchame. Li Dorothye xi la sjakʼbe jun pale anglicana: «¿Kʼusi chkʼot ta jtojolaltik kʼalal mi lijchame?». Xi la stakʼ li palee: «Muʼyuk buchʼu snaʼ ta melel. Jaʼ noʼox skʼan jmalatik xchiʼuk jkʼeltik kʼusi chkʼot ta pasel».

¿Mi jaʼ noʼox van «skʼan jmalatik xchiʼuk jkʼeltik kʼusi chkʼot ta pasel»? ¿Mi oy van kʼuxi xuʼ jnaʼtik mi te chlaj-o skʼoplal skotol kʼalal mi lijchame?