MANTAL TA SLIKEBALTIK PAJINA: ¿MI TE VAN CHLAJ SKʼOPLAL SKOTOL KʼALAL MI LIJCHAME?
Li krixchanoetike tskʼan chakʼbeik slajeb li lajelale
LI MUKʼTA AJVALIL QIN SHI HUANG
LI BUCHʼU TSAʼ KʼUSITIK TA BALUMIL PONCE DE LEÓN
Li lajelale jaʼ kajkontratik ti toj xibal sbae. Chkakʼtik persa stsalel ti bu kʼalal xuʼ kuʼuntike. Mi cham junuk li buchʼu jkʼanojtike xuʼ van vokol chkaʼitik ta xchʼunel. Jech xtok, kʼalal kerem tsebutik toe xuʼ van ta jnoptik ti muʼyuk bu tstautik li lajelale, pe jaʼ noʼox ta jloʼla jbatik.
Li voʼneal faraonetike jaʼ li buchʼutik la snopik mas ta sventa li kuxlejal sbatel osile. Yuʼun li faraonetike xchiʼuk li ta smilal noʼox yaj-abteltakike, jutuk mu skotol xkuxlejalik la stunesik sventa xakʼbeik slajeb yalojik li lajelale. Li piramideetik la smeltsanike jaʼ sprevailtak ti muʼyuk kʼusi tun-oe xchiʼuk ti muʼyuk xkuxiik sbatel osile.
Li mukʼta ajvaliletik ta Chinae tskʼan ox chkuxiik sbatel osil ek, jaʼ noʼoxe jelel li kʼusi la spasik yoʼ staike: la spasik jun poxil mágico sventa x-akʼbatik kuxlejal sbatel osil. Li mukʼta ajvalil Qin Shi Huang eke solel persa la skʼanbe ti buchʼutik snaʼik spasel majia (alquimistas) ti akʼo spasbat jun poxil sventa mu xnopaj talel ta stojolal li lajelale. Pe ep li poxiletik taje yichʼojan mercurio ti oy svenenoale, jaʼ yuʼun kʼalaluk la stunes li poxil la spasike xuʼ van jaʼ te cham-o li mukʼta ajvalile.
Li ta svaklajunebal sigloe, li Juan Ponce de León ti tsaʼ kʼusitik ta balumile (explorador) ti likem ta Españae xanav batel ta nab Caribe sventa bat saʼ yaloj jun kuxlejal ti bu muʼyuk chyijube. Kʼalal jaʼo yakal tsaʼ taje, la sta ta saʼel Florida (Estados Unidos), pe te van jayibuk jabil mas tsʼakale cham kʼalal jaʼo la spasik kʼop xchiʼuk li j-indioetik ti te likemik ta Estados Unidose. Vaʼun jech muʼyuk la sta-o ta saʼel jun kuxlejal ti muʼyuk chyijub-oe.
Li faraonetike, li mukʼta ajvaliletike xchiʼuk li buchʼutik tsaʼik kʼusitik ta balumile tskʼanik ox ti mu xchamike. Akʼo mi muʼyuk lek chkaʼitik li kʼusitik la spasike, ¿mi mu jkotoltikuk ta jkʼan chijkuxiutik sbatel osil? Li ta koʼontontike jkotoltik mu jkʼan xijchamutik.
¿MI XUʼ VAN XICHʼ TSALEL KOMEL LI LAJELALE?
¿Kʼu yuʼun ta jkʼan ta jtsaltik li lajelale? Li Vivliae chalbe srasonal. Kʼalal chalbe skʼoplal ta sventa li Jpasvanej kuʼuntik Jeova Diose,a xi chale: «Toj lec cʼupil sba la spas scotol li Diose; lec oy yorail la yacʼbe. Jech noxtoc laj yacʼbe ta yoʼnton cristianoetic ti muʼyuc spajeb cʼusitic tspas li Diose» (Eclesiastés 3:11). Oy ta koʼontontik ti jkʼupintik skʼelel sbatel osil li alakʼ sba Balumile, maʼuk noʼox ti 80 jabile (Salmo 90:10). Taje jaʼ li kʼusi oy ta koʼontontike.
¿Kʼu van yuʼun laj yakʼ ta koʼontontik ti ta jkʼan chijkuxi sbatel osil li Diose? ¿Mi jaʼ noʼox van sventa chakʼ kil jvokoltik? Taje mu jechuk. Kʼajomal noʼox yaloj Dios ti chakʼbe slajeb li lajelale. Li Vivliae ep ta velta yaloj ti chichʼ lajesbel skʼoplal li lajelale xchiʼuk yaloj Dios ti chakʼbutik kuxlejal sbatel osile. (Kʼelo li rekuadro ti bu chal: «Chlaj skʼoplal li lajelale».)
Xi laj yal stuk li Jesucristoe: «Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote, xchiʼuc xotquinic noxtoc li Jesucristo laj atac tale» (Juan 17:3). Jaʼ yuʼun, oy lek spatobil koʼontontik ti xuʼ stsal komel kuʼuntik li lajelale. Akʼo mi jech, li Jesuse laj yal ta melel ti jaʼ noʼox Dios xuʼ stsal yuʼun li lajelale.
a Li Vivliae chal ti jaʼ Jeova sbi li Diose.